މާޝަލް އާޓްސް: ތިން މުބާރާތެއްގައި ވާދަކުރަން ޓައެކްވޮންޑޯ ޓީމު ލަންކާ އަށް

ލަންކާގައި ބާއްވާ ޓައެކްވޮންޑޯ މުބާރާތުގައި ވާދަކުރަން ރާއްޖޭގެ ގައުމީ ޓީމު ލަންކާ އަށް ފުރައިފި އެވެ.

ފުރަތަމަ މުބާރާތް، ކޮލަމްބޯ ޖީސީއެސް އިންޓަނޭޝަނަލް އޯޕަން ޓައެކްވޮންޑޯ ޗެމްޕިއަންޝިޕް ވަނީ ފަށައިފަ އެވެ. ދެވަނަ މުބާރާތް ކަމަށްވާ، ސައުތު އޭޝިއަން އޯޕަން ޓައެކްވޮންޑޯ ޗެމްޕިއަންޝިޕް މިއަދު ވަނީ ފަށައިފަ އެވެ.

ދެން އޮތް އަނެއް މުބާރާތަކީ އޭޝިއާ އިންޓަނޭޝަނަލް ޓައެކްވޮންޑޯ ޗެމްޕިއަންޝިޕެވެ.

އެ ތިން މުބާރާތުގައި 1040 އެތުލީޓުން ވާދަ ކުރެ އެވެ. އެ ތިން މުބާރާތް ޝަރަފުވެރިކޮށް ދެއްވުމަށް ދުނިޔޭގެ ޓައެކްވޮންޑޯ ފެޑެރޭޝަންގެ ރައީސް ޗަންގްވޮން ޗޯއީ މި ވަގުތު ހުންނެވީ ލަންކާގަ އެވެ.

ރާއްޖޭގެ ޓައެކްވޮންޑޯ ޓީމު ވަނީ، މިއަރު މަޑަގަސްކަރާގައި ބޭއްވި އިންޑިއަން އޯޝަން އައިލެންޑް ގޭމްސްގައި ތިން މެޑަލް ހޯދައިފަ އެވެ.