އެފްއޭއެމްގެ ފައިސާއިން ބައްސާމް ގަތް ދެ ޕެންޓްހައުސް ފުލުހުންނާ ހަވާލުކުރަން އަންގައިފި

ހިޔާނާތާއި މަކަރާއި ހީލަތް ހެދުމާއި މަނީ ލޯންޑަރިންގެ ކުށުގެ ތުހުމަތުވާ އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް އެ އެސޯސިއޭޝަންގެ ފައިސާއިން ގަނެފައިވާ ދެ ޕެންޓްހައުސް ނުވަތަ އެޕާޓްމަންޓުތައް ފުލުހުންނާ ހަވާލުކުރަން ނޯޓިސް ފޮނުވައިފި އެވެ.

އެނގިފައިވާ ގޮތުގައި، އެ ނޯޓިސްގައި ވަނީ ހުޅުމާލޭގެ އަމިން އެވެނިއުގައި ހުންނަ ބައްސާމްގެ ދެ ޕެންޓްހައުސް އަންނަ އާދިއްތަ ދުވަހުގެ ކުރިން ފުލުހުންނާ ހަވާލުކުރަން އަންގައިފަ އެވެ. އެ ދުވަހުގެ ކުރިން އެ ތަންތަން ފުލުހުންނާ ހަވާލު ނުކޮށްފި ނަމަ، އެ އިދާރާގެ ބެލުމުގެ ދަށަށް އެ ތަންތަން ނަގާނެ އެވެ.

"އެ ދެ އެޕާޓްމަންޓް ފުލުހުންގެ ބެލުމުގެ ދަށަށް ނެގުމަށްޓަކައި ކުރަންޖެހޭ މަސައްކަތްތައް ފުލުހުން ގެންދަނީ ކުރަމުން،" ފުލުހުންގެ މީޑީއާ އޮފިޝަލް މިރޭ ވިދާޅުވި އެވެ.

ބައްސާމްގެ ދެ އެ ޕާޓްމަންޓް ފުލުހުންގެ ބެލުމުގެ ދަށަށް ގެންދަން ކޯޓުން އަމުރު ނެރުނީ މިދިޔަ ސެޕްޓެމްބަރު 28 ގަ އެވެ.

އަމީން އެވެނިއު އިން ބައްސާމް ގަތް އެ ދެ ޕެންޓްހައުސް ހުންނަނީ ވެސް ތަނުގެ އުސޫލާ ހިލާފަށް ގުޅުވާލައިފަ އެވެ.

ބައްސާމް އެ ދެ ޕެންޓްހައުސް ގަތީ ކޮވިޑުގެ ދުވަސްވަރު ފުޓްބޯޅަ ކްލަބްތަކަށް ދިމާވި މާލީ ދަތިތަކުން އަރައިގަތުމަށް އެފްއޭއެމުން، ފީފާ މެދުވެރިކޮށް ނެގި ލޯނު ފައިސާއިންނެވެ. އެ މައްސަލައިގައި އޭނާގެ މައްޗަށް ދައުވާކޮށްދޭން ފުލުހުން ވަނީ މިދިޔަ މަހު ޕީޖީ އޮފީހުގައި ވެސް އެދިފަ އެވެ.

ފުލުހުން ވަނީ މި މައްސަލައިގައި ބައްސާމުގެ އިތުރުން އެޕާޓްމަންޓް ވިއްކި އަމީން ކޮންސްޓްރަކްޝަނާއި އެފްއޭއެމްގެ އޭރުގެ ފައިނޭންސް ހެޑް މުހައްމަދު އަގީލާއި އެ އެސޯސިއޭޝަނުގައި އޭރު މަސައްކަތް ކުރި ހަސަން ވަހީދުގެ މައްޗަށް ވެސް ދައުވާކޮށްދޭން އެދިފަ އެވެ.

އަމީން ކޮންސްޓްރަކްޝަނުން ތަރައްގީކޮށްފައިވާ އަމީން އެވެނިއު އިން ދެ ޕެންޓްހައުސް ގަތުމަށް އެފްއޭއެމްގެ ފައިސާއިން އެއް މިލިއަން އެމެރިކާ ޑޮލަރު އެ ކުންފުންޏަށް ބައްސާމް ދައްކާފައިވާ ކަމަށް ފުލުހުން ކުރިން ބުނެފައިވެ އެވެ. އަދި އެ ޑޮލަރަށްވާ ދިވެހި ފައިސާ އަމީން އިން އެފްއޭއެމަށް ދައްކާފައިނުވާ ކަމަށާއި ނަމަވެސް ދެއްކި ކަމަށް ހެދުމަށްޓަކައި ލިޔެކިޔުން ތައްޔާރުކޮށްފައިވާ ކަމަށް ފުލުހުން ބުނެފައިވެ އެވެ.

އެފްއޭއެމުން ވެސް އެ ފައިސާ ލިބުނު ކަމަށް ހެދުމަށްޓަކައި ކުންފުންޏަކުން ލޯނެއް ނަގާފައިވާ ކަމަށާއި އެ އަދަދާއި، އަމީން އިން އެފްއޭއެމަށް ފައިސާ ދެއްކި ކަމަށް ބުނެ ތައްޔާރުކޮށްފައިވާ ރަސީދުގައިވާ އަދަދާ ދިމާވާ ކަމަށް ވެސް ފުލުހުން ބުންޏެވެ.

އެހެންވެ، ފުލުހުން ބުނި ގޮތުގައި، ބެލެވެނީ އެފްއޭއެމުން މަސައްކަތްކޮށްފައި ވަނީ ބައްސާމް އެޕާޓްމަންޓް ގަތުމަށް އަމީން އަށް ޑޮލަރުން ދެއްކި ފައިސާއަކީ ފީފާއިން ދިން ޑޮލަރު މާރުކުރަން ދިން ފައިސާއެއްކަން ދެއްކުމަށެވެ.

ފުލުހުން ބުނީ އެއް މިލިއަން ޑޮލަރަކީ ކޮވިޑުގައި ކްލަބްތަކަށް ދިމާވި މާލީ ދަތިކަން ހައްލުކޮށްދޭން ކަމަށް ބުނެ ފީފާ އަތުން އެފްއޭއެމް ނެގި 1.9 މިލިއަން ޑޮލަރުގެ ކޮވިޑް ރިލީފް ލޯނުގެ ފައިސާކަން ތަހުގީގަށް ފާހަގަވެފައިވާ ކަމަށެވެ.

އެފްއޭއެމްގެ އެކައުންޓުން ބައްސާމް އޭނާގެ އަމިއްލަ އެކައުންޓަށް 10،000 ޑޮލަރު ޖަމާކޮށް، އެ ފައިސާއަށް ހިޔާނާތްތެރި މައްސަލައިގައި ވެސް އޭނާގެ މައްޗަށާއި އަގީލްގެ މައްޗަށް ދައުވާކޮށްދޭން ޕީޖީ އޮފީހަށް މި އަހަރުގެ ކުރީކޮޅުގައި ފުލުހުން ވަނީ ހުށަހަޅައިފަ އެވެ.

ފުލުހުން ބުނެފައިވާ ގޮތުގައި، އެފްއޭއެމަށް ބޭރުގެ ފަރާތްތަކުން އެހީގެ ގޮތުގައި ދޭ ޑޮލަރު އެ އެސޯސިއޭޝަނުގެ އިސްވެރިންނާއި އެސޯސިއޭޝަނާ ގުޅުން އޮންނަ ފަރާތްތަކާއި ކުންފުނިތަކުގެ އެކައުންޓަށް ޖަމާކޮށް ނަހަމަ ގޮތުގައި ބޭނުންކޮށް މަނީ ލޯންޑަރިންގެ އަމަލުތައް ހިންގުމުގެ އެތައް މައްސަލައެއް މިދިޔަ އަހަރުގެ އޮކްޓޫބަރުން ފެށިގެން އަންނަނީ ތަހުގީގުކުރަމުންނެވެ.