ޔާމީންގެ ސަޕޯޓަރުން ޝަކުވާ ކުރާތީ ޖަމީލް ރުޅިގަދަވެއްޖެ!

އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީންގެ ޝަރީއަތްތަކާ ގުޅޭ ގޮތުން އެ މަނިކުފާނުގެ ސަޕޯޓަރުން ޝަކުވާ ކުރާތީ ޔާމީންގެ ވަކީލު އަދި ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ރޭ ނުރުހުން ފާޅުކުރައްވައިފި އެވެ.

ޕީޕީއެމްގެ ޖަގަހަ ޖަލްސާގައި ޖަމީލް ވިދާޅުވީ، އާރަށް މައްސަލާގައި ހައި ކޯޓުގެ އިސްތިއުނާފް ލަސްވާތީ އާއި އެހެން މައްސަލަތަކުގައި އެ ޕާޓީގެ ސަޕޯޓަރުން އެ މަނިކުފާނާ ސުވާލު ކުރާ ކަމަށެވެ. މަގުމަތިން ދިމާވާ ކޮންމެ ފަހަރަކު ވަރަށް މާޔޫސް ކަމާއެކު އެ ޝަކުވާ އިވިވަޑައިގަންނަވާ ކަމަށް ވިދާޅުވި އެވެ.

ޕީޕީއެމްގެ އޮފީހުގައި ބޭއްވި ޖަލްސާގައި ރޭ ތިބި އެ ޕާޓީގެ ލީޑަޝިޕާއި ސަޕޯޓަރުންނަށް އިޝާރަތް ކުރައްވައި ޖަމީލް ވިދާޅުވީ، ޔާމީންގެ ޝަރީއަތްތަކާ ގުޅޭ ގޮތުން އެ ގޮތަށް ޝަކުވާ ކުރާތީ އެ މީހުންނާ މެދު ބައެއް ފަހަރު ވަރަށް ބޮޑަށް ހިތްހަމަޖެހިވަޑައިނުގަންނަވާ ކަމަށެވެ.

"ބަލަގަ މިކަން ވާތީ މިހެން މި ވަނީ. މި ކަމުގެ ނިޝާނެއް ރައީސް ޔާމީނަށް މި ތަކުލީފް އައުމަކީ. މި ގޮތަށް މި ތަކުލީފް އަންނަނީ ކީއްވެގެންތޯ ތިބޭފުޅުން ސުވާލު ކޮށްލާ. ތިބޭފުޅުންގެ ސުވާލުތައް އަތޮޅުތަކުގެ ތެރެއިން ވެސް އަންނާތީ އަޅުގަނޑަށް ވަރަށް ބޮޑު މައްސަލައަކަށް އެބަވޭ،" ޖަމީލް ވިދާޅުވި އެވެ.

ޕީޕީއެމްގެ ލީޑަޝިޕްގެ ބޭފުޅުންނާއި ސަޕޯޓަރުން ވެސް ފުރަތަމަ ކަމަކަށް އިތުބާރު ކުރަން ޖެހޭ ކަމަށް ވެސް ޖަމީލް ވިދާޅުވި އެވެ.

ހައި ކޯޓަށް ހުށަހަޅާފައިވާ އިސްތިއުނާފްގެ މައްސަލަ ލަސްވަނީ ދަށު ކޯޓުގެ ފަނޑިޔާރުން ވިދާޅުވާ އެއްވެސް ހެއްކެއް އެއްވެސް ދިމާލަކުން ފެންނަން ނެތުމުން ކަމަށް އެ މަނިކުފާނު ވިދާޅުވި އެވެ.

"ތި ގޮތަށް ތި ވާހަކަ ދައްކާތީ އޭ އަޕްސެޓް މިވަނީ،" ޔާމީންގެ ސަޕޯޓަރުންގެ ޝަކުވާތަކާއި ސުވާލުކުރުންތަކާ ގުޅިގެން، ވަރަށް ބޮޑަށް ޖަޒުބާތުގައި ޖެހިވަޑައިގެން ޖަމީލް ވިދާޅުވި އެވެ.

އެ މަނިކުފާނު ވަނީ ޔާމީން މިނިވަން ވާނެ ކަމަށް ގަބޫލުފުޅު ކުރައްވާ ސަބަބު ވެސް ވިދާޅުވެފަ އެވެ. އެއީ އަމިއްލަ އަށް ވިދާޅުވާ ވާހަކަފުޅެއް ނޫން ކަމަށާއި ވޮޑަމުލާގެ މައްސަލާގައި ސުޕްރީމް ކޯޓުން ކޮށްފައިވާ ހުކުމް އޮތް ގޮތުން ޔާމީން މިނިވަން ވާނެ ކަން ވަރަށް ޔަގީން ވާ ކަމަށް ޖަމީލް ވިދާޅުވި އެވެ.