ސިޔާމް ފުރުން މަނާކުރި މައްސަލައިގެ ތެރެއަށް ފޮރިން މިނިސްޓްރީން ވަދެއްޖެ!

ހިލްޓަން އަށް ފައިސާ ދައްކަން އާބިޓްރޭޝަނުން ނިންމައި ސިންގަޕޫރުގެ ހައި ކޯޓުގައި މިހާރު ހިނގަމުންދާ ތަންފީޒީ މަރުހަލާގައި ވެސް ހުކުމާ އެއްގޮތަށް ފައިސާ ނުދައްކައިގެން ރާއްޖޭގެ ވިޔަފާރިވެރިޔާ، މީދޫ ދާއިރާގެ މެމްބަރު އަހްމަދު ސިޔާމް މުހައްމަދުގެ ޕާސްޕޯޓް ސިންގަޕޫރުގައި ހިފަހައްޓައި ފުރުން މަނާކުރި މައްސަލައިގެ ތެރެއަށް ދިވެހި ސަރުކާރުން ވަދެއްޖެ އެވެ.

ސިޔާމް ފުރުން މަނާކުރީ މައްސަލައިގެ އަޑުއެހުމަކަށް ސިންގަޕޫރަށް ވަޑައިގަތީ މިދިޔަ ހޯމަ ދުވަހެވެ. އޭނާ އެ ގައުމަށް ވަޑައިގަތީ މި އަހަރުގެ ރިޔާސީ އިންތިހާބަށް އެމްޑީޕީއާ އެކު ކޯލިޝަން ހަދަން ނިންމައި ރައީސް އިބްރާހިމް މުހައްމަދު ސޯލިހް ރަށްރަށަށް ކުރެއްވި ކެމްޕޭން ދަތުރުތަކުގައި ވެސް އުޅުއްވުމަށް ފަހު އެވެ.

"މިހާރު" އަށް ކަށަވަރުވެފައިވާ ގޮތުގައި ސިޔާމްގެ ޕާސްޕޯޓް ހިފެހެއްޓުމާ އެކު ޖެހިގެން އައި ދުވަހު ރާއްޖޭގެ ފޮރިން މިނިސްޓްރީން ވަނީ ސިޔާމްގެ ދިފާއުގައި ސިންގަޕޫރުގެ ހައި ކޯޓަށް ސިޓީއެއް ފޮނުވައިފަ އެވެ.

ސިޔާމްގެ ސަން ޓްރެވަލްސްގެ މައްޗަށް އާބިޓްރޭޝަނުން ހުކުމްކުރީ ނ. އިރުފުށި ރިސޯޓް ހިންގަން ހިލްޓަނާ އެކު ހެދި އެއްބަސްވުން ބާތިލްކުރި މައްސަލައިގަ އެވެ. ދުނިޔޭގެ މަޝްހޫރު ހޮޓެލް ޗެއިނެއް ކަމަށްވާ ހިލްޓަންއާ އެއްކޮޅަށް ހުކުމް އައީ އެ ކުންފުންޏަށް 24 މިލިއަން ޑޮލަރު (368 މިލިއަން ރުފިޔާ) ގެ ބަދަލެއް ދޭން ޖެހޭނެ ކަމަށެވެ.

އެކަމަކު ހުކުމާ އެއްގޮތަށް އެ ފައިސާ ނުދެއްކުމުން އާބިޓްރޭޝަންގެ ނިންމުން ތަންފީޒު ކުރަން ހިލްޓަންއިން ސިންގަޕޫރުގެ ހައި ކޯޓަށް ހުށަހެޅީ އެވެ.

ސިޔާމަށް އައީ ޖަލު ހުކުމެއް

އެނގިފައިވާ ގޮތުގައި އެ މައްސަލާގައި ސިޔާމްގެ މައްޗަށް އައީ ޖަލު ހުކުމެކެވެ. އެއީ ހައި ކޯޓުން ކުރި ހުކުމާ އެއްގޮތަށް ފައިސާ ދެއްކޭނެ މާލީ ގާބިލްކަން ކުންފުނީގައި ހުރެ ނުދެއްކިކަން އޮޑިޓްތަކުން އެނގެން އޮތުމުންނެވެ. އެ ހުކުމް ބަދަލުކުރީ ތިން މަސް ތެރޭގައި ފައިސާ ދައްކަން އެއްބަސްވުމުންނެވެ.

މިފަދަ މައްސަލަތަކުގައި ސިންގަޕޫރުގެ ގާނޫނުގައި އޮންނަ ގޮތުން ސިޔާމަކީ ފިލާފާނެ ބޭފުޅެއްގެ ގޮތުގައި ބަލައި ފުރުން މަނާކުރުމުން، އޭނާ މިހާރު ގެންދަވަނީ ރާއްޖެ ވަޑައިގަތުމުގެ ގާނޫނީ މަރުހަލާތައް ފުރިހަމަކުރައްވަމުންނެވެ. ސިޔާމް ވަނީ އޭނާގެ ޑިޕްލޮމެޓިކް ޕާސްޕޯޓް ހުށަހަޅުއްވައި އޭނާ ދޫކޮށްދޭން އެދިވަޑައިގެންފަ އެވެ. އެކަމާ މެދު މިއަދު ގޮތެއް ނިންމާނެ ކަމަށް ވެ އެވެ.

ފޮރިން މިނިސްޓްރީގެ ސިޓީގައި ސިޔާމަކީ ދެކުނު ކޮރެއާ އާއި ރޯމޭނިއާ އިން ރާއްޖެއަށް ކަނޑައަޅާފައި ހުންނެވި އޮނަރަރީ ކޮންސުލްގެ މަގާމްގައި ހުންނެވި ރަނގަޅު ޝަހުސިއްޔަތެއްކަން ފާހަގަކޮށްފައިވެ އެވެ. އޮނަރަރީ ކޮންސުލްއަކީ ގައުމުތަކުން އެހެން ގައުމުތަކަށް ކަނޑައަޅާ ރަމްޒީ މަގާމެކެވެ.

ޑިޕްލޮމެޓިކް އިމިއުނިޓީ ލިބިވަޑައިގެންނެވުމުގެ އިތުރަށް އޭނާއަކީ ރާއްޖޭގެ ޓޫރިޒަމް ދާއިރާ ކުރިއެރުވުމުން އެވޯޑް ލިބިވަޑައިގެން ހުންނެވި ދިވެހި ވިޔަފާރިވެރިއެއްގެ އިތުރުން ރައްޔިތުންގެ މަޖިލީހަށް ޚިދުމަތްތެރި އަދި ރާއްޖޭގެ ހަތަރު ވަނަ އަށް އެންމެ ބޮޑު ސިޔާސީ ޕާޓީގެ ލީޑަރު ކަމަށް ފޮރިން މިނިސްޓްރީގެ ސިޓިގައި ވެ އެވެ. އެ މިނިސްޓްރީން އެދުނީ ރައްޔިތުންގެ މަޖިލީހާއި ޑިޕްލޮމެޓިކް ޚިދުމަތުގައި އުޅުއްވާ ބޭފުޅަކަށް ވާތީ ސިޔާމާ މެދު ގޮތެއް ނިންމުމުގެ ކުރިން ސިޓީގައިވާ ކަންކަމަށް ރިއާޔަތް ކޮށްދިނުމަށެވެ.

ސިޔާމަކީ މަޖިލީހުގައި އެންމެ ދުވަސްވީ މެމްބަރުންގެ ތެރޭގައި ހިމެނިވަޑައިގަންނަވާ އަދި މަޖިލީހުގެ ރައީސްގެ ޣައިރު ހާޒިރުގައި ރިޔާސަތު ބަލަހައްޓަވާ ބޭފުޅެއް ކަަމަށް ބުނެފައިވާ އިރު، އޭނާ އަކީ މަޖިލީހުގެ ހާޒިރީގައި އަބަދުވެސް އެންމެ ދަށުގައި އުޅުއްވާ އެއް ބޭފުޅާ އެވެ.

މިދިޔަ އަހަރުގެ ފަހު ދައުރުގެ 36 ޖަލްސާގެ ތެރެއިން ސިޔާމް ހާޒިރުވެވަޑައިގަތީ ފަސް ޖަލްސާއަށެވެ. މި އަހަރުގެ ފުރަތަމަ ދައުރުގެ 37 ޖަލްސާގެ ތެރެއިން ސިޔާމް ހާޒިރުވެވަޑައިގަތީ ހަތަރު ޖަލްސާއަށެވެ.

ހުކުމާ އެއްގޮތަށް ފައިސާ ނުދައްކާތާ 8 އަހަރުވީ މައްސަލާގައި ސިންގަޕޫރުގެ ހައި ކޯޓުގައި ހިނގާ މައްސަލައިގެ ތެރެއަށް ސިޔާމްގެ ދިފާއުގައި ދިވެހި ސަރުކާރުން ވަން ސަބަބާ ގުޅޭ ގޮތުން ފޮރިން މިނިސްޓްރީގެ މިހާތަނަށް ޖަވާބެއް ނުދެ އެވެ.

ސިންގަޕޫރު އާބިޓްރޭޝަނުން ހިލްޓަނާ އެއްކޮޅަށް މައްސަލަ ނިންމާފައި ވަނިކޮށް ސިވިލް ކޯޓުން 2017 ވަނަ އަހަރު ވަނީ ސަން ޓްރެވަލްސްއަށް 16 މިލިއަން ޑޮލަރުގެ ބަދަލެއް ދޭން ހިލްޓަންގެ މައްޗަށް ހުކުމްކޮށްފަ އެވެ. އެކަމަކު އެ ހުކުމް ހައި ކޯޓުން ބާތިލުކުރުމުން އަލުން ސިވިލް ކޯޓަށް މައްސަލަ ހުށަހެޅުމުން ނިމުނީ ހިލްޓަން ކޮޅަށެވެ.

ސިޔާމްގެ ޕާސްޕޯޓް ސިންގަޕޫރުން ހިފެހެއްޓިއިރު، ސަން ޓްރެވަލްސް ކުންފުނިން ހިލްޓަން އިންޓަނޭޝަނަލަށް 24 މިލިއަން ޑޮލަރު (370 މިލިއަން ރުފިޔާ) ދައްކަން ސިންގަޕޫރު އާބިޓްރޭޝަނުން އެންގި އެންގުން ތަންފީޒު ކުރުމުގެ މައްސަލާގައި ރާއްޖޭގެ ސިވިލް ކޯޓުން ވެސް ސިޔާމްގެ ޕާސްޕޯޓް ހިފަހައްޓަން އަމުރެއް ނެރުނެވެ.

ސިޔާމްގެ ޕާސްޕޯޓް ހިފަހައްޓަން މިދިޔަ އަހަރުގެ ފެބްރުއަރީ މަހު ސިވިލް ކޯޓުން އަމުރުކުރީ އެ މައްސަލާގައި ސަން ޓްރެވަލްސްގެ އެކައުންޓްތައް ފްރީޒްކޮށްގެން ވެސް ފައިސާ ނުލިބުމުންނެވެ.

އާބިޓްރޭޝަންގެ ނިންމުން ތަންފީޒު ކޮށްދޭން ހިލްޓަން ކުންފުނިން ސިވިލް ކޯޓަށް ހުށަހެޅުމުން އެ ކޯޓުން ނިންމީ އާބިޓްރޭޝަންގެ ނިންމުން ތަންފީޒު ކޮށްދެވޭނީ އެ މައްސަލަ ހައި ކޯޓަށް ހުށަހަޅައި، އެ ކޯޓުން ކުރާ ހުކުމަށް ފަހު ކަމަށެވެ. އެކަމަކު އަދި ހައި ކޯޓުން މިހާތަނަށް ވެސް ވަކި ގޮތެއް ނުނިންމަ އެވެ.

އާބިޓްރޭޝަން ގާނޫނު ބުނާ ގޮތުން ރާއްޖެއިން ބޭރުގައި ހިންގާފައިވާ އާބިޓްރޭޝަނެއްގައި ކަނޑައަޅާ އާބިޓްރަލް މައްސަލައެއް ރާއްޖޭގައި ތަންފީޒު ކުރެވޭނީ ރާއްޖޭގެ ކަމާ ބެހޭ ކޯޓަކަށް ހުށަހަޅައިގެންނެވެ. އެ ގާނޫނުގައި ކޯޓު މާނަކޮށްފައިވަނީ ހައި ކޯޓަށެވެ.