މީކާއިލް ވިދާޅުވީ ފްލެޓް ލިޔުން ލިބުނު މީހުންގެ ހައްގުގައި ކޯޓަށް ވެސް ދާން ތައްޔާރު ކަމަށް

ކުރީގެ ސަރުކާރުން ދޫކުރި ފްލެޓުތައް ލިބުނު ފަރާތްތަކުގެ ހައްގުގައި އެމްޑީޕީން ކޯޓަށް ދާން ވެސް ތައްޔާރު ކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް މިއަދު ވިދާޅުވެއްޖެ އެވެ.

ކުރީ ސަރުކާރުގެ "ގެދޮރުވެރިޔާ" ސްކީމްގެ ދަށުން 4،000 މީހުންނަށް ފްލެޓް ދިނުމަށް ނިންމައި އެ މީހުންނަށް ލިޔުން ވެސް ހަވާލުކުރި އެވެ.

ނަމަވެސް އެންޓި ކޮރަޕްޝަން ކޮމިޝަން (އޭސީސީ) އިން ފްލެޓު ދިން ގޮތުގެ ތަހުގީގެއް ކުރުމަށް ފަހު އިއްޔެ ހާމަކޮށްފައި ވަނީ ޝަރުތު ހަމަވާކަމަށް ކަނޑައެޅި 60 ޕަސެންޓު މީހުން ޝަރުތު ހަމަނުވާ ކަމަށެވެ. އަދި ފްލެޓު ދިނުމުގައި ހަދާފައިވާ ބޮޑެތި ގޯސްތައް އެ ކޮމިޝަނުން ހާމަކުރި އެވެ.

ރައްޔިތުންގެ މަޖިލީހުގައި މިއަދު އެހެން މައްސަލައަކަށް ބަހުސް ކުރައްވަމުން މީކާއިލް ވަނީ އޭސީސީ އާއި ސަރުކާރަށް ފާޑު ވިދާޅުވެފަ އެވެ. އޭނާ ވިދާޅުވި ގޮތުގައި އޭސީސީ އާއި ސަރުކާރުން ގުޅިގެން އުޅެނީ ކުރިޔަށް އޮތް ރައްޔިތުންގެ މަޖިލީހުގެ އިންތިހާބާ ދިމާކޮށް އެ މީހުން ބޭނުންވާ ބަޔަކަށް ފްލެޓުތައް ބާހާލާށެވެ.

ނަމަވެސް އޭސީސީގައި މިހާރު ތިއްބެވީ މިދިޔަ ދައުރުގައި ކުރީގެ ރައީސް އިބްރާހިމް މުހައްމަދު ސޯލިހު އައްޔަން ކުރައްވާފައިވާ މެންބަރުންނެވެ.

މީކާއިލް ވިދާޅުވީ އެމްޑީޕީ އޮތީ ދޫދޭ ގޮތަކަށް ނޫން ކަމަށާއި ކޯޓަށް ގޮސްގެން ވިޔަސް، ލިޔުން ލިބުނު މީހުންގެ ހައްގުގައި ވަކާލާތު ކުރައްވާނެ ކަމަށެވެ.

"އަޅުގަނޑުމެން މިތިބީ ފަސޭހައިން ދޫދޭ ގޮތަކަށް ނޫން. މި މަޖިލީހުގެ މެޖޯރިޓީގެ ހަނި ފުރުސަތެއް ވެސް ލިބޭހާ ހިނދަކު އަޅުގަނޑުމެން މި ހައްގުތަކުގެ ދިފާއުގައި ތިބޭނަން. އަސާސީ ހައްގުތައް ކަށަވަރުކުރުމަށްޓަކައި ޑިމޮކްރެޓިކް ޕާޓީ ދެމި އޮންނާނެ،" އޭނާ ވިދާޅުވި އެވެ.

އޭސީސީން ބުނި ގޮތުގައި ޝަރުތު ހަމަވެ، އެއްވެސް މައްސަލައެއް ނޫޅެނީ 20.7 ޕަސެންޓް ފޯމުގަ އެވެ. ޝަރުތު ހަމަވި ނަމަވެސް، މައްސަލަ ހުރީ 19.7 ޕަސެންޓް ފޯމުގައި ކަމަށް ވެސް އެ ކޮމިޝަނުން ބުންޏެވެ. އެއީ ގާތްގަނޑަށް 1،600 ފްލެޓެވެ.

ފޯމުތަކުގައި ހުރި މައްސަލަތައް

• 4،000 ފްލެޓް ލިބޭ މީހުންގެ ލިސްޓުގައި ޝަރުތު ހަމުވާ ގިނަ ބަޔަކު ހިމަނާފައިވޭ.

• ފޯމުތަކުގައި ދީފައިވާ މައުލޫމާތު ފުށުއެރުން.

• ހާއްސަ އެހީއަށް ބޭނުންވާ ފަރާތްތަކުގެ ބަޔަށް އުސޫލާ ހިލާފަށް ޕޮއިންޓް ދީފައިވުން.

• ޝަކުވާގެ މުއްދަތުގައި އާ ލިޔެކިޔުން ހުށަހެޅި.

• ޕޮއިންޓްދިނުމުގައި އުސޫލާ ހިލާފަށް އިތުރަށް ޕޮއިންޓް ދީފައިވޭ.

• ގިނަ ފަރާތްތަކެއް ހައްގު ގެއްލުމުގެ އިހުތިމާލު އޮތްކަން ފާހަގަކުރެވުނު.