ބާސްކެޓްބޯޅައިގެ ހުނަރާއި ފެންވަރު އެބަހުރި، އަނެއް ހަރުފަތަށް އަރަން ބޭނުންވަނީ ވަސީލަތް: ގުރޭ

ރާއްޖޭގެ ބާސްކެޓްބޯޅައިގައި ހުނަރާއި ފެންވަރު އެބަހުރި ކަމަށާއި އެކަމަކު އަނެއް ހަރުފަތަށް ދާން ބޭނުމީ ވަސީލަތްކަމަށް، ކުއީންސް ބާސްކެޓްބޯޅަ ކްލަބްގެ ކޯޗު ގުރައިޝް އަފްރާހު ބުނެފި އެވެ.

މިދިޔަ ހޯމަ ދުވަހުގެ ރޭ، މާލޭގައި ނިމުނު، އިންވިޓޭޝަނަލް ކްލަބް މުބާރާތުގެ ފައިނަލަށް ކުއީންސް ގެންގޮސް ދިނެވެ. އެކަމަކު ފައިނަލުގައި އެ ޓީމު ބަލިވީ ރާއްޖޭގެ ގައުމީ ޓީމުގެ ކުރީގެ ކޯޗު ސުޕުން ވިމާލް އިރުޝާދު ދިން ލަންކާގެ ކްލަބް، އީގަލްސް އަތުންނެވެ.

ސުޕުންގެ ދަށުން އެސިސްޓެންޓް ކޯޗުގެ ގޮތުގައި ގައުމީ ޓީމުގައި މަސައްކަތް ކުރި ގުރޭ ބުނީ ރާއްޖޭގެ ފަސްގަނޑުގައި ތަށި ނުބެހެއްޓުމަކީ ލިބުނު ދެރައެއް ކަމަށެވެ. އެކަމަކު މުޅި މުބާރާތުގައި ވެސް އޭނާގެ ކުޅުންތެރިން ކުރި މަސައްކަތާ މެދު ހިތްހަމަޖެހޭކަމަށް އޭނާ ބުންޏެވެ.

"ތަށި ގެއްލުނީމަ މާޔޫސްވި. އެކަމަކު މި ކުޅުންތެރިން ވަރަށް މަސައްކަތް ކުރި. މުބާރާތަށް ތައްޔާރުވާން ވެސް ވަރަށް ބުރަކޮށް މަސައްކަތް ކުރި،" އޭނާ ބުންޏެވެ.

ހަންގޭރީން ބާސްކެޓް ކޯޗިންގެ ކޯހެއް ފުރިހަމަ ކުރި ގުރޭ ބުނީ ރާއްޖޭގެ ބާސްކެޓްބޯޅައިގައި މިހާރު ހުނަރުވެރި ކުޅުންތެރިން އެބަތިބި ކަމަށެވެ. އެކަމަކު އަނެއް ހަރުފަތަށް ގެންދަން ދެން ބޭނުމީ ވަސީލަތްކަމަށް އޭނާ ބުންޏެވެ.

"އަޅުގަނޑުމެންގެ ތްރީ ޕޮއިންޓް ޝޫޓިން ވެސް މި ރީޖަންގެ މުބާރާތްތަކުގައި ރަނގަޅު ވާނެ. ޕްރީ ސީޒަންގައި ވެސް އަޅުގަނޑުމެން ކުޅުންތެރިން 3000 ޝޫޓް އެބަ ކުރޭ ޓްރޭނިންގަ. މުބާރާތްތެރޭގައި 1000 ޝޫޓް (ޓްރޭނިންގައި) ކުރޭ،" އޭނާ ބުންޏެވެ.

މިދިޔަ އަހަރުގެ އިންޑިއަން އޯޝަން އައިލެންޑް ގޭމްސްގައި ވެސް ރާއްޖޭގެ ކޯޗިން ޓީމު ގައި މަސައްކަތް ކުރި ކޯޗު ބުނީ ޓްރޭނިންގައި ވެސް ދިމާވާ އެންމެ ބޮޑު މައްސަލައަކީ ވަސީލަތް ނެތުން ކަމަށެވެ. ރާއްޖޭގެ ޓީމުތައް ޕްރެކްޓިސް ކުރަނީ އައުޓްޑޯގަ އެވެ.

"އައުޓްޑޯގައި ޓްރޭން ކުރާއިރު މޫސުން ހުންނަ ގޮތުން ޓްރޭނިން ކުރިއަކަށް ނުގެންދެވޭނެ،" އޭނާ ބުންޏެވެ.

ރާއްޖޭގައި އިންޑޯ ކުޅިވަރަށް ހާއްސަކޮށް ހުރީ ސޯޝަލް ސެންޓަރުގެ އިންޑޯ ހޯލް އެކަންޏެވެ. ތިން ކުޅިވަރަކުން ގަވާއިދުން މިހާރު ވެސް އިންޑޯ ބޭނުން ކުރެ އެވެ.

ކުއީންސް އަށް ޑޮމެސްޓިކް މުބާރާތްތަކުގައި ކާމިޔާބު ހޯދައިދިން ގުރައިޝް ބުނީ ބާސްކެޓްބޯޅައިގެ ހުނަރުވެރި ގިނަ ކުޅުންތެރިންތަކެއް އެބަތިބި ކަމަށެވެ. އަދި ފެންވަރު ވެސް އެބަހުރި ކަމަށް އޭނާ ބުންޏެވެ.

"ހަމަ މި ލެކް ވަނީ ފެސިލިޓީސް،" ގުރޭ ބުންޏެވެ.

ގާތްގަނޑަކަށް 22 އަހަރަށް ފަހު ބާސެކްޓްބޯޅަ ކުޅުން ހުއްޓާލި ފާތިމަތު ރިޝްމާ ވެސް ބުނީ ރާއްޖޭގެ ބާސްކެޓްބޯޅަ އެހެން ހަރުފަތަކަށް ގެންދިއުމުގެ ފެންވަރު މިހާރުގެ ޖީލުގައި އެބަހުރި ކަމަށެވެ.

ގުރޭ ވެސް ބުނީ ދާއިމީކޮށް އިންޑޯގައި ތަމްރީނު ކުރެވި މުބާރާތްކުގައި ވާދަކުރަން ފެށުމުން އެ ތަފާތު ފެންނާނެ ކަމަށެވެ.