ހަތަރު މީހުންނާ އެކު ގެއްލުނު ދޯންޏާ ގުޅިއްޖެ: އެމްއެންޑީއެފް

މިދިޔަ ހުކުރު ދުވަހު ހަތަރު މީހުންނާ އެކު ގެއްލުނު ދޯންޏާ ގުޅިފައިވާ ކަމަށް އެމްއެންޑީއެފުން މިއަދު ބުނެފި އެވެ.

ކ. ތިލަފުށިން ފުރައިގެން މ. މެދުފުށި އައިލެންޑް ރިސޯޓަށް ދަތުރުކުރަމުންދިޔަ މުދާ އުފުލާ ދޯނި، "އޭއޭއޭ-37"ގެ ހަބަރެއް ނުވެގެން ރިޕޯޓު ކުރީ އެ ދުވަހު ހަވީރު 5:15 ހާއިރު އެވެ. އޭގައި އޭރު ތިބީ ދިވެއްސަކާއި ތިން ބިދޭސީންނެވެ.

ދޯންޏާއި އޭގެން ދަތުރުކުރި ހަތަރު މީހުން ހޯދުމަށް އިއްޔެގެ ނިޔަލަށް ކަނޑާއި ވައިގެ މަގުން އެމްއެންޑީއެފުން ވަނީ 10،000 އަކަ ނޯޓިކަލް މޭލަށް ވުރެ ބޮޑު ސަރަހައްދެއް ބަލައިފަ އެވެ.

މީގެ އިރުކޮޅެއް ކުރިން އެމްއެންޑީއެފުން ބުނީ އެ ދޯންޏާ ގުޅިފައިވާ ކަމަށާއި ކޯސްޓްގާޑް ޝަހީދު އަލީ އެ ދޯނި އޮތް ދިމާލަށް ދަތުރުކުރަމުން އަންނަ ކަމަށެވެ.

ނަމަވެސް އެކަމާ ގުޅޭ އިތުރު ތަފްސީލު ނުދޭތީ އޭގައި ތިބި މީހުންގެ ހާލު ރަނގަޅުކަން ނުވަތަ ނޫން ކަން އަދި ސާފެއް ނުވެ އެވެ.

މި ދުވަސްވަރު ހުޅަނގު މޫސުން ފެށި، ރާއްޖޭގެ މޫސުން ވަރަށް ގޯހެވެ. މިހާރު ވެސް އޮތީ ލ. އަތޮޅުން ފެށިގެން އައްޑޫއަށް ވައިޓް އެލާޓް ނެރެފަ އެވެ.

މޫސުމާ ބެހޭ ގައުމީ އިދާރާއިން ލަފާކުރާ ގޮތުގައި ވިލާގަނޑުގައި 50 މޭލަށް ވައިގަދަވާނެ އެވެ. އަދި ކަނޑުތައް ވެސް ގަދަވާނެ ކަމަށް ލަފާކުރެ އެވެ.