ޕްލާސްޓިކް ކުދި ފެންފުޅި މަނާކުރުން 2026 އަށް ފަސްކޮށްފި

ތިމާވެއްޓަށް ގެއްލުންދޭ ސިންގަލް ޔޫސް ޕްލާސްޓިކް މަނާކުރުމުގެ ލިސްޓުގެ ދަށުން މަނާކުރާ އެންމެ ފަހު ބާވަތް ކަމަށްވާ ޕްލާސްޓިކް ކުދި ފެންފުޅި މަނާކުރާ ތާރީހު 2026 ވަނަ އަހަރަށް ފަސްކުރަން ސަރުކާރުން ނިންމައިފި އެވެ. މިއީ އެ ތާރީހު ފަސްކުރި ދެ ވަނަ ފަހަރެވެ.

ރައީސް ޑރ. މުހައްމަދު މުއިއްޒު ސޮއިކުރައްވައި އިއްޔެ ނެރުއްވި ގަރާރުގައިވާ ގޮތުގައި، އެއް ލީޓަރާއި އެއް ލީޓަރަށް ވުރެ ކުދި 500 މިލިމީޓަރުގެ ޕްލާސްޓިކް ފުޅީގައި ބަންދުކޮށްފައި ހުންނަ ފެން ރާއްޖެ އަށް އެތެރެކުރުމާއި އުފެއްދުން ވެސް އަންނަ އަހަރުގެ ޑިސެމްބަރު އެކަކުން ފެށިގެން މަނާ ވާނެ ކަމަށެވެ. އަދި ބާޒާރަށް ނެރުން މަނާ ވާނީ މާޗު 1، 2026 އިން ފެށިގެން ކަމަށް ރައީސްގެ ގަރާރުގައިވެ އެވެ.

ޕްލާސްޓިކް ކުދި ފެންފުޅި މަނާކުރާ ތާރީހުގެ ގޮތުގައި ކުރިން ކަނޑައަޅާފައި އޮތީ މިއަދެވެ. ފުރަތަމަ، މިދިޔަ އަހަރު މަނާކުރަން ކަނޑައަޅާފައި އޮތް އެ ބާއްވަތް މަނާކުރާ ތާރީހު މިއަދަށް ފަސްކުރީ މިދިޔަ އަހަރުގެ ޑިސެމްބަރުގައި ރައީސް މުއިއްޒު ނެރުއްވި ގަރާރެއްގަ އެވެ.

ރާއްޖެ އަށް އެތެރެކުރުމާއި އުފެއްދުމާއި ބާޒާރަށް ނެރުން މަނާ، އެއް ފަހަރު ބޭނުންކޮށްފައި އުކާލާ ޕްލާސްޓިކުގެ ބާވަތްތަކުގެ ލިސްޓެއް އެކުލަވާލީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގަ އެވެ. އޭގެ ދަށުން އެކި ތާރީހުތަކަށް ބަހާލައިގެން ޖުމްލަ 14 ބާވަތެއްގެ ޕްލާސްޓިކް މަނާކުރަން ލިސްޓުގައި ކަނޑައަޅާފައިވެ އެވެ.

އެ ލިސްޓުގައި ހިމެނޭ 14 ބާވަތުގެ ތެރެއިން 13 ބާވަތެއް މިހާރު ވަނީ މަނާކޮށްފަ އެވެ.