ޓްރަމްޕަށް ހަމަލާދިން ސަބަބެއް ވެސް ރޭވި ބަޔަކު ވެސް ނޭނގެ

އެމެރިކާގެ ރިޔާސީ އިންތިހާބުގައި ވާދަކުރައްވާ ކުރީގެ ރައީސް ޑޮނަލްޑް ޓްރަމްޕް އަވަހާރަކޮށްލަން ހަމަލާ ދިން ސަބަބެއް އަދި އެއީ ބަޔަކު އަޑީގައި ތިބެގެން ދިން ހަމަލާއެއް ކަމެއް ވެސް އަދި މިހާތަނަށް ހޯދިފައި ނުވާ ކަމަށް އެފްބީއައި އިން އިއްޔެ ބުނެފި އެވެ.

އެމެރިކާގެ މައި ތަހުގީގީ އިދާރާއިން ބުނީ މި މަހުގެ 13 ވަނަ ދުވަހު ޓްރަމްޕަށް ދިން ނާކާމިޔާބުވި ހަމަލާއާ އެކު ސީކްރެޓް ސާވިސް އިން ބަޑިޖަަހައި މަރާލި ތޯމަސް މެތިއު ކްރޫކްސް، 20، އަކީ ބަޔަކާ ގުޅިގެން ހަމަލާ ދިން މީހެއް ކަމަށް ނުބެލެވޭ ކަމަށެވެ.

އެފްބީއައި އިން ބުނީ މިހާތަނަށް ހޯދިފައިވާ ކަންކަމަށް ބަލާއިރު ކްރޫކްސް ހަމަލާ ރޭވީ އަމިއްލައަށެވެ. އަދި މިއީ އޭނާ ލައްވާ ބަޔަކު ކުރުވި ކަމެއްގެ ގޮތުގައި ބެލެވޭނެ މައުލޫމާތެއް ވެސް ނެތް ކަމަށް ބުންޏެވެ.

އެފްބީއައިގެ ސްޕެޝަލް އެޖެންޓް ކެވިން ރޮޖެކް ވިދާޅުވީ އެ އިދާރާއިން ބަޔާންތައް ނަގަމުން ދާއިރު "ވިކްޓިމް އިންޓަވިއު" އެއް ޓްރަމްޕް ދެއްވަން މިހާރު އެއްބަސްވެވަޑައިގެންފައިވާ ކަމަށެވެ. އޭނާ ވިދާޅުވީ މިއީ ކޮންމެ ތަހުގީގެއްގައި ވެސް އާންމުކޮށް ނަގާ ކަހަލަ ބަޔާނެއް ކަމަށެވެ.

"ބޭނުންވަނީ މިކަމުގައި ޓްރަމްޕަށް ވެސް ފާހަގަކުރެވު ކަންކަން އޭނާގެ ފަރާތުން ސާފުކުރުން،" އެޖެންޓް ވިދާޅުވި އެވެ.

އެފްބީއައި އިން ވަނީ ޓްރަމްޕަށް ހަމަލާދިން ކްރޫކްސްގެ އާއިލާގެ މެންބަރުންނާއި އެކުގައި މަސައްކަތްކުރި މީހުންނާއި ކުރީގެ ޓީޗަރުންނާއި އެކުގައި ކިޔަވަން އުޅުނު މީހުންގެ އިންޓަވިއުތައް ވެސް ނަގައިފަ އެވެ.

"މިހާތަނަށް އެނގުނު ގޮތުގައި އެއީ ވަރަށް ވިސްނުންތޫނު އަދި ބަރާބަރަށް ކޮލެޖަށް ގޮސް އަދި ވަޒީފާގައި ވެސް ވަރަށް ރަނގަޅަށް ދެމިހުރި މީހެއް،" އެޖެންޓް ރޮޖެކް ވިދާޅުވި އެވެ. "އޭނާ އާންމުކޮށް އެކުގައި އުޅެނީ އާއިލާގެ މީހުންނާ އެކުގައި. އެހެންވެ އޭނާގެ އެކުވެރިން ވެސް އަދި ކަންކަމުގައި އޭނާއާ ބައިވެރިވާނެ މީހުން ވެސް މަދު."

އެފްބީއައި އިން ކުރިން ބުނެފައިވާ ގޮތުގައި ކްރޫކްސް ވަނީ 1963 ވަނަ އަހަރުގެ ނޮވެމްބަރު މަހު އޭރުގެ ރައީސް ޖޯން އެފް ކެނެޑީ އަށް، ލީ ހާވީ އޮސްވާޑް ހަމަލާދީ އަވަހަރާކޮށްލި ހާދިސާގެ މައުލޫމާތު އިންޓަނެޓުން ހޯދައިފަ އެވެ.

"ޖުލައި ހަ ވަނަ ދުވަހު އޭނާ ވަނީ 'އޮސްވާޑް ހުރީ ކެނެޑީއާ ކިހާ ދުރަކު' ތޯ ބެލުމަށް ގޫގުލްގައި ސާޗްކޮށްފައި،" އެފްބީއައިގެ ޑިރެކްޓަރު މިދިޔަ ހަފްތާގައި ކޮންގްރެސްގައި ވިދާޅުވި އެވެ.

މީގެ އިތުރުން ވެސް، ގޮވާތަކެއްޗާއި ބައެއް ރައީސުންނަށް ދީފައިވާ ހަމަލާތަކާ ގުޅޭ މައުލޫމާތު ވެސް އޭނާ އިންޓަނެޓުން ހޯދާފައި ހުރި ކަމަށް އެފްބީއައި އިން ބުނެފައިވެ އެވެ.

ކެމްޕެއިން ރެލީއެއްގައި ވާހަކަ ދައްކަން ހުންނަވަނިކޮށް ޓްރަމްޕަށް ކްރޫކްސް ހަމަލާ ދިނީ ކައިރީގައި ހުރި ފުރާޅެއްގެ މަތީ އޮށޯވެ އޮވެގެންނެވެ. އޭނާގެ ހަމަލާ އަމާޒުވީ ޓްރަމްޕުގެ ކަންފަތުގެ ކުޑަ ތަންކޮޅަކަށެވެ. -- އޭއެފްޕީ