ލަކްސްގެ އެމްބަސެޑަރަކަށް ސުހާނާ

މަޝްހޫރު ސްކިން ކެއާ ބްރޭންޑް "ލަކްސް"ގެ އެމްބަސެޑަރަކަށް ބޮލީވުޑް ސުޕަސްޓާރު ޝާހްރުކް ހާންގެ ދަރިފުޅު އަދި ބޮލީވުޑްގެ އެކްޓްރެސް ސުހާނާ ހާން ހަމަޖައްސައިފި އެވެ.

ރިޕޯޓްތައް ބުނި ގޮތުގައި، ބޮލީވުޑް ފިލްމު "އާޗީސް" އިން ފިލްމީ ދާއިރާ އަށް ތައާރަފުވި ސުހާނާ އަށް މިއީ އޭނާގެ ކެރިއަރުގައި ކުރިއަށް ދިއުމަށް ލިބޭނެ ވަރަށް ބޮޑު ފުރުސަތެކެވެ.

އޭނާގެ ބައްޕަ ޝާހު އަކީ މީގެ ކުރިން އެތައް ފަހަރެއްގައި ލަކްސްގެ އެމްބަސެޑަރުކަން ކޮށްފައިވާ ފަންނާނެކެވެ.

ހޮލީވުޑާއި ބޮލީވުޑްގެ މަޝްހޫރު ގިނަ ފަންނާނުން ވަނީ ލަކްސް ބްރޭންޑުގެ އެކި އިޝްތިހާރުތަކުގައި މަސައްކަތް ކޮށްފަ އެވެ.

ވަރަށް ގިނަ އެކްޓަރުންގެ ކެރިއަރުގައި ލަކްސް ބްރޭންޑަކީ މުހިންމު ރޯލެއް އަދާކޮށްފައިވާ ބްރޭންޑެކެވެ. މަޝްހޫރުކަން އިތުރަށް ލިބުމާއި ފިލްމުތަކުން އިތުރު ފުރުސަތު ލިބުމުގައި މި ބްރޭންޑުގެ ދައުރު ބޮޑެވެ.

ސުހާނާ ދެން އެންމެ އަވަހަށް ފެންނާނީ އޭނާ ބައްޕައާ އެކު ކުޅޭ ފިލްމު "ކިންގް" އިންނެވެ. އެ ފިލްމުގެ މަސައްކަތްތައް މި މަހު ފަށާ ގޮތަށް ވަނީ ހަމަޖެހިފަ އެވެ.