ޕީސީބީގެ މެމްބަރު ކަމަށް މުޣުނީ އައްޔަންކޮށްފި

ޕްރައިވަޓައިޒޭޝަން އެންޑް ކޯޕަރަޓައިޒޭޝަން (ޕީސީބީ) ގެ ބޯޑުގެ މެމްބަރަކަށް މިދިޔަ ސަރުކާރުގައި ސްޓެލްކޯގެ މެނޭޖިން ޑިރެކްޓަރު ކަން އަދި އެންވައިރަމެންޓް މިނިސްޓްރީގެ ސްޓޭޓު މިނިސްޓަރުކަން ކުރެއްވި ހަސަން މުޣުނީ އައްޔަން ކުރައްވައިފި އެވެ.

މިދިޔަ ސަރުކާރުގައި އިސް މަގާމުތަކެއް އަދާ ކުރެއްވި މުޣުނީ، ރައީސް ޑރ. މުހައްމަދު މުއިއްޒަށް ތާއީދު ކުރެއްވީ ރިޔާސީ އިންތިހާބުގެ ދެ ވަނަ ބުރުގެ ކެމްޕޭން ތެރޭގަ އެވެ. ފުރަތަމަ ބުރުގައި ޖުމްހޫރީ ޕާޓީއަށް ލިބުނު ބޮޑު ނާކާމިޔާބީއަށް ފަހުގަ އެވެ.

މުޣުނީ ވަނީ އެމެރިކާގެ ބްރޭންޑައިސް އިންޓަނޭޝަނަލް ބިޒްނަސް ސްކޫލުން މާސްޓާ އޮފް ބިޒްނަސް އެޑްމިނިސްޓްރޭޝަން ހާސިލް ކުރައްވައިފަ އެވެ.

މުޣުނީއަކީ ދައުލަތުގެ ވިޔަފާރި ތަންތަން ޕްރައިވެޓައިޒް ކުރުމާއި ކޯޕަރަޓައިޒް ކުރުމާއި މޮނިޓަކޮށް، އިވެލުއޭޓްކުރުމުގެ ގާނޫނުގެ ދަށުން އުފައްދާފައިވާ ޕީސީބީގެ ބޯޑަށް ރައީސް މުއިއްޒު އައްޔަން ކުރެއްވި ފަސް ވަނަ މެންބަރެވެ.

އެ ބޯޑަށް ރައީސް އިއްޔެ ވަނީ ތިން މެންބަރަކާއި ރައީސަކު އައްޔަން ކުރައްވައިފަ އެވެ.

ޕީސީބީއަށް އައްޔަންކުރެއްވި މެމްބަރުން

- ރައީސް ކަމަށް ހެންވޭރު ރަންގަލި 4، ހަމްދީ އަގީލް

- އެކައުންޓިން އެންޑް ފައިނޭންސްގެ ދާއިރާ އިން: އަހުމަދު މުޝްތާގު، ދަފްތަރު 4652 - ބޭންކިން ދާއިރާ އިން: ލީނާ އަބްދުލްޖަލީލް، ވ. ބްލޫއޯޝަން - ބިޒްނަސް އެޑްމިނިސްޓްރޭޝަން ދާއިރާއިން: މޫސާ ފަތުހީ އާދަމް، ރަންކޮކާގެ ށ. ކޮމަންޑޫ

ސަރުކާރުގެ ކުންފުނިތަކުގެ ބޯޑުތަކަށް މެމްބަރުން ހަމަޖެއްސުމުގެ ގާނޫނީ ޒިންމާ މަތިކޮށްފައި ވަނީ ޕީސީބީއާ އެވެ. ގާނޫނުގައިވާ ގޮތުން ޕީސީބީގެ ބޯޑުގެ މެންބަރުންގެ ގޮތުގައި ހަތް މެމްބަރަކު ތިއްބަވާނެ އެވެ. މި ސަރުކާރު ވެރިކަމަށް އައިރު އެ ބޯޑުގައި ކޯރަމް ހަމަނުވާތާ ތިން މަސް ވެއްޖެ އެވެ.

ބޯޑަށް މެންބަރުން ހަމަކުރުމާ އެކު ކުންފުނިތަކުގެ ހުސްވެފައިވާ މެނޭޖިން ޑިރެކްޓަރުންގެ މަގާމަށް ބޭފުޅުން އައްޔަން ނުކުރެވި އޮތް ހުރަސް ނެތިގެންދާނެ އެވެ.