ފުރަތަމަ ބައްޔަށް ފަހު މޮރީނިއޯ ޕްރެސް ކޮންފަރެންސަށް ހާޒިރެއް ނުވި

އިސްތަންބޫލް (ސެޕްޓެމްބަރު 25) – އިސްތަންބޫލް ޑާބީގައި ގަލަތަސަރާއީ އަތުން ބަލިވި މެޗަށް ފަހު ފެނަބާޗޭގެ ކޯޗު ހޯޒޭ މޮރީނިއޯ ޕްރެސް ކޮންފަރެންސަށް ހާޒިރު ނުވި މައްސަލަ ފެންމަތިވެއްޖެ އެވެ.

ތުރުކީގެ ފުޓްބޯޅައިގައި އެންމެ ވާދަވެރި ކުރިމަތިލުމުން، މޮރީނިއޯގެ ފެނަބާޗޭ ބަލިވީ 3-1 ންނެވެ. މިއީ އެ ގައުމުގެ ސުޕަ ލީގުގައި އޭނާ އަށް ކުރިމަތިވި ފުރަތަމަ ބައްޔެވެ.

މޮރީނިއޯ ބުނީ ޕްރެސް ކޮންފަރެންސަށް ހާޒިރު ނުވުމުގެ އެއް ވެސް ވިސްނުމެއް އޭނާ ނުގެންގުޅޭ ކަމަށެވެ. އެކަމަކު ޕްރެސް ކޮންފަރެންސުގެ އިންތިޒާރުގައި އެއް ގަޑިއިރަށް ވުރެ ގިނަ އިރު ވަންދެން މަޑުކޮށްގެން ހުންނަން ޖެހުނު ކަމަށް އޭނާ ބުންޏެވެ.

ޕްރެސް އަށް ހާޒިރު ނުވީ މެޗުން ބަލިވުމުން ޕްރެޝަރު ހިންދާލުމުގެ ގޮތުން ކަމަށް ތުރުކީގެ މީޑިއާތަކުން އޭނާގެ މައްޗަށް ތުހުމަތު ކުރެ އެވެ. އެކަމަކު މޮރީނިއޯ އެކަން ދޮގު ކުރެ އެވެ.

"ފުޓްބޯޅަ (ކޯޗިން) ގައި އަހަރެން މި ހޭދަކުރި 24 އަހަރު ތެރޭ ޕްރެސް ކޮންފަރެންސުން ސަލާމަތް ވާން އެއްވެސް ކަމެއް ކޮށްފައެއް ނުވާނެ. ހާއްސަކޮށް ބަލިވާ މެޗުތަކަށް ފަހު،" މޮރީނިއޯ ބުންޏެވެ.

"އަހަރެން ޖެހިލުންވާ އެއްވެސް ނޫސްވެރިއެއް ނެތް. އަހަރެން ޖެހިލުންވާ ސުވާލެއް ވެސް ނެތް. އެހެންވީމަ އަހަރެން އެކަމުން ސަލާމަތްވާން ކުރަން ޖެހޭނެ އެއް ވެސް ކަމެއް ނޯންނާނެ."

އޭނާ ބުނީ ޕްރެސް ރޫމް ދޮރުމަތީގައި މަޑުކޮށްގެން ހުރި އިރު ވެސް އެތެރެއަށް ވަނުމުގެ ހުއްދަ އޭނާ އަށް ނުދިން ކަމަށެވެ. އެހާ ގިނަ ވަގުތު މަޑުކޮށްގެން ހުރި އިރު ވެސް އެ ފުރުސަތު ނުދިނުމަކީ އެކަމަށް އިންތިޒާރުކޮށްގެން ހުންނަ މީހާ އަށް ކުރެވޭ ބޭއިހްތިރާމެއް ކަމަށް މޮރީނިއޯ ބުންޏެވެ.

"ހަތްދިހަ މިނެޓް ވަންދެން އަހަރެން މަޑުކުރަން ޖެހުނު. އަހަންނަށް މައާފު ކުރޭ. އެކަމަކު އެއީ ވަރަށް ބޮޑު ބޭއިހްތިރާމެއް. އެއްވެސް މީހަކަށް އިޙްތިރާމް ގެއްލިފައިވާކަމުގެ އިހްސާސް ކުރެވުނު ނަމަ އިހްތިރާމް ކުޑަކަމުގެ އިޙްސާސް ކުރެވުނު މީހަކީ އަހަރެން،" އޭނާ ބުންޏެވެ.

އެއް ވަނައިގައި އޮތް ގަލަތަސާރާއީ އަށް ވުރެ ޕޮއިންޓް ފަހަތުގައި އޮތް ފެނަބާޗޭ އޮތީ ތާވަލުގެ ދެ ވަނައިގަ އެވެ.