ތަފާތު ކޮންސެޕްޓަކަށް ޗަމްޕާ އިން އާ ރިސޯޓެއް ހުޅުވަން ތައްޔާރުވަނީ

ރާއްޖޭގައި އެންމެ ފުޅާކޮށް ޓޫރިޒަމް ވިޔަފާރިކުރާ ކްރައުން އެންޑް ޗަމްޕާ އިން އާ ރިސޯޓެއް ހުޅުވަން ތައްޔާރުވެއްޖެ އެވެ.

ޗަމްޕާ ހުސައިން އަފީފާއި ޗަމްޕާ މުހައްމަދު މޫސާ (އުއްޗު) ގެ ހިއްސާ އޮންނަ ކުންފުނިން އަލަށް ހުޅުވަނީ ޅ.މާބިންހުރާގައި ހެދި "ޖަވަކަރަ އައިލެންޑް މޯލްޑިވްސް" އެވެ.

ދެ ރަށް ގުޅުވާލައިގެން ހަދާ އެ ރިސޯޓުގައި 290 ވިލާ ހުރެ އެވެ. ހޮސްޕިޓާލިޓީ ބައެއް ނޫސްތަކުން ބުނެފައިވާ ގޮތުގައި އެ ރިސޯޓު ހުޅުވަން ހަމަޖެހިފައިވަނީ އޮގަސްޓު މަހު އެވެ. ރިސޯޓް ހަދާފައިވާ ދެ ރަށް ގުޅުވާލަން 700 މީޓަރުގެ ބްރިޖެއް ވަނީ ހަދައިފަ އެވެ.

ނިއުސްވަޔާސްއަށް ދީފައިވާ އިންޓަވިއުއެއްގައި ކްރައުން އެންޑް ޗަމްޕާ ރިސޯޓްސްގެ ޑިރެކްޓާ އޮފް ސޭލްސް އެންޑް މާކެޓިން އަހުމަދު ޝާހީން ވިދާޅުވެފައިވަނީ ޖަވަކަރަ ރިސޯޓުގެ ކޮންސެޕްޓް އެ ކުންފުނީގެ ދަށުން ހިންގާ އެހެން ރިސޯޓުތަކާ ވަރަށް ތަފާތުވާނެ ކަމަށެވެ.

"އެ ރިސޯޓު ހާއްސަކޮށްފައިވަނީ އެންމެ މަތީފަންތީގެ ހިދުމަތްތައް ލިބޭގޮތަށް އާއިލާތަކަށް،" އޭނާ ވިދާޅުވި އެވެ.

އެ ރިސޯޓުގައި ގޮލްފް ދަނޑަކާއި ޓެނިސް އާއި ފުޓްސަލް ކުޅެން ހާއްސަ ދަނޑުތައް ވަނީ ހަދައިފަ އެވެ. މޫދު ކުޅިވަރުތަކާއި ސްޕާ ހިދުމަތްތަކާއި ދުނިޔޭގެ ގިނަ ގައުމުތަކެއްގެ ކެއުންތައް ވެސް އެ ރިސޯޓުން ލިބޭނެ އެވެ.

ކުންފުނިން ހިންގާ ރިސޯޓްތަކުގެ ތެރޭގައި ކުޑަދޫ މޯލްޑިވްސް، ހުރަވަޅި، ވެލިގަނޑު އައިލެންޑް ރިސޯޓް، ކޮމަންޑޫ ފަދަ ރިސޯޓުތައް ހިމެނެ އެވެ.