އެޓާނީ ޖެނެރަލް ރިފްއަތުގެ އިތުބާރު ނެތް ކަމުގެ މައްސަލަ ހުށަހަޅައިފި

ޗާގޮސް މައްސަލައިގައި ރާއްޖޭގެ ކަނޑުގެ ސަރަހައްދުން ބައެއް ވިއްކާލާފައިވާ ކަމުގެ ތުހުމަތާ އެކު ރައީސް އިބްރާހިމް މުހައްމަދު ސޯލިހާއި ފޮރިން މިނިސްޓަރު އަބްދުﷲ ޝާހިދުގެ އިތުރުން އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް ކަމުގެ ވޯޓު ނެގުމުގެ މަސައްކަތް އިދިކޮޅު ޕާޓީތަކުން ފަށައިފި އެވެ.

މަޖިލީހުގައި ކުރިއަށްދާ ޕްރެސް ކޮންފަރެންސްގައި އިދިކޮޅު ޕާޓީތަކުން ބުނީ ރިފްއަތުގެ މައްސަލަ މަޖިލީހަށް ވައްދާފައިވާ ކަަމަށެވެ. ވަރަށް އަވަހަށް ރައީސް އާއި ޝާހިދުގެ މައްސަލަ ވެސް ހުށަހަޅާނެ ކަަމަށެވެ.

އިތުބާރު ނެތް ކަމުގެ މައްސަލަ ވެއްދީ، ޕީޕީއެމާއި ޖުމްހޫރީ ޕާޓީ އާއި އެމްއެންޕީގެ އިތުރުން މަޖިލީހުގެ ރައީސް މުހައްމަދު ނަޝީދާ އެކު ތިއްބެވި އެމްޑީޕީގެ މެމްބަރުންގެ ތާއީދާ އެކުގަ އެވެ.

މަޖިލީހުގައި، ވަޒީރެއްގެ އިތުބާރު ނެތްކަމަށް ފާސްވާނީ ޖުމްލަ މެމްބަރުންގެ ދެބައިކުޅަ އެއްބައި މެމްބަރުންގެ އަޣުލަބިއްޔަތު ލިބިގެންނެވެ. އެއީ މަޖިލީހުގެ 87 މެމްބަރުންގެ ތެރެއިން 43 މެމްބަރުންގެ ވޯޓުންނެވެ.

ރިފްއަތުގެ އިތުބާރު ނެތް ކަމުގެ މައްސަލަ ހުށަހެޅި ސަބަބުތަކާ ބެހޭގޮތުން ވާހަކަ ދައްކަވަމުން މަޑުއްވަރީ ދާއިރާގެ މެންބަރު އާދަމް ޝަރީފް ވިދާޅުވީ، ޗާގޮސްގެ މައްސަލަ ކުރިއަށް ގެންދިޔަ އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) ގައި ބަންޑާރަނައިބުގެ ހައިސިއްޔަތުން ރިފްއަތު ލީޑް ކުރެއްވި ގާނޫނީ ޓީމުން ވަކާލާތު ކުރީ ރާއްޖޭގެ ހިމާޔަތުގައި ނޫން ކަމަށެވެ.

ބަދަލުގެ ގޮތުގައި ބޮޑެތި އަދަދުތަކުން އެކި ފަރާތްތަކަށް ސަރުކާރުން ފައިސާ ދިން މައްސަލަ ވެސް ރިފްއަތާ ދެކޮޅަށް ހުށަހެޅި އިތުބާރު ނެތް ކަމުގެ މައްސަލައިގައި ހިމަނާފައިވާ ކަމަށް އާދަމް ޝަރީފް ވިދާޅުވި އެވެ.

އޭނާ ވިދާޅުވީ ބަދަލު ދިނުމުގެ މައްސަލައިގައި މިނިވަން މުއައްސަސާތަކަށް ވެސް ރިފްއަތު ނުފޫޒު ފޯރުވުމަކީ ކުރައްވައިގެން ހުންނެވި ބަންޑާރަނައިބުކަމުގެ ހުވަޔާ ހިލާފް ކަމެއް ކަމަށެވެ.

"އެމަނިކުފާނު [ރިފްއަތު] ކުރައްވައިގެން ހުންނެވި ހުވަޔާ ހިލާފުވެފައި ވާތީ މި ތަނުގައި ތިއްބެވި އަދި މަޖިލީހުގެ [ބައެއް] އެހެން މެންބަރުންނަށް ވެސް ގަބޫލު ކުރެވުނީ އެޓާނީ ޖެނަރަލް އިބްރާހިމް ރިފްއަތުގެ އިތުބާރު މިހާރު އަޅުގަނޑުމެންނަށް ނެތް،" އާދަމް ޝަރީފް ވިދާޅުވި އެވެ.

"...އެޔާ އެކީގައި މި މައްސަލަ މަޖިލީހަށް ވެއްދުމަކީ އަޅުގަނޑުމެން ކުރަން ޖެހޭ ކަމެއްކަމަށް ވާތީވެ ދިވެހިރާއްޖޭގެ ގާނޫނު އަސާސީގެ 101 ވަނަ މާއްދާގެ ހ އަދި އާއި ރައްޔިތުންގެ މަޖިލީހުގެ ގަވާއިދުގެ 207 ވަނަ މާއްދާގެ ދަށުން އަޅުގަނޑުމެން މި މައްސަލަ މި ހުށަހެޅީ."

ރައްޔިތުންގެ މަޖިލީހުގެ އެމްޑީޕީގެ 68 މެމްބަރުންގެ ތެރެއިން، ރައީސް އިބްރާހިމް މުހައްމަދު ސޯލިހާ އެކު 55 މެމްބަރުން އެބަތިއްބެވި އެވެ.

އެހެންކަމުން، އިތުބާރު ނެތް ކަމުގެ މައްސަލަ މަޖިލީހަށް ވެއްދިޔަސް އިދިކޮޅުގައި ތިބި އަދަދަށް ބަލާއިރު އަދި ހަމަވަނީ، 28 ވޯޓެވެ.

އިދިކޮޅު ޕާޓީތަކުގައި މެމްބަރުން ތިބި އަދަދު

ޕީޕީއެމް : 6

ޕީއެންސީ: 2

ޖުމްހޫރީ ޕާޓީ: 2

އެމްއެންޕީ: 3

މަޖިލިސް ރައީސް ނަޝީދާ އެކު ތިއްބެވި އެމްޑީޕީ މެމްބަރުން: 13

އިތުބާރު ނެތް ކަމުގެ މައްސަލަ ހުށަހަޅަން ސޮއި ކުރެއްވީ ކިހާ މެންވަރުންނެއްތޯ ނޫސްވެރިން ތަކުރާރުކޮށް ސުވާލު ކުރެއްވުމުން ވެސް ޕްރެސް ކޮންފަރެންސްގައި ބައިވެރިވެ ވަޑައިގެންނެވި އެއް ވެސް ބޭފުޅަކު އެ ސުވާލަށް ޖަވާބެއް ނުދެއްވި އެވެ.

ޕީޕީއެމްގެ ޕާލަމެންޓްރީ ގްރޫޕްގެ ލީޑަރު، އޭދަފުށީ ދާއިރާގެ މެމްބަރު އަހްމަދު ސަލީމް ވިދާޅުވީ އިތުބާރު ނެތް ކަމުގެ މައްސަލަ މަޖިލީހަށް ހުށަހަޅަން ސޮއި ކުރެއްވި މެމްބަރުންގެ އަދަދު 10 އަށް ވުރެން އިތުރު ކަމަށެވެ. ގާނޫނުއަސާސީގައި އޮންނަ ގޮތުން އިތުބާރު ނެތް ކަމުގެ މައްސަލަ 10 މެމްބަރުންގެ ސޮޔާއެކު ހުށަހެޅިދާނެ އެވެ.

"މަގާމުން ވަކިކުރެވޭ ވަރަށް [މެމްބަރުންގެ] އަދަދު ހަމަކުރެވޭނެ ކަމުގެ އުއްމީދު ވަރަށް ބޮޑު،" ސަލީމް ވިދާޅުވި އެވެ.

އާދަމް ޝަރީފް ވިދާޅުވީ އިތުބާރު ނެތް ކަމުގެ ވޯޓުތައް ފާސްކުރަން ބޭނުންވާ އަދަދަށް މެމްބަރުން ހަމަކުރުމުގެ މަސައްކަތް ކުރަމުން އަންނަ ކަމަށެވެ.

އޭނާ ވިދާޅުވި ގޮތުގައި ރިފްއަތުގެ މައްސަލަ މަޖިލީހަށް ވެއްދީ ސިޔާސީ ހުރިހާ ކަމެއްގައި ހައްލުތަކެއް ހޯދާކަށް ނޫނެވެ. ރާއްޖެއިން ގެއްލިގެން ދިޔަ ސަރަހައްދެއްގެ މައްސަލައަށް ހައްލު ހޯދަން ކަމަށް ވިދާޅުވި އެވެ.