ކޮރެއާގެ ކުންފުންޏަކަށް 3 މިލިއަން ޑޮލަރު ދައްކަން އެފްއޭއެމަށް ހުކުމް ކޮށްފި

ވިލިމާލެ އާއި ހުޅުމާލޭގައި ފުޓްބޯޅަ ދަނޑެއް ތަރައްގީކުރަން 2021 ގައި ހަވާލުކުރި ދެކުނު ކޮރެއާގެ ޓީކުއިން ކޮންސްޓްރަކްޝަން ކޯ ލިމިޓެޑަށް 3،382،000 ޑޮލަރު (52.1 މިލިއަން ރުފިޔާ) ދައްކަން އެފްއޭއެމްގެ މައްޗަށް ސިވިލް ކޯޓުން ހުކުމް ކޮށްފި އެވެ.

ޓީކުއިން ކޮންސްޓްރަކްޝަނާއި އެފްއޭއެމާ ދެމެދު ވެފައިވާ އެއްބަސްވުމުގައިވާ ގޮތުން، ވިލިމާލެ އާއި ހުޅުމާލޭގައި ފުޓްބޯޅަ ދަނޑު ތަރައްގީކޮށް، މަސައްކަތުގެ އަގުގެ ގޮތުގައި ދެ އިންވޮއިސް އަށް ވާ 1،197،200 ޑޮލަރާއި 1،940،800 ޑޮލަރު ދައްކަން ޖެހެ އެވެ. ހުޅުމާލެ ރީކޮންސްޓްރަކްޝަންގެ މަސައްކަތަށްވާ 122،000 ޑޮލަރާއި އެ ކުންފުނީގެ ރިކުއާމެންޓަށް ބަދަލު ގެނެސް ކޮށްފައިވާ މަސައްކަތުގެ އަގު ކަމަށްވާ 122،000 ޑޮލަރާ އެކު ޖުމްލަ 3،382،000 ޑޮލަރު އެފްއޭއެމުން ދައްކަން ޖެހެ އެވެ.

އެފްއޭއެމުން އެއްބަސްވުމާ އެއްގޮތަށް ފައިސާ ނުދެއްކުމުން ޓީކުއިން އިން ލުއިތަކެއް ވެސް ދިނެވެ. އެކަމަކު، އެފްއޭއެމުން އެދުނު ލުއިތަކާ އެއްގޮތަށް ވެސް ފައިސާއެއް ނުދައްކަ އެވެ.

އެހެންވެ، އެ ކުންފުނިން ސިވިލް ކޯޓަށް ހުށަހެޅީ އެ ފައިސާގެ އިތުރަށް ވެސް ލިބުނު މާލީ ގެއްލުމުގެ ބަދަލެއްގެ ގޮތުން 2،529،200 ޑޮލަރު ނަގައިދިނުމަށެވެ. އެއީ ލީގަލް ނޯޓިސް ފޮނުވި ތާރީހުން ފެށިގެން ކޮންމެ މަހަކަށް 202،920 ޑޮލަރުގެ މަގުން 10 މަސްދުވަހަށް 2،029،200 ޑޮލަރުގެ އިތުރުން ލީގަލް ފީގެ ގޮތުގައި ހަރަދު ކުރަން ޖެހުނު 500،000 ޑޮލަރެވެ.

ނަމަވެސް ގެއްލުމުގެ ބަދަލުގެ ގޮތުގައި ފައިސާ ދެއްކުމަށް މާޗު 20، 2021 ގައި ވި އެއްބަސްވުމުގައި ބަޔާން ކޮށްފައި ނުވާތީ، އެސޯސިއޭޝަންގެ ޣައިރު ހާޒިރުގައި ސިވިލް ކޯޓުން ހުކުމް ކުރީ، ކޮރެއާ ކުންފުނީގެ މަސައްކަތްތަކުގެ އަގަށް ވާ 3،382،000 ޑޮލަރު، މި އޮކްޓޯބަރު 1 ފެށިގެން އެއް މަސް ދުވަހުގެ ތެރޭގައި އެފްއޭއެމުން ދައްކައި ހަލާސް ކުރާށެވެ.

ޓީކުއިން ކޮންސްޓްރަކްޝަނާ އެކު ހެދި މި އެއްބަސްވުމުގެ ކުރިން، އެ މަހުގެ ދެވަނަ ދުވަހު އެފްއޭއެމުން ވަނީ ކޮރެއާގެ ކުންފުންޏެއް ކަމަށްވާ ސްކައިވިންޑް ގްލޯބަލްއާ އެކު 17 މިލިއަން ޑޮލަރުގެ ބޮޑު ޕްރޮޖެކްޓެއްގައި ވެސް ސޮއިކޮށްފަ އެވެ. ނަމަވެސް އެފްއޭއެމް ހައުސްގެ 20 ބުރީގެ އިމާރާތާއި ހަތަރު ބުރީގެ ފުޓްސަލް އެރީނާގެ އިތުރުން ރާއްޖޭގެ އެކި ސަރަހައްދުތަކުގައި 20 އާޓިފިޝަލް ގްރާސް ފުޓްބޯޅަ ދަނޑުގެ މި ޕްރޮޖެކްޓް ވެސް ކުރިއަކަށް ނުދެ އެވެ.

އެފްއޭއެމަށް ފީފާ އާއި އޭއެފްސީން ދޭ އެހީ އާއި ސްޕޮންސަރުން ދޭ ފައިސާ އަށް އެ އެސޯސިއޭޝަނުގެ ވެރިން ހިޔާނަތްތެރިވެފައިވާ ކަމުގެ ތުހުމަތުކޮށް، އެފަދަ މައްސަލަތަކެއް ފުލުހުން ތަހުގީގު ކުރަމުން އަންނައިރު، ފީފާ އިން ވަނީ އެ އެސޯސިއޭޝަނުގެ ކުރީގެ ރައީސް ބައްސާމް އަދީލް ޖަލީލް އެފަދަ މައްސަލައެއްގެ ތުހުމަތުގައި ސަސްޕެންޑް ވެސް ކޮށްފަ އެވެ.

ދަރަނިވެރިވެފައިވާ އެފްއޭއެމަށް އެކި ކުންފުނިތަކަށް މިލިއަނުން ފައިސާ ދައްކަން ސިވިލް ކޯޓުން ހުކުމްތައް ކުރަމުންދާއިރު، ބައްސާމް އެފްއޭއެމްގެ ފައިސާއިން ގަނެފައިވާ ދެ ޕެންޓްހައުސް ނުވަތަ އެޕާޓްމަންޓުތައް ފުލުހުންނާ ހަވާލުކުރަން ވެސް ވަނީ ނޯޓިސް ފޮނުވައިފަ އެވެ. އެ ނޯޓިހުގެ މުއްދަތު މާދަމާ އަށް ހަމަވާނެ އެވެ.

އެފްއޭއެމްގެ ހިންގުން ފީފާ އިން ނޯމަލައިޒޭޝަން ކޮމިޓީއަކާ ހަވާލު ކޮށްފައި ވާއިރު، އެ ކޮމިޓީން ވަނީ މިދިޔަ މަހު، ފީފާގެ ޓީމެއްގެ އެހީގައި އެފްއޭއެމްގެ ދަރަނީގެ މައްސަލަތައް ހައްލުކުރާނެ ގޮތުގެ މަގު ޗާޓެއް އެކުލަވާލުމުގެ މަސައްކަތް ފަށައިފަ އެވެ.