"ފެނި ފަތިހު ފިނީ"ގައި ޝަމްވީލް

ޒުވާން ލަވަކިޔުންތެރިޔާ މުހައްމަދު ޝަމްވީލް (ބަރޯ)ގެ އާ މިއުޒިކް ވީޑިއޯ އިއްޔެ ރިލީޒްކޮށްފި އެވެ.

ޝަމްވީލް މިފަހަރު ގެނެސްދިނީ އަންތަރީސް ބޭންޑުގެ ލަވައެއް ކަމަށްވާ "ފިނި ފަތިހު ފިނިން"ގެ ރީމޭކެކެވެ. މި ލަވަ މިހާރު ވަނީ ޔޫޓިއުބްގައި އާންމުކޮށްފަ އެވެ.

މި ލަވަ ކިޔާފައި ވަނީ އޭނާ އެވެ. އަދި މިއުޒިކް ކޮމްޕޯޒް ކުރީ ސްޓަލްޒް އިންނެވެ.

ތަފާތު ނެށުންތަކެއް ފެންނަ މި ލަވައިގެ ނެށުމުގައި ބައިވެރިވެފައި ވަނީ "ވަންޝޮޓް އެންޓަޓެއިންމަންޓް" އާއި ދިވެހި ސަގާފީ ނެށުންތަކަށް މަޝްހޫރު "ބިދަބިން" ގްރޫޕްގެ ޒުވާން ނެށުންތެރިންނެވެ.

ޝަރަފުލް އަމީރް (ކުޑަ ރިޗާޑް) ޑައިރެކްޓުކޮށް އަދި ކޮރިއޯގްރެފީ ހަދާފައިވާ މި ލަވައިގެ ވީޑިއޯގެ މަސައްކަތް ކުރީ މާސްކޭ ސްޓޫޑިއޯ އިންނެވެ.

މޯލްޑިވިއަން އައިޑޮލް އިން ވިދާލި ޝަމްވީލް އަންނަނީ ދޭތެރެއަކުން ތަފާތު މިއުޒިކް ވީޑިއޯތައް ގެނެސްދެމުންނެވެ. އޭގެ ތެރެއިން ވެސް އޭނާ ގެނެސްދޭ "މެޝްއަޕް" މިއުޒިކް ވީޑިއޯތަކަށް ގިނަ ބައެއްގެ ލޯބި ލިބެ އެވެ. މިހާތަނަށް އޭނާ ވަނީ ފަސް "މެޝްއަޕް" މިއުޒިކް ވީޑިއޯއެއް ގެނެސްދީފަ އެވެ.