ދިރާގުން ކޮންމެ ހަފްތާއަކު "މައިޑިއާ"ގެ ބޮޑު ހޯމް ޕެކެއް

މި ރޯދަ މަހާ ދިމާކޮށް ދިރާގުގެ ކަސްޓަމަރުންނަށް ކޮންމެ ހަފުތާއަކު ވެސް 'ބޮޑު ހަދިޔާ' އެއް ދޭން ނިންމައިފި އެވެ. ދިރާގުން ބުނީ ޕްރީޕެއިޑް، ޕޯސްޓްޕެއިޑް، މޯބައިލް ބްރޯޑްބޭންޑް އަދި ފައިބާ ބްރޯޑްބޭންޑް ގެންގުޅޭ އެކްޓިވް ކަސްޓަމަރުންގެ ތެރެއިން ގުރުއަތުން ހޮވޭ ހަތަރު ފަރާތަކަށް 'މައިޑިއާ' ބްރޭންޑްގެ އަގުހުރި ހޯމް އެޕްލައިންސް ޕެކޭޖެއް ލިބޭނެ ކަމަށެވެ. އެ ޕެކޭޖުގައި ހިމެނޭނީ އޮޓޮމެޓިކް ދޮންނަ މެޝިނަކާއި ހަތަރު ދޮރު ލީ އައިސް އަލަމާރި އަކާއި ޑިޝްވޮޝާއެއްގެ އިތުރުން އަވަނާއި މައިކްރޮވޭވް އާއި އެއާ ޕިއުރިފަޔާއެއްގެ އިތުރުން ވެކިއުމް ކްލީނާ އެކެވެ. އޭގެ އިތުރުން ވެސް ގޭތެރޭއަށް ބޭނުންވާ އެހެނިހެން ސާމާނު ވެސް ލިބޭނެ އެވެ.

ކޮންމެ ހަފްތާއެއްގެ އާދިއްތަ ދުވަހު ބޮޑު ހަދިޔާގެ ލަކީ ޑްރޯ އޮންނާނެ އެވެ. ނަސީބުވެރިޔާ ހޮވުމަށް ބާއްވާ އިވެންޓް ލައިވް ސްޓީމު ކުރަން ދިރާގުން ވަނީ ނިންމައިފަ އެވެ.

މި އިނާމުގެ އިތުުރުން 'ބޯނަސް މެގަ ހަދިޔާ' ގެ ނަމުގައި ދިރާގުގެ ހުރިހާ ކަސްޓަމަރުންގެ ތެރެއިން ނަސީބުވެރި އެއް ފަރާތަކަށް ދެ މީހެއްގެ އުމުރާ ދަތުރެއް ވެސް ދިނުމަށް ދިރާގުން ވަނީ ނިންމައިފަ އެވެ.

ދިރާގުން ކޮންމެ އަހަރަކު ވެސް އަންނަނީ ކަސްޓަމަރުންނަށް ޚާއްސަ އާ އޮފާތައް ގެނެސްދެމުންނެވެ.