މެލޭޝިއާ އެއާލައިންގެ ދަތުރުތައް ރާއްޖެ އަށް އަލުން ފަށައިފި

މެލޭޝިއާގެ ގައުމީ އެއާލައިން، މެލޭޝިއާ އެއަލައިންސުން ރާއްޖެއަށް ދަތުރުތައް އަލުން މިއަދު ފަށައިފި އެވެ.

މެލޭޝިއަން އެއާލައިނުގެ ފުރަތަމަ ދަތުރު ކުރި ފްލައިޓު ވެލާނާ އިންޓަނޭޝަނަލް އެއާޕޯޓުގައި ޖެއްސީ މިއަދު މެންދުރެވެ. ދަތުރުތައް ފެށުން ފާހަގަކުރަން މި ބޯޓަށް ވަނީ ވޯޓާ ސެލިއުޓެއް ދީފަ އެވެ.

މި ފްލައިޓުން ރާއްޖެއަށް ދަތުރު ކުރި 168 ފަސިންޖަރުންނަށް ސަގާފީ ކުޅިވަރާ އެކު ހޫނު މަރުހަބާއެއް ވަނީ ކިޔައިފަ އެވެ.

މި އެއާލައިނުން ހަފުތާގެ ހުރިހާ ދުވަހެއްގައި ވެސް ރާއްޖެ އާއި މެލޭޝިއާއާ ދެމެދު ދަތުރުތައް ކުރާނެ އެވެ. މި ދަތުރުތައް ކުރާނީ ބޮއިން 737- 800 މަކުރާގެ 174 ސީޓުގެ ފްލައިޓުންނެވެ.

މެލޭޝިއާ އެއާލައިންސުން ރާއްޖެ އަށް އެންމެ ފަހުން ދަތުރު ކޮށްފައިވަނީ 2017 ވަނަ އަހަރު އެވެ. މެލޭޝިއާއަކީ ދިވެހިން އެންމެ ގިނައިން ދަތުރުކުރާ އެއް ގައުމެވެ.