ދިވެހި ސިފައިންގެ ބާރު ނުހިނގާ ތަނެއް، އުޅަނދެއް ވެސް ނޯންނާނެ: ޝަމާލް

ދިވެހި ސިފައިންގެ ބާރު ނުހިނގާ ގޮތަށް ރާއްޖޭގެ އެއްވެސް ސަރަހައްދެއް އަދި އުޅަނދެއް ވެސް އޮޕަރޭޓު ކުރެވެމުން ނުދާ ކަމުގެ ޔަގީންކަން ޗީފް އޮފް ޑިފެންސް ފޯސް ލެފްޓިނެންޓް ޖެނެރަލް އަބްދުﷲ ޝަމާލް މިއަދު ދެއްވައިފި އެވެ.

ދައުލަތުގެ މީޑިޔާ ޕީއެސްއެމަށް ދެއްވި އިންޓަވިއުއެއްގައި ޝަމާލް ވިދާޅުވީ އޭރު އޮންނަ ސަރުކާރެއްގެ ހާރިޖީ އަދި ދިފާއީ ސިޔާސަތުގެ ދަށުން ރަހުމަތްތެރި އެކި ގައުމުތަކުގެ އަސްކަރިއްޔާ އާއެކު ގިނަ ހަރަކާތްތަކާއި ތަމްރީނުތައް ކުރިއަށްދާ ކަމަށެވެ.

އެ ހަރަކާތްތަކާއި ތަމްރީނުތަކުގެ މަގްސަދަކީ، ދިވެހި އަސްކަރިއްޔާގެ ގާބިލުކަން އިތުރުކޮށް، ހަރުދަނާ ކުރުން ކަމަށް ޝަމާލް ވިދާޅުވި އެވެ.

ގިނަ އަދަދެއްގެ އިންޑިޔާ ސިފައިން ރާއްޖޭގައި ތިބޭ ކަމަށް ކުރެވޭ ތުހުމަތުތަކަށް އިޝާރާތް ކުރައްވައި ޝަމާލް ވިދާޅުވި ގޮތުގައި، 2011 ވަނަ އަހަރުން ފެށިގެން ދިވެހި ސަރުކާރުން އެދިގެން އެކި ފަހަރު މަތިން އިންޑިޔާ ސަރުކާރުން ވަނީ ރާއްޖެއަށް ދެ ހެލިކޮޕްޓަރާއި ޑޯނިއާ މަތިންދާބޯޓާއި ކޯސްޓުގާޑުގެ އުޅަނދުތައް ހަދިޔާކޮށްފަ އެވެ.

އެ އުޅަނދުތައް ބޭނުންކުރަމުންދަނީ ރާއްޖޭގެ ކަނޑުގެ ސަރަހައްދު ބެލެހެއްޓުމަށާއި ބަލިމީހުން އުފަލަން ކަމަށް ވިދާޅުވި އެވެ.

"މި ހަރަކާތްތަކަކީ ދިވެހި ސިފައިން އަންގައިގެން، ކޮންޓްރޯލް އޮވެގެން ހިންގޭ ހަރަކާތްތަކެއް،" ހެލިކޮޕްޓަރާއި ޑޯނިއާ މަތިންދާބޯޓު ދުއްވަން އިންޑިޔާގެ އަސްކަރީ ޕައިލެޓުން ތިބޭ ތިބުމަށް އިޝާރާތް ކުރައްވައި ޝަމާލް ވިދާޅުވި އެވެ.

ދިވެހި ސިފައިންގެ ބާރު ނުހިނގައި ގޮތަށް އިންޑިޔާ ސިފައިންގެ ކޮންޓްރޯލްގެ ދަށުގައި ރާއްޖޭގެ ބައެއް ސަރަހައްދުތަކާއި މަރުކަޒުތައް ހުރި ކަމަށް އިދިކޮޅު ފަރާތްތަކުން އިސްވެ ކުރާ ތުހުމަތުތަކަށް ވެސް ޝަމާލް ވަނީ ޖަވާބު ދެއްވައިފަ އެވެ.

"ދިވެހި ސިފައިންގެ ބާރު ނުހިނގައި އަސްކަރީ އެއްވެސް މަރުކަޒެއް ނޯންނާނެ،" އޭނާ ޔަގީންކަން ދެއްވި އެވެ.

އިންޑިޔާގެ އެހީގައި އުތުރުތިލަފަޅުގައި އަޅާ ކޯސްޓުގާޑުގެ ބަނދަރާ ގުޅޭގޮތުން ކުރާ ތުހުމަތުތައް ވެސް ޝަމާލް ދޮގުކުރެއްވި އެވެ.

"ދިވެހި ސިފައިންނަކީ ރާއްޖޭގެ މިނިވަންކަމާއި ސިޔާދަތު ނެގެހެއްޓުމުގައި ސާބިތުކަންމަތީ މަސައްކަތް ކުރާ ބައެއް ކަން،" އޭނާ ވިދާޅުވި އެވެ.