އެމްޑީޕީ އަށް މާލީ ބާރުވެރިކަން ހޯދަން ރިއަލް އެސްޓޭޓް ވިޔަފާރިއަށް ވަންނަނީ!

ޕާޓީގެ ހިންގުން ހަރުދަނާކޮށް، މާލީ ގޮތުން ބާރުވެރިކުރުވުމަށް ވިޔަފާރީގެ ތެރެއަށް ނުކުތުމަށް އެމްޑީޕީގެ ގައުމީ މަޖިލީހުން ރޭ ފާސްކޮށްފި އެވެ.

ރޭގެ ބައްދަލުވުމުގައި ލީޑަޝިޕުން ހުށަހެޅި ގަރާރުގައި ވަނީ އިލެކްޝަންސް ކޮމިޝަނުން ޕާޓީތަކަށް ދޫކުރާ ފައިސާއަކީ ހަރުދަނާ ގޮތެއްގައި ހިންގުމަށް އެކަށީގެންވާ އަދަދެއް ކަމަށް ނުވާތީއާ އެކު، ގާނޫނުގެ ތެރެއިން ފަހިކޮށްދީފައިވާ ގޮތުގެ ވިޔަފާރިއެއް ފެށުމަށް ހުށަހަޅައިފަ އެވެ.

ޕާޓީގެ ޗެއާޕާސަން ފައްޔާޒް އިސްމާއީލް ވިދާޅުވީ، އެމްޑީޕީ އުފައްދައި 19 އަހަރު ވީއިރު، އެއީ މާލީ ގޮތުން އަމިއްލަ ފައިމައްޗަށް ތެދުވެވިފައިވާ ޕާޓީއެއް ނޫން ކަމަށެވެ.

"ޕާޓީ ހަރުދަނާ ގޮތުގައި ކުރިއަރުވައި ގެންދިއުމަށްޓަކައި ވަރަށް ބައިވަރު ފައިސާ ހަގީގަތުގައި ބޭނުންވޭ. މިވަގުތު އަޅުގަނޑުމެން ޕާޓީ އަށް 19 އަހަރު ވެގެންދިޔައިރު އަޅުގަނޑުމެންނަށް އަމިއްލަ ފައިމައްޗަށް ތެދުވުމަށްޓަކައި މާލީ ކަމާއި ތަނަވަސްކަން ހޯދިފައި ނެތް،" ކުރީގެ އިކޮނޮމިކް މިނިސްޓަރުކަން ވެސް ކުރެއްވި ފައްޔާޒް ވިދާޅުވި އެވެ.

އޭނާ ވިދާޅުވީ، ސިޔާސީ ޕާޓީތަކުން ވިޔަފާރިކުރުމަށް ސިޔާސީ ޕާޓީތަކާ ބެހޭ ގާނޫނުން ޖާގަ ދީފައިވާ ކަމަށާއި އެފަދަ ވިޔަފާރިތައް ކުރުމަށް ގާނޫނީ ނިޒާމެއް ހޯދޭނެ ކަމަށް ގަބޫލު ކުރައްވާ ކަމަށެވެ.

ސިޔާސީ ޕާޓީތަކުގެ ގާނޫނުން އެ ޖާގަ ދިން ނަމަވެސް، ވިޔަފާރިކުރުމާ ބެހޭ ގާނޫނުތަކުން ސާފުނުވާ ކަމަށާއި އެކަން ކުރުމަށް ގާނޫނީ ގޮތުން ބަލަންޖެހޭ ގިނަ ކަންކަން އަދި އެބަހުރި ކަމަށް ފައްޔާޒް ވިދާޅުވި އެވެ.

"އަޅުގަނޑު ގަބޫލުކުރާ ގޮތުގައި ކުންފުނީގެ ގާނޫނުން އެ ޖާގަ ލިބޭ، ސިޔާސީ ޕާޓީއަކަށް ކުންފުންޏެއް އުފެއްދުމަކަށް ހުރަހެއް ނެތް. އެކަމަކު ސަރުކާރުގައި ތިބި އެކަމާ ބެހޭ ބޭފުޅުން އެކަން ނުކޮށްދެއްވައިފި ނަމަ އެކަން ކުރެވޭނެ ގޮތެއް ނެތް،" ފައްޔާޒް ވިދާޅުވި އެވެ.

އޭނާ ވިދާޅުވީ ވަރަށް އަވަހަށް ރިއަލް އެސްޓޭޓް ވިޔަފާރިގެ ތެރެއަށް ޕާޓީން ވަނުމަށް ކަމަށާއި އެކަން ކުރެވޭނެ ގޮތެއް ހޯދަން ޖެހޭ ކަމަށެވެ. އެކަމަކު، އެކަން ކުރެވޭނެ ގޮތްތައް ދެން ބާއްވާ ގައުމީ މަޖިލިހުގެ ޖަލްސާއަކަށް ހުށަހަޅުއްވާނެ ކަމަށް ފައްޔާޒު ވިދާޅުވި އެވެ.

ރޭގެ ބައްދަލުވުމުގައި ވަނީ ސިޔާސީ ދާއިރާ އަށް މީހުން ބިނާ ކުރުމަށް އެކަޑެމީއެއް ފެށުމަށް ވެސް ގަރާރެއް ފާސްކޮށްފަ އެވެ.

ފައްޔާޒް ވިދާޅުވިގޮތުގައި، ސިޔާސީ މައިދާނަށް ނުކުންނަން ތިބި މީހުންނަކީ ގާބިލް، ސިޔާސީ ކަންކަމަށް ރަނގަޅަށް ރޯފިލާފައި ތިބި ބަޔަކަށް ހެދުމަށް މިއީ މުހިންމު ކަމެއް ކަމަށެވެ. އެކަން ކުރަން ބޭނުންވަނީ މިނިވަން ގޮތުގައި އެހެން ޕާޓީތަކުގެ މީހުންނަށް ވެސް ތަމްރީނު ދެވޭނެ ފަދަ ގޮތަކަކަށް ކަމަށް އޭނާ ވިދާޅުވި އެވެ.

ސިޔާސީ ޕާޓީއަކުން އެކަޑެމީއެއް ހިންގުމަށް ގާނޫނުން ފުރުސަތު ލިބޭކަން ސާފު ނުވާ ކަމަށާއި އެ ފުރުސަތު ސަރުކާރުން ނުދީފި ނަމަ ޕާޓީގެ ލީޑަޝިޕްގެ ޕްރޮކްސީއެއްގެ ދަށުން އަމިއްލަ ބޭފުޅެއްގެ ނަމުގައި އެކަން ކުރަން ވެސް ޖެހިދާނެ ކަމަށް ފައްޔާޒް ވިދާޅުވި އެވެ.

އެމްޑީޕީން އެކުލަވައިލި މަގުޗާޓުގައިވާ ގޮތުން ރަނގަޅު ސިޔާސަތުތަކެއް ނެރެ ކުރިއެރުވުމަށްޓަކައި، ތިންކް ޓޭންކެއް އެކުލަވާލުމަށް ވެސް ރޭ ވަނީ ފާސްކޮށްފަ އެވެ.

ފައްޔާޒް ވިދާޅުވީ، މިވަގުތު އެންމެ ބޮޑު އަމާޒަކީ ޕާޓީ ވަރުގަދަ ކުރުން ކަމަށާއި ޕާޓީގެ ފަލްސަފާ ވަކި ބަޔަކަށް ޕްރޫވްކޮށްދިނުން ނޫން ކަމަށެވެ. އެކަން ކުރަން ޖެހުނު ކޮންމެ މަގަކުން އެކަން ކުރާނެ ކަމުގެ ޔަގީންކަން އޭނާ ދެއްވި އެވެ.