އިންޑިއާ-ރާއްޖެ އެފްޓީއެއްގެ މަޝްވަރާ ފަށަން ނިންމައިފި

އިންޑިއާ އާއި ރާއްޖެއާ ދެމެދު މިނިވަން ވިޔަފާރީގެ އެއްބަސްވުމެއް (އެފްޓީއެއް) ގާއިމުކުރުމުގެ މަޝްވަރާތައް ފަށަން ނިންމާފައިވާ ކަމަށް އިންޑިއާގެ ބޮޑުވަޒީރު ނަރެންދުރަ މޯދީ މިއަދު ހާމަކުރައްވައިފި އެވެ.

މޯދީ މިކަން ހާމަކުރެއްވީ ރައީސް ޑރ. މުހައްމަދު މުއިއްޒު އިންޑިއާއަށް ކުރައްވަމުން ގެންދަވާ ދަތުރުފުޅުގައި، އެ މަނިކުފާނާ އެކު މިއަދު ބޭއްވި ރަސްމީ މަޝްވަރާތަކަށްފަހު، މީޑިއާތަކަށް ދެ ބޭފުޅުން ގުޅިގެން ދެއްވި ބަޔާނުގަ އެވެ.

މޯދީ ވިދާޅުވި ގޮތުގައި، ރައީސް މުއިއްޒުއާ އެކު އެކި ދާއިރާތަކުން ދެ ގައުމު ގުޅިގެން މަސައްކަތް ކުރުމަށް މަޝްވަރާ ކުރެވުނެވެ.

"އެގޮތުން، އިގުތިސާދީ ގުޅުން ފުޅާކުރުމަށްޓަކައި، މިނިވަން ވިޔަފާރީގެ އެއްބަސްވުމެއް ގާއިމުކުރުމުގެ މަޝްވަރާތައް ފަށަން އަޅުގަނޑުމެން މިއަދު ވަނީ ނިންމާފައި،" މޯދީ ވިދާޅުވި އެވެ.

މީގެއިތުރުން، ދެ ގައުމުގެ މެދުގައި ވިޔަފާރީގެ މުއާމަލާތްތައް ލޯކަލް ކަރަންސީން ކުރުމުގެ މަސައްކަތް ވެސް ކުރެވޭނެ ކަމަށް މޯދީ ހާމަކުރެއްވި އެވެ.

މޯދީ ވިދާޅުވި ގޮތުގައި، ރާއްޖެ އަކީ އިންޑިއާގެ އަވަށްޓެރިއެއްގެ އިތުރުން ގާތް އެކުވެރިއެކެވެ. މިގޮތުން، ރާއްޖެއަށް އެހީތެރިކަން ބޭނުންވި ކޮންމެ ހާލަތެއްގައި، އިންޑިއާ އިން އެހީތެރިކަން ފޯރުކޮށްދީފައިވާ ކަން އެ ބަޔާނުގައި މޯދީ ފާހަގަކުރެއްވި އެވެ.

"އަވަށްޓެރިއެއްގެ ޒިންމާ، އިންޑިއާއިން ވާނީ ފުރިހަމައަށް އަދާކޮށްފައި،" މޯދީ ވިދާޅުވި އެވެ.

އިންޑިއާ އާ އެކު އެފްޓީއޭއެއް ހެދުމުގެ މަޝްވަރާތައް ފަށަން ނިންމާފައި މިވަނީ، 2014 ވަނަ އަހަރު ޗައިނާ އާ އެކު ސޮއިކޮށްފައިވާ އެއްބަސްވުމަށް އަންނަ އަހަރުން ފެށިގެން އަމަލުކުރަން ފެށުމަށް ތައްޔާރުވަމުން އަންނަ ދަނޑިވަޅެއްގަ އެވެ.

ރާއްޖެ އިން ވަނީ ތުރުކީއާ އެކު ޕްރިފަރެންޝަލް ޓްރޭޑް އެގްރީމެންޓެއް ހަދަން ނިންމައި، އެ އެއްބަސްވުން އެކުލަވާލައިފަ އެވެ.

ރައީސް އާއި މޯދީގެ މަޝްވަރާތަކަށް ފަހު، އިންޑިއާ އިން ވަނީ 400 މިލިއަން އެމެރިކާ ޑޮލަރުގެ އިތުރުން 30 ބިލިއަން އިންޑިއަން ރުޕީސްގެ އަދަދާ ހަމައަށް އެކި ފަހަރު މަތިން ސްވޮޕް ނެގޭނެ ފެސިލިޓީއެއް ރާއްޖެއަށް ހަމަޖައްސައިދީފަ އެވެ.

އަންނަ ބުރާސްފަތި ދުވަހުގެ ނިޔަލަށް ރައީސްގެ ދެކަނބަލުން ކުރައްވާ މި ތާރީހީ ދަތުރުފުޅުގައި އިންޑިއާގެ ވެރިރަށް ނިއު ދިއްލީގެ އިތުރުން އާގަރާ އާއި މުމްބާއީ އަދި ބެންގަލޫރަށް ވަޑައިގެން ރަސްމީ ބައްދަލުވުންތަކާއި ދެ ގައުމުގެ ވިޔަފާރީގެ ގުޅުން ވަރުގަދަ ކުރުމަށް މަޝްވަރާތައް ކުރައްވާ ގޮތަށް ވަނީ ހަމަޖެހިފަ އެވެ.

ރައީސް މުއިއްޒުގެ މި ދަތުރުފުޅަކީ، މިދިޔަ އަހަރުގެ ނޮވެމްބަރު 17ގައި އެ މަނިކުފާނު މަގާމާ ހަވާލުވެވަޑައިގެންނެވި ފަހުން އެ ގައުމަށް ކުރައްވާ ފުރަތަމަ ފުރަމާާނަ ދަތުރުފުޅެވެ. އެކަމަކު ރައީސް ވަނީ، ބޮޑުވަޒީރު ނަރެންދުރަ މޯދީ ތިން ވަނަ ދައުރަކަށް މަގާމުގެ ހުވާ ކުރެއްވުމުގެ ރަސްމިއްޔާތުގައި މިދިޔަ ޖޫން މަހުގެ ތެރޭގައި ބައިވެރިވެވަޑައިގެންފަ އެވެ. އެ ދަތުރުފުޅުގައި ވެސް ދެ ގައުމުގެ ގުޅުން ހަރުދަނާ ކުރެއްވުމަށް މަޝްވަރާތައް ކުރެއްވި އެވެ.