ރިސޯޓްތައް ރީޑިވަލޮޕް ކުރަން ދޭ މުއްދަތުތަކަށް ބަދަލު ގެނެސްފި

ރިސޯޓްތައް ރީ ޑިވެލޮޕްކުރަން ދޭ މުއްދަތުތަކަށް ސަރުކާރުން މިއަދު ބަދަލުތަކެއް ގެނެސްފި އެވެ.

ރިސޯޓްތައް ރީޑިވެލޮޕް ކުރަން މުއްދަތު ދިނުމާއި އެ މުއްދަތަށް ކުއްޔާއި ޖޫރިމަނާ ފަސްކޮށް ދިނުމުގެ ގަވާއިދު ކުރިން އޮންނަ ގޮތުން ރިސޯޓްތައް ރީޑިވެލޮޕް ކުރަން ދެވޭނީ ގިނަވެގެން ދެ އަހަރެވެ. ނަމަވެސް އެ މުއްދަތު އިތުރުކުރަން އެދި ހުށަހަޅައިފިނަމަ އިތުރު އެއް އަހަރުގެ މުއްދަތެއް ކުރިން އިތުރުކޮށް ދެވެ އެވެ.

ނަމަވެސް ސަރުކާރުން މިއަދު ގެނައި އިސްލާހުގައިވާ ގޮތުން ރީޑިވެލޮޕްމަންޓަށް އާންމު އުސޫލުން ދެވޭނީ ގިނަވެގެން ތިން އަހަރުގެ މުއްދަތެކެވެ. ނަމަވެސް މުޅި ތަން އެކީގައި ތަޅާލުމަށްފަހު އަލުން އެއްކޮށް ތަރައްގީ ކުރާނަމަ ތިން އަހަރާއި ހަ މަހަށް ވުރެ ދިގު ނޫން މުއްދަތެއް ދެވޭނެ ކަމަށް އެ އިސްލާހުގައިވެ އެވެ.

އެ އިސްލާހުގައިވާ ގޮތުން ކަނޑައަޅާފައިވާ މުއްދަތުގައި ރިސޯޓް ހިންގަން ނުފަށައިފި ނަމަ، އެތަނުގައި މަސައްކަތް ކުރުމަށް ބޭނުންވާ ތަކެއްޗާއި މަސައްކަތްތެރިން އެ ތަނުގައި ތިބިކަމުގެ އިގްރާރެއް ހުށަހެޅުމުން މުއްދަތު އިތުރުކޮށް ދިނުމުގެ އިހްތިޔާރު ޓޫރިޒަމް މިނިސްޓްރީއަށް އޮންނާނެ އެވެ. އަދި އެ މިނިސްޓްރީން އެކަން ބަލާއިރު، އިގްރާރުގައި ބަޔާން ކޮށްފައިވާ ގޮތާ ހިލާފަށް އަމަލު ކޮށްފައިވާ ކަން ފާހަގަ ކުރެވިއްޖެ ނަމަ، ހުއްދަ ބާތިލު ކުރުމުގެ ބާރު ވެސް މިނިސްޓްރީއަށް އޮންނާނެ ކަމަށް އެ އިސްލާހުގައިވެ އެވެ.

މީގެ އިތުރުން ރީޑިވެލޮޕްމަންޓަށް މުޅި ރިސޯޓް ބަންދު ކުރާނަމަ އެ މުއްދަތުގެ ކުލި ފަސްކޮށް ދިނުމުގެ އިހްތިޔާރު އެ މިނިސްޓްރީއަށް ލިބިފައިވާ ކަމަށް އެ އިސްލާހުގައިވެ އެވެ. ނަމަވެސް ރީ ޑިވަލޮޕްމެންޓްގެ މުއްދަތު ހަމަވުމުން އެތަނެއްގެ ކުލި ހިނގަން ފަށާނެ ކަމަށް އިސްލާހުގައިވެ އެވެ.