ބުޅަލެއްގެ ގަޔަށް ވަޅި ހަރައި މަރާލި މީހަކު ހައްޔަރުކޮށްފި

މާލޭގެ މަގެއްމަތީގައި އޮތް ބުޅަލެއްގެ ގަޔަށް ވަޅި ހަރައި މަރާލި މީހަކު ފުލުހުން މިއަދު ހައްޔަރުކޮށްފި އެވެ.

އެ ބުޅަލަށް އަނިޔާކުރިކަން އެނގުނީ ވަޅި ހަރާ ވީޑިއޯ ސޯޝަލް މީޑިއާގައި މިއަދު އާންމުވުމުންނެވެ. މަގުމަތީގައި އުޅޭ ބުޅަލަށް އަނިޔާކުރުން އާއްމުވެފައި ވަނިކޮށް ވަޅިހަރަނިކޮށް އެ ވީޑިއޯގައި ފެނުމުން ގިނަ ބަޔަކު ދަނީ ޝޯޝަލް މީޑިއާގައި ނުރުހުން ފާޅުކުރަމުންނެވެ.

އެ ވީޑިއޯ އާންމުވިތާ އިރުކޮޅެއް ފަހުން ވަނީ ފުލުުހުން ބިޑި އަޅުވައިގެން އެ މީހާ ހައްޔަރުކޮށްގެން ގެންދާ ވީޑިއޯއެއް ވެސް އާންމުވެފަ އެވެ. ނަމަވެސް މި މައްސަލާގައި ފުލުހުންގެ ބަހެއް އަދި ނުލިބެ އެވެ.

އާއްމުވި ވީޑިއޯ އިން ފެންނަނީ މަގުމަތިން ހިނގާފައި އައި ފިރިހެނަކު އިމާރާތެއްގެ ކައިރީގައި އޮށޯވެލައިގެން އޮތް ބުޅަލެއްގެ ކައިރި އަށް ތިރިވެ، އިރުކޮޅަކު މަޑުކޮށްގެން ހުރުމަށް ފަހު ކުއްލިއަކަށް އެ ބުޅަލުގެ ގަޔަށް ވަޅި ހަރާ ތަނެވެ. ވަޅި ހެރުމާ އެކު އެ ބުޅާ ވަރަށް ބާރަށް އެތަނުން ދުއްވައިގަނެ އެވެ.

އެއީ ނަސަންދަރު ފުރަގަހުގައި، އަމީރު އަހްމަދު މަގުގައި ހުންނަ އިމާރާތެއްގެ ކުރިމަތީގައި އޮތް ބުޅަލެކެވެ.

އެނގިފައިވާ ގޮތުގައި އެކަން ހިނގީ މިއަދު ހެނދުނު 11 ޖެހިއިރެވެ. ވަޅި ހެރި އެ ބުޅަލަކީ ބަނޑު ބޮޑު ބުޅަލެއް ކަމަށްވެ އެވެ. ދިރޭތަކެއްޗަށް އެހާ އަނިޔާވެރިވުން ކުށްވެރިކޮށް ގިނަ މީހުން ނުރުހުންފާޅުކޮށްފައިވެ އެވެ.

ޖަނަވާރުންނަށް އަނިޔާކުރުމަކީ ގާނޫނީ ކުށެކެވެ. ގާނޫނުލްއުގޫބާތުގައިވާ ގޮތުން، އަނިޔާވެރިކަމާ އެކު ޖަނަވާރަކާ މެދު އަމަލުކުރުމަކީ ކުށެކެވެ. އަދި މި ކުށް ސާބިތުވެއްޖެ ނަމަ، އެއް މަހާއި ހަ ދުވަހުގެ ޖަލު ހުކުމެއް އަންނާނެ އެވެ.