ގައުމީ ފުޓްސަލް ޓީމަށް އިންޑޯގައި ޕްރެކްޓިސް ކުރަން ލިބުމުން ހިތްހަމަ ޖެހިއްޖެ: ކޮކޯ

އޭއެފްސީ ފުޓްސަލް އޭޝިއަން ކަޕް ކޮލިފައިން އަށް ފުރުމުގެ ކުރިން ސޯޝަލް ސެންޓަރުގެ އިންޑޯގައި ތަމްރީން ހެދުމުގެ ފުރުސަތު ލިބުމަކީ މުޅި ޓީމަށް ވެސް ލިބުނު ހިތްހަމަ ޖެހުމެއް ކަން ގައުމީ ފުޓްސަލް ޓީމުގެ މެނޭޖަރު އަލީ ނަދީމް (ކޮކޯ) ބުނެފި އެވެ.

އަންނަ އަހަރު އޭއެފްސީ ފުޓްސަލް އޭޝިއަން ކަޕް އޮތީ ތައިލެންޑުގަ އެވެ. މުބާރާތުގެ ކޮލިފައިން އަށް ކިރިގިސްތާނަށް ރާއްޖޭގެ ޓީމް މިއަދު ފުރާފައި ވާއިރު، ޓީމު ވަނީ ހަފްތާއެއް ވަންދެން ސޯޝަލް ސެންޓަރުގެ އިންޑޯ ހޯލުގައި ފަރިތަ ކޮށްފަ އެވެ.

"އިންޑޯގަ ޕްރެކްޓިސް ކޮށްލަން ލިބުމަކީ ޕޮޒިޓިވް ކަމެއް،" އޭނާގެ ކޯޗުކަމުގެ ދަށުން މިއަހަރުގެ ގޯލްޑަން ފުޓްސަލް ޗެލެންޖުގެ ފައިނަލަށް ގދ. ވާދޫ ޓީމު ގެންގޮސްދީ، ވެމްކޯ އަށް ކްލަބް މޯލްޑިވްސް ފުޓްސަލް މުބާރާތުގެ ތަށި ހޯދައިދިން ކޮކޯ "މިހާރު" އަށް ބުންޏެވެ.

"ތައްޔާރު ވާން ލިބުނު ކުޑަ ވަގުތުކޮޅަކާ ބަލާފަ މި ސްކޮޑާ މެދު ވެސް ވަރަށް ހިތްހަމަ ޖެހޭ. ކުޅެން މި ޖެހެނީ ލެވެލްގެ ގޮތުން ތަފާތު ޓީމުތަކަކާ. މޮޅު ނުވެވުނަސް މަސައްކަތް ކުރާނީ ރަނގަޅު ނަތީޖާއެއް ހޯދަން. ޕްރެކްޓިސް މެޗެއް ނުލިބި ކޮލިފައިން އަށް ދާއިރު، މިދިޔަ އަހަރު ކުޅުނު ދެ ޓީމަކާ މި އަހަރު ވެސް ކުޅެން ޖެހޭ. ނަތީޖާގެ ފަރަގު ކުޑަކުރަން ވަރަށް މަސައްކަތް ކުރާނަން."

ހަމަ އެއާ އެކު ފުޓްސަލް ކޮމިޓީގެ ޗެއާޕާސަން މުފާވިޒް ހާޝިމް (މުފާ) އާއި އެފްއޭއެމްގެ އެހީތެރިކަން ކޮކޯ ފާހަގަ ކުރި އެވެ.

ކޮލިފައިންގައި ވާދަކުރާ ގައުމީ ފުޓްސަލް ޓީމް:

● ގޯލްކީޕަރުން: ޒައިދާން އަހުމަދު (އަސޫ)، ފައްޔާޒް ފަޔާޒް (ފައިއްޓެ)

● އައުޓްފީލްޑް ކުޅުންތެރިން: މުހައްމަދު އިމްރާން (އިންމި)، ސާމިން މުހައްމަދު ނަސީރު، އަލީ ހާފިޒް (ހާއްޕެ)، ހުޒައިފަތު ރަޝީދު (ހުޒޭ)، ހުސެއިން ޝަރީފް (އޮންލީ)، އަބްދުﷲ ޝާފިއު (ޝާއްޕެ)، އިޝާން އިބްރާހިމް (ސައްޓު)، ހުސެއިން ސުހައިލް (ސޮކޭ)، އިސްމާއިލް ވަޖީހު (ވައްޖެ)، އަލީ ޝިޔާހު (ޝިޔާ)، އަލީ މާއިސް (މައްޓު)، ޔާމީން މުހައްމަދު (ޔާންޓެ)

ގައުމީ ޓީމުގެ ކެޕްޓަނަކީ އިމްރާން އެވެ. ވައިސް ކެޕްޓަނުންނަށް ހަމަޖައްސައިފައި ވަނީ އަލީ ހާފިޒާއި ޒައިދާން އެވެ.

މިއަހަރު ވެސް ގައުމީ ޓީމުގެ ކޯޗަކީ އަބްދުﷲ ނަސީރު (އަބޯ) އެވެ. އެސިސްޓެންޓް ކޯޗުންނަކީ އަހުމަދު ވިޝާލް (އަންދު) އާއި އަހުމަދު ތޯހާ އެވެ. ގޯލްކީޕަރު ޓްރޭނަރަކަށް އިބްރާހިމް އަހުމަދު ހަމަޖައްސާފައި ވާއިރު ޝަހުމް އަހުމަދު ޓީމުގެ އޮފިޝަލެއްގެ ގޮތުގައި ހިމަނައިފައި ވެއެވެ.

ހޮނިހިރު ދުވަހު ފަށާ ކޮލިފައިންގައި ރާއްޖެ ހިމެނެނީ ކިރިގިސްތާނާއި ލެބަނަން އަދި ދުނިޔޭގެ ފުޓްސަލްގެ ގަދަ ބާރެއް ކަމަށްވާ އިރާނާ އެއް ގުރޫޕެއްގަ އެވެ.

ރާއްޖެ ކުޅޭ ފުރަތަމަ މެޗުގައި އަންނަ ހޮނިހިރު ދުވަހު އިރާނާ ދެކޮޅަށް ކުޅެން ހަމަޖެހިފައި ވާއިރު، ހޯމަ ދުވަހު ލެބަނަންއާ ދެކޮޅަށް ނުކުންނާނެ އެވެ. އަދި ފަހު މެޗު ކިރިގިސްތާނާ ދެކޮޅަށް ކުޅޭނީ އަންނަ ހަފްތާ ބުދަ ދުވަހު އެވެ.

ގުރޫޕްގެ އެއްނަވަ ހޯދާ ޓީމަށް އޭޝިއަން ކަޕުން ސީދާ ޖާގައެއް ލިބޭއިރު، ކޮލިފައިން ގުރޫޕްތަކުން ދެވަނައަށްދާ ޓީމުތަކުގެ ތެރެއިން އެންމެ ރަނގަޅު ހަތް ޓީމަށް ވެސް މުބާރާތުން ފުރުސަތު ލިބެ އެވެ.

މިވަގުތު ރާއްޖޭގައި އެންމެ މަގުބޫލު އެއް ކުޅިވަރަކީ ފުޓްސަލް އެވެ. ގިނަ މިނީ ޓާފް ދަނޑުތަކެއް ރާއްޖޭގެ އެކި ކަންކޮޅުތަކުގައި ހެދިފައި ހުރި ނަމަވެސް، ބައިނަލްއަގުވާމީ ފެންވަރުގެ މެޗްތަކާއި މުބާރާތްތަކަށް ބޭނުންކުރާނެ އިންޑޯ ފުޓްސަލް ކޯޓެއް ނެތުމަކީ ފުޓްސަލް އަށް ލިބޭ ހީނަރުކަމެކެވެ.

އިންޑޯ ފުޓްސަލް ސްޓޭޑިއަމެއް ނެތުމުގެ މައްސަލަ އަށް އަވަސް ހައްލެއް ހޯއްދަވައި ދެއްވާނެ ކަމަށް ސްޕޯޓްސް މިނިސްޓަރު އަހުމަދު މަހުލޫފް ކުރިން ވިދާޅުވި އެވެ. ނަމަވެސް މިހާތަނަށް އެކަމަށް ހައްލެއް ހޯދިފައެއް ނެތެވެ.

މިދިޔަ އަހަރުގެ ކޮލިފައިން އަށް ދިއުމުގެ ކުރިން ރާއްޖޭގެ ޓީމު ވަނީ ތަޖުރިބާ ހޯދުމުގެ ގޮތުން ތައިލެންޑުގައި އޮތް މުބާރާތެއްގައި ކުޅެފަ އެވެ.

ސްޕޯޓްސް މިނިސްޓްރީގެ އޮފިޝަލް ބުނީ ފުޓްސަލްއާ ގުޅުން ހުރި އެއްވެސް ކަމަކަށް މިނިސްޓްރީގެ ކިބައިން އެފްއޭއެމުން އެދިފައި ނުވާ ކަމަށެވެ. އަދި ޓްރޭނިން އަށް ސޯޝަލް ސެންޓަރުގެ އިންޑޯ ހަމަޖައްސައި ދިނީ ކުޅުންތެރިންގެ އެދިގެން ކަމަށް އޮފިޝަލް ބުންޏެވެ.

ފުޓްސަލް އިންޑޯ ކޯޓެއް ނެތުމުގެ މައްސަލަ އަށް ހައްލެއް ނެތެވެ. ފުޓްސަލްގެ ވެސް ބެލެނިވެރި ފަރާތަކީ އެފްއޭއެމެވެ. އެ އެސޯސިއޭޝަނުން ހިންގާ ގައުމީ ފުޓްސަލް ލީގެއް ނެތުމުން ސްޕޯޓްސް މިނިސްޓްރީން ދޭ ސްޕޯޓްސް އެވޯޑްސްގައި ފުޓްސަލް ނުހިމެނުމުން ފުޓްސަލް ކޮމިޔުނިޓީން ވަނީ އެ މައްސަލަ ފެންމަތިކޮށްފަ އެވެ.

މައްސަލަ އަށް ހައްލެއް ހޯދަން އެފްއޭއެމްގެ ރައީސް ބައްސާމް އަދީލް ޖަލީލް ވަނީ މިއަހަރުގެ މެދުތެރޭގައި ފުޓްސަލް ލީގެއް ފަށަން ނިންމައި އެކަން އިއުލާންކޮށްފަ އެވެ. ނަމަވެސް އެ ލީގު ފެށޭނެ ތާރީހެއް މިއަދާ ހަމައަށް ވެސް ހާމަކޮށްފައެއް ނުވެ އެވެ.