މަޖިލިސް އިދާރާގެ ކައިރީގައި ހުރި ސައިކަލްތަކެއްގައި ރޯކޮށްލައިފި

ރައްޔިތުންގެ މަޖިލިހުގެ އިދާރާގެ ކުރިމައްޗަށް އޮންނަ ޕާކިން ޒޯނުގައި ހުރި ސައިކަލްތަކެއްގައި ރޭ ރޯކޮށްލުމުން ގެއްލުންތަކެއް ވެއްޖެ އެވެ.

ފުލުހުން މިއަދު ބުނި ގޮތުގައި މެދުޒިޔާރަތް މަގުގެ ހޮޓެލް ޖެން ކައިރީގައި އޮންނަ ޕާކިން ޒޯންގައި ހުރި ސައިކަލްތަކެއްގައި ރޯކޮށްލާފައި ވަނީ ރޭ ފަތިހު އެވެ.

މި ހާދިސާގައި ހަތް ސައިކަލަކާއި ވޭނަކަށް ގެއްލުން ލިބިފައިވާ ކަމަށާއި އޭގެ ތެރެއިން ތިން ސައިކަލެއް ބޭނުން ނުކުރެވޭ ވަރަށް އަންދާލައިފައިވާ ކަމަށް ވެސް ފުލުހުން ބުންޏެވެ.

ގްރީން ޒޯނާ ވެސް ކައިރީގައި ހިނގި މި ހާދިސާއާ ގުޅިގެން މިހާތަނަށް މީހަކު ހައްޔަރުކޮށްފައެއް ނުވެ އެވެ. ނަމަވެސް ފުލުހުން ބުނީ އެކަން ކުރި މީހާ ދެނެގަނެވިފައިވާ ކަމަށެވެ.