އަންހެނެއްގެ ބޮލުގައި ގާބުރިއަކުން ޖެހި ކަމަށް ތުހުމަތުކުރާ ސާޖިދު ހަތް ދުވަހަށް ބަންދުކޮށްފި

ގއ. ވިލިނގިލީގައި އަންހެނެއްގެ ބޮލުގައި ގާ ބުރިއަކުން ޖެހި ކަމަށް ތުހުމަތުކޮށް އިއްޔެ ހައްޔަރުކުރި މީހާގެ ބަންދަށް ހަތް ދުވަސް ކޯޓުން ދީފި އެވެ.

އެ މައްސަލާގައި ހައްޔަރުކޮށްފައި ވަނީ އެ ރަށުގެ މަސްވެރިއެއް ކަމަށްވާ އަދި ސޯޝަލް މީޑިއާ އެކްޓިވިސްޓް އަލީ ސާޖިދު، 32، އެވެ.

ފުލުހުން މިއަދު ބުނީ މި މައްސަލައާ ގުޅިގެން ހައްޔަރުކުރި މީހާގެ ބަންދާ މެދުގައި ގޮތެއް ނިންމުމަށް ވިލިނގިލި މެޖެސްޓްރޭޓް ކޯޓަށް ރޭ ހާޒިރުކުރުމުން އޭނާ ހަތް ދުވަހަށް ބަންދުކުރަން އެ ކޯޓުން އަމުރުކޮށްފައިވާ ކަމަށެވެ.

އަނިޔާވެފައި ވަނީ 46 އަހަރުގެ އަންހެނަކަށެވެ. އޭނާ އަށް ގއ. އަތޮޅު ހޮސްޕިޓަލްގައި ފަރުވާދިނުމަށް ފަހު ދޫކޮށްލާފައި ކަމަށް ފުލުހުން ކުރިން ބުންޏެވެ.