ފިނޭންސުން ވަކިކުރި މުވައްޒަފުން އެހެން އޮފީސްތަކަށް ބަދަލު ކޮށްފި

ފިނޭންސް މިނިސްޓްރީގެ 45 މަގާމެއް އުވާލައި އެ މަގާމުތަކުގައި ތިބި ބައެއް މުވައްޒަފުން އެހެން އޮފީސްތަކަށް ބަދަލުކޮށްފި އެވެ.

ފިނޭންސްގެ މުވައްޒަފުން ސަރުކާރުގެ އެހެން ބައެއް އިދާރާތަކަށް ބަދަލުކުރަން 2015 ވަނަ އަހަރު ނިންމުމުން އެ މައްސަލަ ވަރަށް ބޮޑަށް ހޫނުވި އެވެ. އެހެންވެ، ވަކި ހިސާބަކުން އެކަން ހުއްޓާލުމަށް ފަހު، އެ މިނިސްޓްރީގެ އިދާރީ އޮނިގަނޑު މުރާޖައާކޮށް، އާ އުސޫލެއް އެކުލަވައިލުމުގެ މަސައްކަތް މިދިޔަ އަހަރުގެ ކުރީކޮޅު ފެށި އެވެ.

އެ އޮނިގަނޑު އެކުލަވައިލީ، އެ މިނިސްޓްރީން ބުނި ގޮތުގައި، އެ އޮފީހުގެ ހިއުމަން ރިސޯސް އޮޑިޓެއް ހަދައި މަގާމުތައް މަދުކުރުމާ ބެހޭ ގޮތުން އެކި މުއައްސަސާތަކާ އެކު މަޝްވަރާ ކުރުމަށް ފަހު އެވެ.

އެ މިނިސްޓްރީގެ އިސް އޮފިޝަލަކު މިއަދު ވިދާޅުވީ އުވާލި މަގާމުތަކުގައި ތިބި ބައެއް މުވައްޒަފުން އެހެން އޮފީސްތަކުގައި މަސައްކަތް ކުރަން މިހާރު ނުކުންނަ ކަމަށެވެ. އަދި އެ މަސައްކަތް ކުރިޔަށް ގެންދަނީ ސިވިލް ސާވިސް ކޮމިޝަނާ ގުޅިގެން ކަމަށް ވެސް އޭނާ ވިދާޅުވި އެވެ.

"މިހާރު ބާކީ ތިބި މުވައްޒަފުން ވެސް ވަރަށް އަވަހަށް ބަދަލުވާނެ. އެއްވެސް މުވައްޒަފަކު އަޅުގަނޑުމެން މަގާމުން ވަކި ނުކުރަން،" އެ އޮފިޝަލް ވިދާޅުވި އެވެ.

އޭނާ ވިދާޅުވީ މުވައްޒަފުން ބަދަލުކުރުމުގެ ކަންތައްތައް މުޅިން ނިންމާލެވޭނެ ދުވަހެއް ދަންނަވަން ނޭނގޭ ކަމަށެވެ.

ފިނޭންސްގެ 45 މަގާމެއް އުވާލަން ނިންމި އިރު، އެ މިނިސްޓްރީގައި މަސައްކަތް ކުރަމުން ދިޔަ ވަގުތީ މުވައްޒަފުންތަކެއް ވަނީ މިދިޔަ ޖޫން މަހު ވަކިކޮށްފަ އެވެ. އެއީ ވެސް އެ ތަނުގެ މުވައްޒަފުންގެ އޮނިގަނޑަށް ގެނައި ބަދަލުގެ ދަށުން އެޅި ފިޔަވަޅެކެވެ.