އެންމެން ގުޅިގެން މަގުތައް ރައްކާތެރިކުރެވޭނެ: އަމީން

މާލެ ސަރަހައްދުގެ މަގުތަކަކީ ރައްކާތެރި ތަންތަނަށް ހެދޭނެ ކަމަށާއި އެންމެން ގުޅިގެން އެކަން ކުރެވޭނެ ކަމަށް ޓްރާންސްޕޯޓު މިނިސްޓަރު މުހައްމަދު އަމީން ރޭ ވިދާޅުވެއްޖެ އެވެ.

އެކްސިޑެންޓުތައް ގިނަވެ، އާއްމުންގެ ކަންބޮޑުވުމާއި ޝަކުވާތައް ބޮޑުވެފައި ވަނިކޮށް، މިނިސްޓަރު އެކްސްގައި ކުރެއްވި ޕޯސްޓުގައި ވިދާޅުވީ މާލޭ ސަރަހައްދުގެ މަގުތަކުގެ ސަލާމަތާއި ރައްކާތެރިކަން ރަނގަޅުކުރުމަކީ ޓެކްނިކަލީ ކުރެވިދާނެ ކަމެއް ކަމަށެވެ.

އެކަން ކުރުމަށް ވަރަށް ގިނަ މަސައްކަތް ކުރަމުން އަންނަ ކަމަށް ވެސް އަމީން ވިދާޅުވި އެވެ.

"އެންމެން ގުޅިގެން އެންމެންނަށް ވެސް ރައްކާތެރި މަގުތަކެއް ހެދިދާނެ. ކުރިއަށް ދާން ހިނގާ- ތިޔަބޭފުޅުންގެ އެއްބާރުލުން މުހިންމު،" މިނިސްޓަރު ވިދާޅުވި އެވެ.

މާލެ ސަރަހައްދުގައި މި ފަހުން ހިނގި އެކްސިޑެންޓުތަކެއްގައި ދެ ޒުވާނަކު ވަނީ މަރުވެފަ އެވެ. އަދި މިދިޔަ ހަފުތާގައި ހިނގި އެހެން އެކްސިޑެންޓެއްގައި ސީރިއަސް އަނިޔާތަކެއް ލިބުނު 20 އަހަރުގެ ޒުވާނަކަށް އަންނަނީ ވެންޓިލޭޓަރުގައި ފަރުވާ ދެމުންނެވެ.

ފުލުހުންގެ ވެބްސައިޓުގައި އާންމު ކޮށްފައިވާ ތަފާސްހިސާބުތައް ދައްކާ ގޮތުން މި އަހަރުގެ މިހާތަނަށް ރާއްޖޭގައި 1،900 އަށްވުރެ ގިނަ އެކްސިޑެންޓް ވަނީ ހިނގައިފަ އެވެ. އެއީ މިދިޔަ އަހަރުގެ އެ މުއްދަތާ އަޅާބަލާއިރު އިތުރުވުމެކެވެ.

މިދިޔަ އަހަރުގެ އޮގަސްޓު މަހާ ހަމައަށް ރާއްޖޭގައި ހިނގާފައިވަނީ 1،476 އެކްސިޑެންޓެވެ. އޭގެ ތެރެއިން ގިނަ އެކްސިޑެންޓު މާލެ ސަރަހައްދުގައި ހިނގިއިރު 125 މީހަކަށް އަނިޔާވެ، ފަސް މީހަކު މަރުވި އެވެ.

މި އަހަރު އެންމެ ގިނަ އެކްސިޑެންޓް ހިނގާފައި ވަނީ މާޗު މަހު އެވެ. އެ މަހު އެކަނި 300 އަށް ވުރެ ގިނަ އެކްސިޑެންޓެއް ރާއްޖޭގައި ހިނގި އެވެ. އެހެން މަސްތަކުގައި އެވްރެޖްކޮށް 200 އަށް ވުރެ ގިނަ އެކްސިޑެންޓް ވަނީ ހިނގައިފަ އެވެ.