ކަރަންޓާއި ކުނީގެ ބިލު އެއްކޮށްލުމުގެ އެއްބަސްވުމުގައި ސޮއިކޮށްފި

މާލެ ސަރަހައްދުގެ ގެތަކުގެ ކަރަންޓާއި ކުނީގެ ބިލް އެއްކޮށްލަން ސްޓެލްކޯ އާއި ވެމްކޯއާ ދެމެދު އެއްބަސްވުމެއްގައި މިއަދު ސޮއިކޮށްފި އެވެ.

އަންނަ މަހުން ފެށިގެން ދެ ބިލް އެއްކޮށްލައިގެން ފޮނުވަން ވަނީ ނިންމައިފަ އެވެ. މިންގަނޑު ކަނޑައެޅިއިރު ކަރަންޓު ބިލަށް 34 ޔުނިޓަށް ވުރެ މަދުން އަރާނަމަ ބަލާފައި ވަނީ އެއީ ކުނި ނުއުފައްދާ ގެއެއްގެ ގޮތުގަ އެވެ.

ދެ ބިލު އެއްކޮށްލުމުގެ އެއްބަސްވުމުގައި ވެމްކޯގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު ޔޫސުފް ސިރާޖު އެވެ. ސްޓެލްކޯގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު ޝަރީފު އެވެ.

ކަރަންޓާއި ކުނީގެ ބިލު އެއްކޮށްލުމަށް ސްޓެލްކޯގައި ބޭއްވި ރަސްމިއްޔާތުގައި ވާހަކަ ދައްކަވަމުން ޝަރީފް ވިދާޅުވީ އެ ނިންމުމަކީ ގިނަ ބައެއްގެ މަޝްވަރާއަށް ފަހު ނިންމި ނިންމުމެއް ކަމަށެވެ. ސްޓެލްކޯގައި ރަޖިސްޓްރީ ކޮށްފައިވާ ހުރިހާ މީޓަރުތަކެއް މިހާރު ވަނީ ވެމްކޯގެ ބިލް އެއްކޮށްލެވޭ ގޮތަށް ހަދާފައި ކަމަށް އޭނާ ވިދާޅުވި އެވެ.

ޝަރީފް ވިދާޅުވީ މިއީ އަލަށް ފަށައިގަންނަ މަސައްކަތަކަށް ވުމުން މައްސަލަތައް ހުންނާނެ ކަމަށެވެ.

ވެމްކޯގެ އެމްޑީ ސިރާޖު ވިދާޅުވީ ކުނީގެ ބިލު، ކަރަންޓު ބިލުގައި ހިމެނުމުން ބިލު ދެއްކުމަށް އާންމުންނަށް ވަރަށް ބޮޑުތަން ފަސޭހަވެގެން ދާނެ ކަމަށެވެ.

ކުރިއަށްއޮތްތަނުގައި ވެސް ކުނި ނަގާނީ ގޭގޭގެ ދޮރުމަތިންނެވެ. ސިރާޖު ވަނީ ކުނި ބޭރަށް ނެރެފައި ނުބެހެއްޓުމަށް އެދިވަޑައިގެންފަ އެވެ.

އަންނަ މަހުގެ ފުރަތަމަ ދުވަހުން ފެށިގެން، އެޕާޓްމަންޓްތަކަށް އަރައި ކުނި ނަގާ އަގެއްގެ ގޮތުގައި ކަނޑައަޅާފައި ވަނީ ދުވާލަކަށް 4.93ރ. އެވެ. އެހެންވެ ކަރަންޓު ބިލުގައި އެ ފައިސާ ހިމަނާނެ އެވެ. ވެމްކޯއިން ބުނެފައި ވަނީ މާލޭގައި 53,690 ގޭބީސީ ހުންނައިރު ފީ ދައްކަނީ އެންމެ 21،000 ގޭބީސީންނެވެ. އެހެންކަމުން ކުނި އުކުމުގެ ފީ 62 ޕަސެންޓް ގޭބީސީން ނުދައްކަ އެވެ. މިއީ އެ މައްސަލައަށް ހައްލު ލިބޭނެ ކަމެއް ކަމަށް ވެމްކޯއިން ވަނީ ބުނެފައި އެވެ.