އަމީރު އަހުމަދު ސްކޫލްގައި އިޖުތިމާއީ ހަރަކާތްތައް ހިންގަނީ

އަމީރު އަހުމަދު ސްކޫލުން އޭޖްޑް ކެއާ މޯލްޑިވްސްއާ އެކު އިޖުތިމާއީ ހަރަކާތްތައް ހިންގަން އެއްބަސްވެއްޖެ އެވެ.

މިއީ، އެ ސްކޫލުގެ 40 ވަނަ އަހަރީ ދުވަހާ ގުޅިގެން މުޖުތަމައަށް ފައިދާކުރަނިވި މަސައްކަތްތައް ކުރަން އިސްނަގައިގެން ފެށި ކަމެކެވެ.

މި އިނިޝިއޭޓިވްގެ ދަށުން އުމުރުން ދުވަސްވީ މީހުންގެ ނަފްސާނީ އަދި ޖިސްމާނީ ދުޅަހެޔޮކަމާ ގުޅޭ އެކި ޕްރޮގްރާމުތައް އޭޖްޑް ކެއާ މޯލްޑިވްސްއިން އަމީރު އަހުމަދު ސްކޫލުގައި ހިންގާނެ އެވެ. އަދި އެ ތަނުގައި ހުރި ފެސިލިޓީތައް ބޭނުންކޮށް, އުމުރުން ދުވަސްވީ ފަރާތްތަކުގެ މެދުގައި ގުޅުން ބަދަހިކޮށް ކޮމިއުނިޓީއެއް ބިނާ ކުރުމުގައި އެހީތެރިވެދޭނެ އެވެ.

އަމީރު އަހުމަދު ސްކޫލުން ބުނި ގޮތުގައި މީގެ ސަބަބުން އެކި އުމުރުގެ ފަރާތްތަކުން އުމުރުން ދުވަސްވީ ފަރާތްތަކާ އެކު އޮންނަ ގުޅުން ވެސް އިތުރަށް ބަދަހިވެގެން ދާނެ އެވެ. އަދި އެ ސްކޫލުން ފަށާ މި އިޖުތިމާއީ މަސައްކަތަކީ ތައުލީމީ މަރުކަޒުތަކުން އެ ތަންތަނުގައި ހުރި ވަސީލަތްތަކުގެ ބޭނުން ހެޔޮގޮތުގައި ހިފައި، މުޖުތަމައު ބިނާ ކުރުމުގައި އެ ވަސީލަތްތަކުގެ ބޭނުން ހިފޭނެ ގޮތުގެ ރަނގަޅު މިސާލެއް ކަމަށާއި އުއްމީދަކީ އެ ސްކޫލުން މި ފަށާ މަސައްކަތް އިތުރު ސްކޫލުތަކުން ވެސް ކުރިއަށް ގެންދިއުން ކަމަށް ބުންޏެވެ.

އަމީރު އަހުމަދު ސްކޫލުގެ ޕްރިންސިޕަލް އައިޝަތު އަހުލާމް ވިދާޅުވީ އޭޖްޑް ކެއާ މޯލްޑިވްސްއާ އެކު ފަށަން ނިންމާފައިވާ މަސައްކަތަކީ އެ ސްކޫލުން ރާވާފައި ހުރި އިޖުތިމާއީ މަސައްކަތްތަކުގެ ފެށުން ކަމަށެވެ. އަދި އިޖުތިމާއީ މަސައްކަތްތައް ހަރުދަނާކޮށް, މުޖުތަމައަށް ފައިދާކުރަނިވި މަސައްކަތްތައް ކުރުމުގައި އެކި އެންޖީއޯތަކާ ގުޅިގެން މަސައްކަތްކުރަން އެ ސްކޫލުން ފުރުސަތު ދޭނެ ކަމަށް ވެސް ވިދާޅުވި އެވެ.

އޭނާ ވިދާޅުވި ގޮތުގައި އުމުރުން ދުވަސްވީ ފަރާތްތައް ހިތްހަމަޖައްސާލައި ގުޅުން ބަދަހިކޮށް, އުފާވެރި, މަޖާ ވަގުތުކޮޅެއް ހޭދަކޮށްލާނެ ތަނެއް ދިނުމަކީ މުހިންމުކަމެކެވެ. އަދި އޭޖެޑް ކެއާ މޯލްޑިވްސްއާ އެކު ފަށާ ޕްރޮގްރާމުން ހެޔޮ ބަދަލު ފެންނާނެ ކަމަށް އުއްމީދުކުރައްވާ ކަމަށް ވެސް ވިދާޅުވި އެވެ.

އެޖޭޑް ކެއާ މޯލްޑިވްސް އިން އަމީރު އަހުމަދު ސްކޫލާ އެކު ގާއިމުކުރި ޕާޓްނާޝިޕަކީ މުހިންމު މަސައްކަތްތަކެއް ފެށުންކަން ސިފަކުރައްވައި, އެ އެންޖީއޯއިން ވަނީ އެ ސްކޫލުން ކުރަން ނިންމާފައިވާ މަސައްކަތްތަކުގެ މުހިންމުކަން ފާހަގަކޮށްފަ އެވެ.

އެ އެންޖީއޯ އިން ބުނީ އެކި އުމުރުފުރާތަކުގެ މީހުން އެކުގައި ވަގުތު ހޭދަކޮށް, އުމުރުން ދުވަސްވީ ފަރާތްތަކާ އެކު ގުޅުން ބަދަހިކުރުމަކީ މުޖުތަމައު ދުޅަހެޔޮވެގެން ދާނެ ކަމެއް ކަމަށެވެ.

އަމީރު އަހުމަދު ސްކޫލަކީ ރާއްޖޭގައި އެންމެ ދުވަސްވީ އެއް ޕްރީ ސްކޫލަށް ވާއިރު, އެ ސްކޫލުން މަސައްކަތްކުރަނީ އެ ތަނުގައި ކިޔަވާ ތުއްތު ކުދިންނަށް ރަނގަޅު މިސާލުތަކެއް ދައްކައި މުޖުތަމައަށް ފައިދާކުރަނިވި ކުދިންތަކެއް ބިނާކުރުމަށެވެެ.