ހުޅުމާލޭގެ ސެންޓްރަލް ޕާކު ސަރަހައްދުން 10 ރޭސިން ކާރު ޓޯކޮށްފި

ހުޅުމާލޭގެ ސެންޓްރަލް ޕާކު ސަރަހައްދުގައި ޕާކްކުރުން މަނާކޮށްފައިވާ ބައިގައި ޕާކްކޮށްފައި ހުރި 10 ރޭސިން ކާރެއް ފުލުހުން މިއަދު ޓޯކޮށްފި އެވެ.

ހުޅުމާލޭގައި ދުއްވާ ގިނަ ރޭސިން ކާރުތައް ޕާކް ކޮށްފައި ވަނީ ސެންޓްރަލް ޕާކް ސަރަހައްދުގަ އެވެ. އެ ސަރަހައްދުގެ ބޮޑު ބައެއް ނަގައިގެން މުޅިން ކަހަލަ ގޮތަކަށް ޕާކް ކޮށްފައި ހުންނަނީ ސްޕޯޓްސް ކާރުތަކެވެ.

ނަމަވެސް ފުލުހުން ބުނީ، މިއަދު ހަވީރު އެ ސަރަހައްދުން 10 ކާރު ޓޯކޮށްފައިވާ ކަމަށެވެ. އެއީ މާލެ ފިޔަވައި އެހެން ޒޯންތަކުގައި ދުއްވަން ރަޖިސްޓަރީ ކޮށްފައިވާ ކާރުތަކަކަށް ވާތީ ކަމަށް ފުލުހުންގެ އިސް އޮފިޝަލަކު ވިދާޅުވި އެވެ.

އޭނާ ވިދާޅުވި ގޮތުގައި، އެ ވެހިކަލްތައް ޕާކްކޮށްފައި ހުރީ ވެސް ޕާކްކުރުން މަނާ ސަރަހައްދެއްގަ އެވެ.

ފުލުހުން ބުނީ، ސެންޓްރަކް ޕާކް ސަރަހައްދުން 10 ކާރު ޓޯކުރީ ހާއްސަ ކަމަކާ ގުޅިގެން ނޫން ކަމަށެވެ. ނަމަވެސް، އިއްޔެ މެންދުރު ހުޅުމާލެ 2 ގައި ބާރު ސްޕީޑުގައި ދުއްވާފައި ދިޔަ ރޭސިން ކާރަކުން މީހެއްގެ ގައިގައި ޖެހުނު މައްސަލަ ވަނީ ވަރަށް ބޮޑަށް ހޫނުވެފަ އެވެ.

ފޮޓޯތަކުން ފެންނަ ގޮތުގައި އެކްސިޑެންޓުވި ކާރަކީ މާލެ ޒޯންގައި ދުއްވަން ރަޖިސްޓަރީ ކޮށްފައިވާ އުޅަނދެއް ވެސް ނޫނެވެ. ކާރުގެ ނަންބަރު ޕްލޭޓްގައި އިނީ ބީ ޒޯން [ނުވަތަ ރާއްޖޭގެ އުތުރާއި ދެކުނުގެ އަތޮޅުތަކުގައި] ދުއްވަން ރަޖިސްޓަރީ ކޮށްފަ އެވެ.

އެ އެކްސިޑެންޓް ހިނގީ ވިނަރެސް ފްލެޓު ކައިރިން ބާރު ސްޕީޑުގައި ދުއްވާފައި ދިޔަ ސްޕޯޓްސް ކާރު ކޮންޓްރޯލުން ނެއްޓި، އެ މަގުގެ އެއް ފަރާތުގައި ސައިކަލެއްގައި މަޑުކޮށްގެން އިން މީހެއްގެ ގައިގައި ޖެހިގެންނެވެ.

އެ އެކްސިޑެންޓުގައި އަނިޔާވި މީހާގެ ހާލު ސީރިއަސް ކަމަށް ފުލުހުން ވަނީ މިއަދު ބުނެފަ އެވެ.

ރޭސިން ކާރުން ޖެހި ހިނގި އެކްސިޑެންޓާ ގުޅިގެން ރޭ ތިން މީހަކު ވަނީ ހައްޔަރުކޮށްފަ އެވެ. އަދި އެ މީހުން ތަހުގީގުގެ ބޭނުމަށް ބަންދުކުރަން ކޯޓުން މިއަދު ވަނީ ހުއްދަ ދީފަ އެވެ.

އެ މައްސަލާގައި ހައްޔަރުކުރީ ހ. ނޫރަންމާގެއާގޭ އިކްރާމުއްރަހުމާނާއި މ. ލޭންޑްއޮފްގާޑަން އިބްރާހިމް އިކްރާމް އަދި ގއ. ކަނޑުހުޅުދޫ އާޒާދުގޭ ޖިނާހް އިސްމާއިލެވެ. އެކްސިޑެންޓުވިއިރު ކާރުގައި ތިބީ އިކްރާމުއްރަހުމާނާއި އިބްރާހިމް އިކްރާމެވެ. ޖިނާހްއަކީ އެ ވަގުތު ސީންގައި އުޅުނު މީހެކެވެ.

އޭގެ ތެރެއިން އިކްރާމުއްރަހްމާނާއި އިބްރާހިމް އިކްރާމްގެ ބަންދާ މެދު ގޮތެއް ނިންމަން ގެންދިޔައީ ކްރިމިނަލް ކޯޓަށެވެ. ކޯޓުން ވަނީ އެ ދެ މީހުން ވެސް ޝަރީއަތް ނިމެންދެން ބަންދުގައި ބަހައްޓަން އަމުރުކޮށްފަ އެވެ. ޖިނާހް ގެންދިޔައީ ހުޅުމާލެ ކޯޓަށެވެ. އެ ކޯޓުން ނިންމީ އޭނާ 15 ދުވަހަށް ބަންދު ކުރުމަށެވެ.