ވަރަށް ގަދަ، ހުޅުލެއަށް 58 މޭލަށް ވައި ގަދަވި

ހުޅުލެއަށް ރޭ ފަތިހު އައި ވިލާގަނޑުގައި ގަޑިއަކު 58 މޭލުގެ ބާރުމިނުގައި ވައި ޖެހިއްޖެ އެވެ.

އެއީ ރެކޯޑް ބާރުމިނަކަށް ނުވިޔަސް، އާންމު ގޮތެއްގައި ވިލާގަނޑުގައި ވައިޖެހޭ ވަރަށް ވުރެ ބާރެވެ.

މެޓް އޮފީހުގެ އޮފިޝަލަކު ވިދާޅުވީ ރޭ ފަތިހު 5:40 ގައި ހުޅުލެއަށް 58 މޭލަށް ވައިބާރުވި ކަމަށް ރެކޯޑް ކުރެވިފައިވާ ކަމަށެވެ. އަދި މާދަމާ ވެސް ހަމަ އެ ގަޑީގައި ހުޅުލެއަށް ވަރަށް ވައިބާރުވާނެ ކަމަށް ލަފާކުރެވޭ ކަމަށް އޮފިޝަލް ވިދާޅުވި އެވެ.

އެ އޮފީހުގެ ދިގު މުއްދަތުގެ ރެކޯޑްތަކަށް ބަލާއިރު، ހުޅުލެއަށް އެންމެ ވައިބާރުވި ކަމަށް ރެކޯޑް ކުރެވިފައި ވަނީ ނޮވެމްބަރު 3، 1978 ގަ އެވެ. އެއީ 71.3 މޭލުގެ ބާރުމިނުގަ އެވެ.

މެޓް އޮފީހުން މިއަދު އާންމުކުރި، އިއްޔެ ރޭގެ ދަންވަރު 12:00 އިން ރޭ ދަންވަރު 12:00 އަށް ވައިގެ ބާރުމިން ހުރި ގޮތުގެ ރެކޯޑުތަކުން ދައްކާ ގޮތުގައި، އެންމެ ވައިބާރުވީ ބ. ދަރަވަންދު އަށެވެ. އެ ރަށަށް ވަނީ ވިލާގަނޑުގައި 55 މޭލަށް ވައިބާރުވެފަ އެވެ.

ދެން އެންމެ ވައިބާރުވި ހދ. ކުޅުދުއްފުއްޓަށް ވަނީ 47 މޭލުގެ ބާރުމިނުގައި ވައިޖެހިފަ އެވެ.

ރާއްޖޭގެ މޫސުމީ ރެކޯޑްތަކުން ދައްކާ ގޮތުގައި، މިހާތަނަށް އެންމެ ވައިބާރުވި ދުވަހަކީ މެއި 29، 1991 އެވެ. އެ ދުވަހު ސ. ގަމަށް ވަނީ 103.5 މޭލުގެ ބާރުމިނުގައި ވައި ޖެހިފަ އެވެ.

ހުޅަނގު މޫސުމުގެ ބާރުގަދަވެ، މި ދުވަސްވަރު ރާއްޖޭގެ ބޮޑު ސަރަހައްދަކަށް ވައިބާރުވެ، ކަނޑުތައް ގަދަވެ އަދި ވިއްސާރަކުރާނެ ކަމަށް މެޓް އޮފީހުން ވަނީ ކުރިން ވެސް ލަފާކޮށްފަ އެވެ.

މެޓް އޮފީހުން ބުނި ގޮތުގައި، މި މަހާއި ކުރިއަށް އޮތް ދެ މަހު ރާއްޖޭގެ ބޮޑު ސަރަހައްދުތަކަށް ވާރޭ ވެހޭނެ ކަމަށް ލަފާ ކުރެވެނީ އާންމުކޮށް މި ދުވަސްވަރު ވެހޭ މިންވަރަށް ވުރެ މަދުންނެވެ. ނަމަވެސް، އުތުރުގެ ބައެއް އަތޮޅުތަކަށް އާންމުކޮށް މި ދުވަސްވަރު ވެހޭ ވަރަށް ނުވަތަ އެއަށް ވުރެ އިތުރަށް ވާރޭ ވެހުމަކީ އެކަށީގެންވާ ކަމެކެވެ.

ހުޅަނގު މޫސުން ނިމި، ރާއްޖެއަށް އިރުވައި މޫސުން ފެށޭނީ އަންނަ ޑިސެމްބަރު މަހު އެވެ.