ނޯޓިލަސް ފައުންޑޭޝަނުން ހަތަރު ދާއިރާއަކުން ސްކޮލަޝިޕްގެ ފުރުސަތު ހުޅުވާލައިފި

ރާއްޖެ ކުރިއެރުވުމަށް ބޭނުންވާ ބައެއް ދާއިރާތައް ހިމެނޭ ސްކޮލަޝިޕްތަކަކަށް ކުރިމަތިލުމުގެ ފުރުސަަތު ދަ ނޯޓިލަސް ފައުޑޭޝަނުން މިއަދު ހުޅުވާލައިފި އެވެ.

ރާއްޖޭގައި ތައުލީމާއި ޕްރޮފެޝަނަލް ޑިވެލޮޕްމަންޓް ކުރިއެރުވުމަށް ހާއްސަ ދަ ނޯޓިލަސް ފައުންޑޭޝަނުން ނެރުނު ނޫސްބަޔާނެއްގައި ބުނީ، ގައުމުގެ ތަރައްގީ އަށް ކޮންމެހެން ބޭނުންވާ މުހިންމު ދާއިރާތަކުގެ ހުނަރުވެރިން ތަރައްގީ ކުރުމަށް އަމާޒުކޮށްގެން ހުރިހާ ހަރަދެއް ހަމަޖައްސައިދޭ ހަތަރު ސްކޮލަޝިޕްގެ ފުރުސަތު މިހާރު ތައާރަފުކޮށްފައިވާ ކަމަށެވެ.

އެ ސްކޮލަޝިޕްތަކުން ޔަގީން ކޮށްދެނީ ދެމެހެއްޓެނިވި ކުރިއެރުމަށާއި ދުނިޔޭގެ ވާދަވެރިކަމަށް ބޭނުންވާ ހުނަރާއި އިލްމު ދިވެހި ޒުވާނުންނަށް ފޯރުކޮށްދިނުމަށް ފައުންޑޭޝަންގެ ދެމިއޮތް ވައުދު ކަމަށް ވެސް އެ ބަޔާނުގައި ބުންޏެވެ.

މި އަހަރު ސްކޮލަޝިޕްގެ ފުރުސަތު ދޭ ހަތަރު ދާއިރާއަކީ؛

• ޑޮކްޓަރީކަން (މެޑިސިން).

މެޑިކަލް ސްޕެޝަލައިޒޭޝަން ސްކޮލަޝިޕްގެ މަގުސަދަކީ ސިއްހީ ދާއިރާގެ ފަރާތްތައް ބޭނުންވާ ހާއްސަ ތަމްރީނު ހޯދުމުގެ ފުރުސަތު ފަހިކޮށްދީގެން ސިއްހީ ދާއިރާ ތަރައްގީ ކުރުމަށް އެހީތެރިވެދިނުން.

• އެއާކްރާފްޓް އިންޖިނިއަރިން.

އެއާކްރާފްޓް މެއިންޓެނަންސް ލައިސަންސް ޕްރޮގްރާމް ނުވަތަ އީއޭއެސްއޭ ޕާޓް 66 ސްކޮލަޝިޕުން ދަރިވަރުންނަށް އެއާކްރާފްޓް މެއިންޓެނަންސް އިންޖިނިއަރުންގެ ގޮތުގައި ސެޓިފައިވެ، އެ ދާއިރާގައި ކުރިއަށް ދިއުމަށް ބޭނުންވާ ތަމްރީނާއި ތަޖުރިބާ ލިބޭނެ.

• ނޫސްވެރިކަން.

މާސް ކޮމިއުނިކޭޝަންސް އަންޑަގްރެޖުއޭޓް ޑިގްރީ ސްކޮލަޝިޕަކީ ނޫސްވެރިންނާއި މީޑިއާ ޕްރޮފެޝަނަލުން ބާރުވެރިކޮށް، ހާމަކަން ބޮޑު މުޖުތަމައެއްގެ ބިންގާ ހަރުދަނާކުރުމަށް ފަރުމާކޮށްފައިވާ ސްކޮލަޝިޕެއް.

• ފަންނީ ކެއްކުމުގެ ދާއިރާ.

ކޮމާޝަލް ކޫކަރީ އިން ސެޓްފިކެޓް ތިނެއްގެ ސްކޮލަޝިޕް ފަރުމާކޮށްފައި ވަނީ ރާއްޖޭގެ ފަތުރުވެރިކަމުގެ ދާއިރާގައި ކަލިނަރީ ޕްރޮފެޝަނަލުންނަށް ވުމަށް ޝައުގުވެރިވާ ފަރާތްތައް އިލްމާއި އަމަލީ ތަޖުރިބާ ލިބޭނެ ގޮތަށް.

އެ ޕްރޮގްރާމްތައް ފަރުމާކޮށްފައި ވަނީ މުހިންމު ދާއިރާތަކުން ތަޖުރިބާ ހޯދައިދީ، އެ ދާއިރާތަކުން ޒުވާނުންނަށް މުސްތަގުބަލު ބިނާކުރުމަށް ފުރުސަތު ހޯދައިދިނުމަށް ކަމަށް އެ ފައުންޑޭޝަނުން ބުންޏެވެ.

ނޯޓިލަސް ފައުންޑޭޝަންގެ މަގުސަދަކީ މި ސްކޮލަޝިޕްތައް ކޮންމެ އަހަރަކު ވެސް ދިނުމެވެ.

"އޭގެ ބޭނުމަކީ ޒިންމާދާރު ތައުލީމީ ދަރިންތަކެއް މުޖުތަމައަށް ނެރެދީ، ގައުމީ ތަރައްގީގެ ލަނޑުދަނޑިތައް ހާސިލުކުރުމުގައި އެހީތެރިކަން ފޯރުކޮށްދިނުމެވެ،" އެ ފައުންޑޭޝަނުން ބުންޏެވެ.

އެ ސްކޮލާޝިޕްތަކަށް ޝައުގުވެރިވާ މީހުން ނޯޓިލަސް ފައުންޑޭޝަންގެ ވެބްސައިޓުން މައުލޫމާތު ސާފުކޮށް އިރުޝާދީފައިވާ ގޮތަށް އެޕްލިކޭޝަން ހުށަހެޅުމަށް ވަނީ އެދިފަ އެވެ.

ނޯޓިލަސް ފައުންޑޭޝަނަކީ ގައުމަށް އަގުހުރި ހިދުމަތްތަކެއް ކޮށްދެއްވާފައިވާ ޑރ. އިބްރާހީމް މަނިކުގެ ހަނދާނާއި ޒިކުރާ އާކުރުމުގެ ގޮތުން އުފައްދާފައިވާ ޖަމިއްޔާއެކެވެ.