ކުޅުދުއްފުށި ސިޓީ ކައުންސިލްގެ ހުރިހާ މެމްބަރުން މެމްބަރުން ދަ ޑިމޮކްރެޓްސް އަށް

ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ ފިކުރުގެ އިސް ބޭފުޅުންތަކެއް އުފައްދަން މަސައްކަތް ކުރައްވާ އާ ސިޔާސީ ޕާޓީ އަށް ހދ. ކުޅުދުއްފުށި ސިޓީ ކައުންސިލްގެ ހުރިހާ މެމްބަރުން ސޮއިކުރައްވައިފި އެވެ.

އެމްޑީޕީގެ ޕްރައިމަރީގެ ބޮޑު ނާކާމިޔާބީ އަށް ފަހު ނަޝީދު އުފެއްދި "ފިކުރެއްގެ ދިރުން" ފެކްޝަނުން "ދަ ޑިމޮކްރެޓްސް" ގެ ނަމުގައި އާ ޕާޓީއެއް އުފެއްދުމުގެ ހުއްދަ އިލެކްޝަންސް ކޮމިޝަނުން ވަނީ ދީފަ އެވެ. އާ ޕާޓީ ރަޖިސްޓަރީ ކުރަނީ ވަނީ އެމްޑީޕީގެ ކުރީގެ ޗެއާޕާސަން އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފްގެ ނަމުގަ އެވެ.

އާ ޕާޓީ އުފެއްދުމުގެ ހުއްދަ އިލެކްޝަންސް ކޮމިޝަނުން ލިބުމާ އެކު، ޕާޓީއަށް މެމްބަރުން ހަމަކުރުމުގެ މަސައްކަތް ކުރަމުން އަންނައިރު އެމްޑީޕީގެ ތާއީދު ބޮޑު ކުޅުދުއްފުށި ސިޓީ ކައުންސިލުގެ ހުރިހާ މެމްބަރުން މިހާރު ވަނީ "ދަ ޑިމޮކްރެޓްސް" އާ ގުޅިވަޑައިގެންފަ އެވެ.

ހަސަން މިއަދު ކުރެއްވި ޓްވީޓެއްގައި ވިދާޅުވީ، ކުޅުދުއްފުށީގެ މޭޔަރު މުހައްމަދު އާތިފާ އެކު، އެ ރަށުގެ ހުރިހާ ކައުންސިލް މެމްބަރުން "ދަ ޑިމޮކްރެޓްސް" އާ ގުޅިވަޑައިގަތުމަކީ ލިބިވަޑައިގެންނެވި ބޮޑު އުފަލެއް ކަމަށާއި އެއީ ކާމިޔާބީއެއް ކަމަށެވެ.

ކުޅުދުއްފުށީ ސިޓީ ކައުންސިލްގެ ހުރިހާ މެމްބަރުން ކުރިން ތިއްބެވީ އެމްޑީޕީގަ އެވެ.

"ދަ ޑިމޮކްރެޓްސް" އަށް މެމްބަރުން ހަމަކުރުމުގެ މަސައްކަތް ކުރަމުން އަންނައިރު ސަރުކާރުގެ މަގާމުތަކުގައި ތިއްބެވި އެމްޑީޕީގެ ބައެއް ސިޔާސީ ބޭފުޅުން ވެސް ވަނީ ނަޝީދުގެ ފިކުރުގެ ޕާޓީއާ ގުޅިވަޑައިގެންފަ އެވެ. އެހެންވެ، އެ ބޭފުޅުން މިހާރު ވަނީ ސަރުކާރުގެ މަގާމުތަކުން ވަކިކުރައްވައިފަ އެވެ.

އާ ޕާޓީއެއް އުފައްދަން މަސައްކަތް ފެށީ ރައްޔިތުންގެ މަޖިލީހުގެ އެމްޑީޕީގެ 12 މެމްބަރަކު އެ ޕާޓީން ވަކިވެވަޑައިގަތުމަށް ފަހު އެވެ. އެ މެމްބަރުން ޕާޓީ ދޫކުރައްވައި ވިދާޅުވީ އެމްޑީޕީ އޮތީ ވަކި ބަޔަކު ބޭނުންވާ ގޮތަށް ހައިޖެކްކޮށްފައި ކަމަށާއި އެ ޕާޓީ އުފެއްދި މަގްސަދާއި ވަކާލާތުކުރާ ޑިމޮކްރަސީގެ އުސޫލްތަކާއި ހަމަތައް ޕާޓީ ތެރެއިން ގެއްލިފައިވާ ކަމަށެވެ. މި އަހަރުގެ ސެޕްޓެމްބަރު މަހު އޮންނަ ރިޔާސީ އިންތިހާބަށް ދަ ޑިމޮކްރެޓްސް އިން ކެންޑިޑޭޓަކު ނެރޭނެކަން އިއުލާންކޮށްފައިވާއިރު ގިނަ ބަޔަކު ގަބޫލުކުރަނީ އެ ކެންޑިޑޭޓަކީ ނަޝީދު ކަމަށެވެ. އެކަމަކު އެ މަނިކުފާނު އަދިވެސް ހުންނެވީ އެމްޑީޕީގަ އެވެ.