ހިފެހެއްޓި ދެ ބޯޓު ގެނެވޭނެ ކަމުގެ ޔަގީންކަން މިނިސްޓްރީން ދޭ: ގަސަމް

މިސްރުގައި ބަނދެގެން ރާއްޖެއަށް ގެންނަނިކޮށް، މޫސުން ގޯސްވެގެން އެފްރިކާގެ އެރިތުރިއާގައި ބަނދަރުކުރުމުން އެ ގައުމުގައި ހިފަހައްޓާފައިވާ ފިއުލް ސަޕްލައިސް މޯލްޑިވްސް (އެފްއެސްއެމް) ގެ ދެ ޓަގު ބޯޓު ގެނެވޭނެ ކަމުގެ ޔަގީންކަން ރާއްޖޭގެ ފޮރިން މިނިސްޓްރީން ދޭ ކަމަށް އެ ކުންފުނިން މިއަދު ބުނެފި އެވެ.

އެ ދެ ބޯޓު އެރިތުރިއާގައި ބަނދަރުކުރީ އޭޕްރީލް މަހުގެ 26 ވަނަ ދުވަހު އެވެ. އެ ގައުމުގެ ސިފައިން އެ ދެ ބޯޓު ހިފެހެއްޓީ ހުއްދަ ނުހޯދައި އެރިތުރިއާއަށް އެތެރެވި ކަމަށް ބުނެ އެވެ.

ބޯޓުގައި ތިބި ފަޅުވެރިން ވަނީ ރާއްޖެ ގެނެސްފަ އެވެ. ނަމަވެސް އެ ދެ ބޯޓު ގެނެވޭނެ ގޮތެއް ނެތް ކަމަށާއި އެފްއެސްއެމްގެ އޮފިޝަލުންނަށް އެ ގައުމަށް ދެވޭނެ ގޮތެއް ވެސް ނެތް ކަމަށް އެ ކުންފުނިން ވަނީ ބުނެފަ އެވެ.

އެފްއެސްއެމްގެ މެނޭޖިން ޑިރެކްޓަރު މުހައްމަދު ގަސަމް މިއަދު ވިދާޅުވީ އެ ގައުމަށް ގޮސްގެން މައްސަލަ ހައްލުކުރަން ކުރިން ވިސްނި ނަމަވެސް, އެ ގައުމުން އެއްބާރުލުން ނުދޭތީ އެކަން ވެސް ނުވި ކަމަށެވެ.

"ގާނޫނީ ގޮތުން ކުރިއަށް ދާން އަޅުގަނޑުމެން މިހާރު މަސައްކަތް މި ކުރަނީ. މިހާރު އެކޮޅުން ލޯޔަރެއް ވެސް ހަޔާކޮށްގެން އެކަންތައް ކުރިއަށް އެބަދޭ،" ގަސަމް ވިދާޅުވި އެވެ.

އޭނާ ވިދާޅުވީ ބޯޓު ގެނައުމަށް މަޝްވަރާތައް ފޮރިން މިނިސްޓްރީއާ އެކު ވެސް ކުރިއަށްދާ ކަމަށެވެ.

"ފޮރިން މިނިސްޓްރީން ވަރަށް މަސައްކަތް ކުރޭ އެބަ ބޯޓުތައް ގެނައުމަށް. މިނިސްޓަރު ވެސް އެކަމަށް އުޅުއްވާ. މިނިސްޓްރީން ޔަގީންކަންދޭ ބޯޓުތައް ގެނެވޭނެ ކަމަށް." ގަސަމް ވިދާޅުވި އެވެ.

ގަސަމް ވިދާޅުވީ އެރިތުރިއާއަކީ ދުނިޔޭގެ އެއްވެސް ގައުމަކާ ގުޅުން ރަނގަޅު ގައުމަކަށް ނުވާތީ މައްސަލަ ހައްލުކުރުމުގައި ދަތިތަކެއް ކުރިމަތިވެފައިވާ ކަމަށެވެ.

އެރިތުރިއާގައި ހިފަހައްޓާފައިވަނީ 2019 ވަނަ އަހަރު އެފްއެސްއެމް އިން އޯޑަރު ދިން ހަތަރު ބޯޓުގެ ތެރެއިން ދެ ބޯޓެވެ.

އެެއިން ކޮންމެ ބޯޓެއް ބަންނަން ހޭދަކޮށްފައިވަނީ 753،000 ޑޮލަރެވެ. އެއީ 180،000 ލީޓަރުގެ ޑީސަލް އަދި 40،000 އާއި 60،000 ލީޓަރުގެ ޕެޓްރޯލް ރައްކާކުރެވޭނެ ކެޕޭސިޓީ ހުރި ބޯޓުތަކެއް ކަމަށް އެފްއެސްއެމް އިން ބުނެފައިވެ އެވެ.