ފެހުރިހި ހިމާޔަތްކުރުން ތިމާވެށީގެ ގާނޫނުގެ ދަށަށް ބަދަލުކުރަނީ

ރާއްޖޭގައި ފެހުރިހި ހިމާޔަތްކޮށް ރައްކާތެރިކުރުމަކީ ތިމާވެށި ރައްކާތެރިކޮށް ދެމެހެއްޓުމާ ބެހޭ ގާނޫނުގެ ދަށުން ކުރާ ކަމެއްގެ ގޮތަށް ބަދަލުކުރަން ވަޒީރުންގެ މަޖިލީހުގެ ލަފަޔާ އެކު ރައީސް އިބްރާހީމް މުހައްމަދު ސޯލިހު އިއްޔެ ނިންމަވައިފި އެވެ.

ރައީސް އޮފީހުން ބުނީ ރައީސް އެގޮތަށް ނިންމެވީ އެ އޮފީހުގައި އިއްޔެ ބޭއްވި ވަޒީރުންގެ މަޖިލީހުގެ ޖަލްސާގައި މަޝްވަރާކުރެއްވުމަށް ފަހުގައި ކަމަށެވެ.

ފެހުރިހި މިހާރު ހިމާޔަތްކޮށްފައި ވަނީ މަސްވެރިކަމުގެ ގާނޫނުގެ ދަށުންނެވެ.

ރައީސް އޮފީހުން ބުނި ގޮތުގައި، ފެހުރިހި ހިމާޔަތްކޮށް ރައްކާތެރިކުރުން ތިމާވެށީގެ ގާނޫނުގެ ދަށަށް ބަދަލުކުރަން ނިންމަވާފައި ވަނީ ފެހުރިއްސަކީ މަސްވެރިކަމާ ގުޅުންހުރި ދިރުމަކަށް ނުވާތީ އެވެ. އަދި ފެހުރިއްސަކީ ރާއްޖެ އާއި ދުނިޔޭގެ ފެންވަރުގައި ވެސް މަސްވެރިކަމުގެ ސިނާއަތުގައި ބޭނުންކުރާ މަހަކަށް ނުވާތީ އެވެ.

އެހެންވެ، ވަޒީރުންގެ މަޖިލީހުން ރައީސަށް ހުށަހެޅި ކަރުދާހުގައި ބުނެފައި ވަނީ ފެހުރިހި އެންމެ ރަނގަޅަށް ރައްކާތެރިކޮށް ދަމަހައްޓާއި މެނޭޖުކުރެވެން އޮތީ ތިމާވެށީގެ ގާނޫނުގެ ދަށުން ކަމަށެވެ. އެ ކަރުދާހުގައި ވަނީ ފެހުރިއްސަށް ރާއްޖޭގައި ގިނަ ގެއްލުންތަކެއް ލިބެމުންދާ ކަމަށް ބުނެފަ އެވެ.

ފެހުރިއްސަކީ 2016 ވަނަ އަހަރުގެ ޖުލައި މަހުގައި އިންޓަނޭޝަނަލް ޔޫނިއަން ފޯ ކޮންސަވޭޝަން އޮފް ނޭޗަރ (އައިޔޫސީއެން)ގެ ރެޑް ލިސްޓް އޮފް ތުރެޓަންޑް ސްޕީޝީސްގައި ނެތި ދިއުމުގެ ބިރުހީވެފައިވާ ދިރުމެއް ކަމަށް ކަނޑައަޅާފައިވާ ދިރުމެކެވެ.

ތިމާވެށީގެ ގާނޫނުގެ ދަށުން މި ދިރުން ހިމާޔަތްކުރުމުން، މި ދިރުމަށް ލިބޭ ގެއްލުންތައް މަދުކުރެވި، މާހައުލީ ގޮތުން ވެސް ގިނަ ފައިދާތަކެއް ލިބިގެންދާނެ ކަމަށް ވަޒީރުންގެ މަޖިލީހުން ހުށަހެޅި ކަރުދާހުގައިވެ އެވެ. އަދި ތިމާވެށީގެ ގޮތުންނާއި އިގުތިސާދީ ގޮތުންނާ އަދި އިޖުތިމާއީ ގޮތުން ވެސް ގިނަ ފައިދާތަކެއް ލިބިގެންދާނެ ކަމެއް ކަމަށް ވަޒީރުންގެ މަޖިލީހުން ބުންޏެވެ.

ރާއްޖޭގައި ފެހުރިހި ފެންނަނީ މައިގަނޑު ދެ ސަރަހައްދަކުންނެވެ. އެއީ ބ. ހަނިފަރު ކައިރިންނާއި އދ. މާމިގިލީ ބޭރުންނެވެ. އެ ދެ ސަރަހައްދު ވެސް ސަރުކާރުން ވަނީ ހިމާޔަތްކޮށްފަ އެވެ. އެ ސަރަހައްދުތައް ރަނގަޅަށް މޮނީޓާ ނުކުރެވި، ފާއިތުވި އަހަރުތަކުގައި ވަނީ ފެހުރިހި ފެންނަ މިންވަރު ވަރަށް ބޮޑަށް ދަށަށް ގޮސްފަ އެވެ.