އަހަރުގެ ފުރަތަމަ ކުއާޓަރުގައި 5،000 އަށް ވުރެ ގިނަ މައްސަލަ؛ އެންމެ ގިނައީ ވައްކަން!

މި އަހަރުގެ ފުރަތަމަ ކުއާޓަރުގައި އެންމެ ގިނައީ ވައްކަމުގެ މައްސަލަތައް ކަން ފުލުހުންގެ ތަފާސްހިސާބުތަކުން ދައްކައިފި އެވެ.

މިއަދު އާންމުކުރި މި އަހަރުގެ ފުރަތަމަ ތިން މަސްދުވަހުގެ ތަފާސްހިސާބުތައް ދައްކާ ގޮތުގައި، އެ މުއްދަތުގައި 5،805 މައްސަލައެއްގެ ރިޕޯޓް ފުލުހުންނަށް ލިބިފައި ވެ އެވެ. އޭގެ ތެރެއިން މައްސަލަ ފައިލްކޮށް، ތަހުގީގުކުރީ 3،508 މައްސަލައިގެ އެވެ.

• ތަހުގީގުކުރި މައްސަލަތަކުގެ ތެރެއިން 2،520 މައްސަލަ ހުށަހަޅާފައި ވަނީ މާލެ ސަރަހައްދުން.

• 1،034 މައްސަލައިގެ ތަހުގީގު ނިމުނު.

• 136 މައްސަލައެއްގައި ހިމެނޭ މީހުންނަށް ދައުވާ ކުރަން ފޮނުވި.

ފުލުހުން ބުނީ، ވައްކަމާއި ފޭރުމާ ގުޅޭ 2،079 މައްސަލައެއްގެ ރިޕޯޓް ލިބުނު ކަމަށެވެ. އޭގެ ތެރެއިން މައްސަލަ ފައިލްކޮށް، ތަހުގީގު ކުރީ 964 މައްސަލައިގެ އެވެ. ތަހުގީގު ކުރި މައްސަލަތަކުގެ ތެރެއިން 304 މައްސަލަ ނިންމައި، 25 މައްސަލައެއްގައި ހިމެނޭ މީހުންނަށް ދައުވާކުރަން ފޮނުވި އެވެ. ވައްކަމުގެ 153 މައްސަލައަކާ ގުޅިގެން މީހުން ހައްޔަރު ވެސް ކުރި އެވެ.

އެންމެ ގިނައިން ވައްކަން ކޮށްފައި ހުރީ މީހުން ދިރިއުޅޭ ގޭގެއިންނެވެ. ގޭގެއިން ވައްކަން ކޮށްގެން 159 މައްސަލައެއް ފުލުހުންނަށް ރިޕޯޓްކުރި އެވެ. ދެން އެންމެ ގިނައީ މޯބައިލް ފޯނާއި ސައިކަލު ވަގަށް ނެގުމުގެ މައްސަލަތަކެވެ. ފޯނު ވަގަށް ނެގުމުގެ 105 މައްސަލައަކާއި ސައިކަލް ވަގަށް ނެގުމުގެ 103 މައްސަލައެއް ފުލުހުންނަށް ހުށަހެޅި އެވެ.

ކުށުގެ ތަފާސްހިސާބުތަކުގެ ތަފުސީލު

• ވައްކަމުގެ 2،079 މައްސަލަ.

• މަސްތުވާތަކެތީގެ 1،154 މައްސަލަ.

• މަގުމަތީ އެކްސިޑެންޓުތަކުގެ 1،096 މައްސަލަ.

• ޖިސްމާނީ އަނިޔާކުރުމުގެ 402 މައްސަލަ.

• އެކި ބާވަތުގެ އިންޒާރު ދިނުމުގެ 333 މައްސަލަ.

• ސައިބާކްރައިމާއި ބްލެކްމެއިލް އާއި މަކަރާ ހީލަތުގެ 286 މައްސަލަ.

• ކުޑަކުދިންނަށް އެކި ބާވަތުގެ އަނިޔާކުރުމުގެ 190 މައްސަލަ.

• ގެވެށި އަނިޔާގެ 146 މައްސަލަ.

• ޖިންސީ އަނިޔާކުރުމުގެ 119 މައްސަލަ.

10،000 ވުރެ ގިނަ ވެހިކަލްގައި ސްޓިކާ ޖެހި

ޓްރެފިކްގެ މައްސަލަތަކަށް ބަލާއިރު އެންމެ ގިނައީ ލައިސެންސް ނެތި ވެހިކަލް ދުއްވާ މީހުންގެ މައްސަލަތަކެވެ. ލައިސަންސް ނެތި 824 މީހަކު ވެހިކަލް ދުއްވި އެވެ. ގަވާއިދާ ހިލާފަށް ޕާކުކޮށްގެން ފުލުހުން ވަނީ 10،617 ވެހިކަލެއްގައި ސްޓިކާ ވެސް ޖަހައިފަ އެވެ.

ޕާކިންގެ މައްސަލައަކީ މާލޭގައި ވަރަށް ބޮޑުވެފައި އޮތް މައްސަލައެކެވެ. މާލޭގައި ޕާކުކުރާނެ ޖާގަ ނެތްއިރުގައި ސްޓިކާ ޖަހާތީ، އެ މައްސަލާގައި އާންމުންގެ ފާޑުކިޔުން ސަރުކާރާއި ފުލުހުންނަށް ވަރަށް ބޮޑަށް އަމާޒުވެ އެވެ.

އިޖުތިމާއީ ބޮޑު މައްސަލައަކަށް ވެފައިވާ މަސްތުވާތަކެތީގެ ތަފާސްހިސާބުތަކުން އެނގުނު ގޮތުގައި، ފުލުހުން ވަނީ އެކި މައްސަލަތަކުގައި ނުވަ ކިލޯގެ ކެނަބިސް އާއި 3.1 ކިލޯގެ ކޮކެއިން އާއި 2.2 ކިލޯގެ ހިރޮއިން އަދި އެހެނިހެން ބާވަތުގެ 2.2 ކިލޯގެ މަސްތުވާތަކެތި އަތުލައިގަނެފަ އެވެ.