ސޯނަމް ރާއްޖެ އައިސް "ހެލޯ" ބުނެފި

ބޮލީވުޑްގެ އެކްޓްރެސް ސޯނަމް ކަޕޫރް ޗުއްޓީ ހޭދަކުރަން ރާއްޖެ އަށް މިއަދު އަތުވެއްޖެ އެވެ.

ސޯނަމް ޗުއްޓީ ހޭދަކުރަމުން އަންނަނީ މާލެ އަތޮޅުގައި އޮންނަ ވަން އެންޑް އޮންލީ ރީތިރަށް ރިސޯޓުގަ އެވެ.

ރިސޯޓުގައި ނަގާފައިވާ "މިރާ ސެލްފީ" އެއް ފޭސްބުކްގައި ޕޯސްޓުކޮށް ސޯނަމް ބުނީ "ހެލޯ ފްރޮމް މޯލްޑިވްސް" ކަމަށެވެ.

އެ ސެލްފީން ފެންނަ ގޮތުގައި އޭނާ ހުރީ ބީޗްވެއާގަ އެވެ. ޑެނިމް ޖެކެޓެއް އަޅައިގެން ހުރި އިރު، އޭނާގެ ކޮނޑުގައި ޓޯޓް ބޭގެއް ވެސް އޮތެވެ.

ސޯނަމްގެ އިންސްޓަގްރާމް ޕޯސްޓުތަކުން އެނގޭ ގޮތުގައި މި ވަގުތު ރާއްޖޭގައި ހުރީ އޭނާ އެކަންޏެވެ. އެކަމަކު އޭނާގެ ފިރިމީހާ ވެސް ވަރަށް އަވަހަށް ރާއްޖެއަށް އަންނާނެ އެވެ.

ސޯނަމްގެ ފިރިމީހާ އަކީ އިންޑިއާގެ ވިޔަފާރިވެރިއެއް ކަމަށްވާ އަނަންދު އަހޫޖާއާ އެވެ. މީގެ ފަސް އަހަރު ކުރިން ކުރި ކައިވެންޏަށް މިހާރު ދެ އަހަރުގެ ފިރިހެން ކުއްޖަކު ވެސް އޮވެ އެވެ.

ސޯނަމް ވަނީ މީގެ ކުރިން ވެސް އެކި ފަހަރު މަތިން ޗުއްޓީއަށް ރާއްޖެ އައިސްފަ އެވެ.

ކުއްޖަކު ލިބުނު ފަހުން ސޯނަމް އުޅެނީ ފިލްމީ މަސައްކަތްތަކާ ވަރަށް ދުރުގަ އެވެ. އަދި އެ އާއިލާގެ ދިރިއުޅުން ވެސް ވަނީ ލަންޑަށް ބަދަލުކޮށްފަ އެވެ.

ނަމަވެސް، މިދިޔަ މަހު ބައެއް މީޑިއާތަކަށް ދިން އިންޓަވިިއުތަކުގައި ސޯނަމް ބުނެފައި ވަނީ ފިލްމީ ދާއިރާއަށް އެނބުރި އައުމުގެ މަސައްކަތް ކުރާ ކަމަށެވެ. އަދި އޭނާ ދެން ކުޅޭ ފިލްމުގެ މަސައްކަތް އަންނަ އަހަރު ކުރީކޮޅުގައި ފަށާނެ ކަމަށް ވެސް ބުންޏެވެ.

ސޯނަމްގެ ފިލްމެއް އެންމެފަހުން ނުކުތީ މިދިޔަ އަހަރު އެވެ. އެއީ ތުރިލާ ފިލްމް "ބްލައިންޑް" އެވެ. އެކަމަކު، އެއީ އޭނާ ބަލިވެއިނުމުގެ ކުރިން ޝޫޓްކުރި ފިލްމެކެވެ. އެ ފިލްމަށް މާ ބޮޑު ތަރުހީބެއް ނުލިބެ އެވެ.

ރާއްޖެ އާއި އިންޑިއާގެ ގުޅުން ރަނގަޅުވުމުން ބޮލީވުޑްގެ ސެލެބްރިޓީން ޗުއްޓީ ހޭދަކުރަން ރާއްޖެ އަންނަ ވަރު މިހާރު ވަނީ އަނެއްކާވެސް އިތުރުވާން ފަށައިފަ އެވެ.