މަރުގެ އިންޒާރު ދޭތީ ޝާހުގެ ސެކިއުރީޓީ ވަރުގަދަކޮށްފި

ބޮލީވުޑްގެ ސުޕަސްޓާރު، ޝާހްރުކް ހާން އަށް މަރުގެ އިންޒާރު ދޭ މައްސަލަތައް އިތުރުވުމުން ދާތީ އޭނާގެ ސެކިއުރިޓީ ވަރުގަދަކޮށްފި އެވެ.

ރިޕޯޓްތައް ބުނި ގޮތުގައި، އިންޑިއާގެ ސަރުކާރުން ވަނީ ޝާހު އަށް "ވައި ޕްލްސް ޕްރޮޓެކްޝަން" ދީފަ އެވެ. އެއީ އިންޑިއާ ސަރުކާރުން ދޭ އެންމެ މަތީ ސެކިއުރިޓީގެ ހަތަރު ވަނަ ލެވަލްގެ ސެކިއުރިޓީ އެވެ.

މި ބަދަލާ އެކު އޭނާގެ ސެކިއުރިޓީގައި 11 އޮފިސަރަކު ތިބޭނެ އެވެ. އެއީ ހަތަރު ފުލުހުންނާއި ހަ ކޮމާންޑަރުން އަދި ޓްރެފިކް ކްލިއަރެންސް އޮފިސަރެކެވެ.

ޝާހު އަށް މަރުގެ އިންޒާރު ލިބެން ފެށީ މި އަހަރު ނުކުތް އޭނާގެ ދެ ފިލްމު ކަމަށްވާ "ޖަވާން" އާއި "ޕަތާން" އަށް ލިބުނު ބޮޑު ކާމިޔާބީއަށް ފަހުގަ އެވެ. އޭނާގެ ފޯނަށް ބަޔަކު ގުޅައި އެކި ފަހަރު މަތިން މަރުގެ އިންޒާރު ދީފައިވާ ކަމަށް ރިޕޯޓްތައް ބުންޏެވެ.

ބޮލީވުޑްގައި އެންމެ ނުފޫޒުގަދަ "ހާންސް"ގެ ތެރޭގައި ހިމެނޭ ޝާހު އާއި ސަލްމާން ހާން އަދި އާމިރު ހާން ވެސް މިފަހުން ވަރަށް ގިނައިން މި ކަހަލަ އިންޒާރުތައް ދީފައިވެ އެވެ.

އެ އިންޒާރުތަކާ ގުޅިގެން ބޮންބޭގައި ހުންނަ ޝާހުގެ ގެ، މަންނަތު ކައިރީ ފުލުހުން 24 ގަޑިއިރު ފޯރި މަރާނެ ކަމަށް ވެސް ރިޕޯޓްތައް ބުންޏެވެ.

ޝާހުގެ "ޕަތާން" އާއި "ޖަވާން" ވަނީ ބޮކްސް އޮފީހުގައި ބޮޑެތި ރެކޯޑުތައް ހަދައިފަ އެވެ. އެ ދެ ފިލްމަށް ވެސް ވަނީ 1،000 ކްރޯޑް ރުޕީސްއަށް ވުރެ ބޮޑު އާމްދަނީއެއް ލިބިފަ އެވެ.