ބަންގްލަދޭޝްގެ ޗެމްޕިއަން ބަލިކޮށް ވަޅުޖެހިފައިވާ ފުޓްބޯޅަ އަށް މާޒިޔާއިން އުންމީދެއް

އޭއެފްސީ ކަޕްގައި، ބަންގްލަދޭޝްގެ ޗެމްޕިއަން ބަޝުންދަރާ ކިންގްސްގެ މައްޗަށް 3-1 ގެ ނަތީޖާ އަކުން ކާމިޔާބު ހޯދައި ވަޅުޖެހިފައިވާ ރާއްޖޭގެ ފުޓްބޯޅަ އަށް މާޒިޔާއިން އުންމީދެއް ހޯދައި ދީފި އެވެ.

މާޒިޔާވަނީ މީގެ ކުރިން ދެ ފަހަރެއްގެ މަތިން ބަޝުންދަރާއާ ދެކޮޅަށް ކުޅެފަ އެވެ. އެކަމަކު އެ ދެ މެޗުން ވެސް މާޒިޔާ ބަލިވީ އެވެ. އޭގެ ތެރޭގައި 2021 ގައި މާލޭގައި ކުޅުނު އޭއެފްސީ ކަޕް ގުރޫޕް ސްޓޭޖުގެ މެޗު ވެސް ހިމެނެ އެވެ.

ފުޓްބޯޅައިގެ ތަޖުރިބާކާރުން ގަބޫލުކުރާގޮތުގައި، ބަންގްލަދޭޝްގެ އެންމެ ވަރުގަދަ ޓީމު ބަލި ކުރެވުމަކީ އަންނަ މަހު ކުޅޭ ވޯލްޑް ކަޕް ކޮލިފައިންގެ ޕްލޭއޮފްގައި ބަންގްލަދޭޝާ ދެކޮޅަށް ކުޅޭ ރާއްޖޭގެ ޓީމަށް ލިބޭނެ ހިތްވަރެކެވެ. ގައުމީ ޓީމުގައި މާޒިޔާގެ ގިނަ ކުޅުންތެރިންތަކެއް ހިމެނެ އެވެ.

މާލޭގެ ގައުމީ ފުޓްބޯޅަ ދަނޑުގައި މިއަދު ކުޅުނު މެޗު ޑޮމިނޭޓްކޮށްގެން ކުޅުނީ ބަޝުންދަރާ އެވެ. ލަނޑު ޖަހާނެ ފުރަތަމަ ފުރުސަތު ވެސް ލިބުނީ އެ ޓީމަށެވެ. މާޒިޔައިން ލަނޑު ޖެހުމުގެ ކުރިން ބަޝުންދަރާ ރޮބްސަން އޭރިއާ ތެރެއަށް ހުސްކޮށް ވަނެވެ. ލިބުނު ފުރުސަތުގައި އޭނާ ފޮނުވާލި ބޯޅަ ދިޔައީ ގޯލް ހުރަސްކޮށް ދަނޑިކައިރިން ބޭރަށެވެ.

އޭގެ ދެ މިނެޓް ފަހުން މާޒިޔާގެ ވޮޖިސްލާވް ބަލަބަނޯވިޗް ހާފުގެ މެދެއްހާ ހިސާބުން ފޮނުވާލި ބޯޅައިން މާޒިޔާ އަށް ލީޑް ނަގައި ދިނެވެ. ބަޝުންދަރާގެ ހާފުގެ ތެރެއިން އިބްރާހިމް އައިސަމް (ޓޯނީ) ދިން ބޯޅަ ކޮންޓްރޯލް ކުރުމަށް ފަހު ހާފުގެ މެދެއްހާ ހިސާބުގައި ހުރެފައި ބަލަބަނޯވިޗް އުންޑައެއްހެން ފޮނުވާލި ބޯޅަ ގޮސް ވަނީ ބަޝުންދަރާގެ ގޯލްގެ އެތެރޭގެ މަތީ ދާގަނޑަށެވެ.

ބަޝުންދަރާގެ ކުޅުންތެރިން ތިބީ އެހާ ދުރުން އޭނާ ބޯޅަ ފޮނުވާލާނެ ކަމަށް ސަމާލުވެގެނެއް ނޫނެވެ.

ފުރަތަމަ ހާފުގައި ވެސް ނަތީޖާ ހަމަހަމަ ކުރުމަށް ބަޝުންދަރާއިން ގޭމް ހަލުވިކޮށް ކުޅެން މަސައްކަތް ކުރި އެވެ. ފުރުސަތުތައް ތަނަވަސް ކުރެވުނަސް އޭގެ ބޭނުމެއް ނުހިފުނެވެ.

ދެވަނަ ހާފުގައި މާޒިޔާގެ ދެވަނަ ގޯލް ޖެހީ އޭއެފްސީ ކަޕް މެޗަކަށް ފުރަތަމަ ފަހަރަށް ކުޅެން ނުކުތް ހަސަން ނަޒީމް (ޗޯޓް) އެވެ. މާޒިޔާއިން އިތުރު ލަނޑެއް ޖެހުމުން ބަޝުންދަރާއިން ކުރިއަށް ޖެހެން މަޖުބޫރުވި އެވެ.

މެޗުގެ އިތުރު ވަގުތުގެ ފުރަތަމަ މިނެޓްގައި ނާއިޒު ހަސަން ދިން ފުރުސަތަކުން އަލީ ފަސިރު (ސެންޓޭ) މާޒިޔާގެ ތިންވަނަ ލަނޑު ޖެހި އެވެ.

ތިން ލަނޑުގެ ލީޑެއް ލިބުމުން މާޒިޔާގެ ކުޅުންތެރިން ޑިފެންސަށް މާބޮޑު ސަމާލުކަމެއް ނުދީ ތިއްބައި އެންމެ ފަހު ވަގުތުގައި ބަޝުންދަރާގެ މުހައްމަދު އިބްރާހިމް އެ ޓީމުގެ ހަމައެކަނި ލަނޑު ޖެހި އެވެ.