ފްރާންސްގައި މިސްކިތްތަކުގެ ހުރުމަތް ކެނޑުން އާންމުވަނީ

ފްރާންސްގައި މިސްކިތްތަކުގެ ހުރުމަތް ކެނޑުން އާންމުވެ އެ މައްސަލަ ތަހުގީގުކުރަން ފަށައިފި އެވެ.

އެ ގައުމުގެ ޕްރޮސިކިއުޓަރަކު ވިދާޅުވީ މިދިޔަ ހަފްތާތަކުގައި އެކި ސަރަހައްދުތަކުގައި ވަނީ މިސްކިތްތަކުގެ ހުރުމަތް ކެނޑޭ ފަދަ އެކި އަމަލުތައް ހިންގާފައި ކަމަށެވެ. މައްސަލަ ތަހުގީގުކުރުމަށް އަމުރުކުރީ މިސްކިތެއް ކައިރީގައި އޫރެއްގެ ބޯ ބާއްވާފައި އޮއްވައި ފެނުމާ އެކުގަ އެވެ.

ފްރާންސްގެ އިންޓީރިއާ މިނިސްޓަރު ގެރާލްޑް ޑާމަނިން ވަނީ މި މައްސަލައިގައި ކަންބޮޑުވުން ފާޅުކުރައްވައި މިއީ ބަލައިގަނެވޭނެ އަމަލުތައް ނޫން ކަމަށް ވިދާޅުވެފަ އެވެ. އޭނާ ވިދާޅުވީ މިއީ މުސްލިމުން ރުޅިއަރުވައި ހަމަނުޖެހުމަށް މަގުފަހިކުރުވަން ހިންގާ އަމަލުތަކެއްގެ ގޮތުގައި ބެލެވޭ ކަމަށެވެ.

ޑާމަނިން ވިދާޅުވީ މިދިޔަ ހޮނިހިރު ދުވަހު ވެސް ދެ މިސްކިތަކަށް ގެއްލުންދީފައިވާ ކަމަށެވެ.

އޭނާ ވިދާޅުވި ގޮތުގައި މި ހަފްތާ ބަންދުގައި ވެސް ތިން ސަރަހައްދެއްގައި، މިސްކިތަކަށް ގެއްލުން ދިނުމާއި ހުރުމަތްކެނޑުމުގެ އެކި އަމަލުތައް ހިންގާފައިވާ ކަމަށެވެ.

"މުސްލިމުންނަށް އަމާޒުކޮށް ހިންގި މި އަމަލުތައް ހަރުކަށި އިބާރާތުން ކުށްވެރިކުރަން،" ރަމަޟާން މަސް ތެރޭ ހިންގި މި އަމަލު ކުށްވެރިކުރައްވަމުން އިންޓީރިއާ މިނިސްޓަރު އެކްސްގައި ވިދާޅުވި އެވެ. -- އޭއެފްޕީ