އެމްޓީޑީސީގެ އެމްޑީއަކަށް ނިޔާޒް

އެމްޓީޑީސީގެ އާ މެނޭޖިން ޑިރެކްޓަރަކަށް އެ ކުންފުނީގެ މަސައްކަތް ފަށައިގަތް ދުވަސްވަރު ވެސް އިސް ދައުރެއް އަދާކުރެއްވި އަހުމަދު ނިޔާޒް ހަމަޖައްސައިފި އެވެ.

ބިޒްނަސް އެޑްމިނިސްޓްރޭޝަންގެ ރޮނގުން އިނގިރޭސި ވިލާތުން މާސްޓާސް ހައްދަވާފައިވާ ނިޔާޒަކީ އެ ކުންފުނީގައި ދިގު ތާރީހެއް އޮތް ބޭފުޅެކެވެ. މިދިޔަ އަންގާރަ ދުވަހާ ހަމައަށް 2016 އިން ފެށިގެން އޭނާއަކީ އެމްޓީޑީސީގެ ޑެޕިއުޓީ މެނޭޖިން ޑިރެކްޓަރެވެ. އޭގެ ކުރިން ނިޔާޒް ވަނީ އެ ކުންފުނީގެ ބޯޑު ޑިރެކްޓަރުކަމާއި އޮޕަރޭޝަން އެންޑް ޑިވެލޮޕްމަންޓް މެނޭޖަރުކަން ކުރައްވައިފަ އެވެ.

ނިޔާޒް އެމްޓީޑީސީގެ މަގާމަކަށް އެންމެ ފުރަތަމަ ވެންނެވީ 2007 ގަ އެވެ. އޭގެ ފަހުން އެކި ގޮތްގޮތުން އޭނާ ވަނީ އެ ކުންފުންޏަށް ހިދުމަތް ކުރައްވައިފަ އެވެ.

އެމްޓީޑީސީގެ އިތުރުން ސަރުކާރުގެ ބައެއް ކުންފުނިތަކުގެ ޗެއާމަންކަން ވެސް ނިޔާޒް ކުރެއްވި އެވެ. އޭނާ ވަނީ 2016-2018 އަށް އެމްޓީސީސީގެ ޗެއާމަންކަމާއި 2013-2016 އަށް އެސްޓީއޯގެ ޗެއާމަންކަން ކުރައްވައިފަ އެވެ. އެސްޓީއޯގެ ބޯޑު ޑިރެކްޓަރުކަން ވެސް އަހަރެއްހާ ދުވަހު ކުރެއްވި އެވެ.

އެމްޓީޑީސީގެ މެނޭޖިން ޑިރެކްޓަރަކަށް އެންމެ ފަހުން ހުންނެވީ ތަޒްމީލް އަބްދުއްސަމަދެވެ.