ސިއްހީ ދާއިރާގެ ކޮރަޕްޝަނާ ގުޅޭގޮތުން ޓްރާންސްޕޭރެންސީން ހެދި ދިރާސާ ރިޕޯޓް ނެރެފި

ސިއްހީ ދާއިރާގައި ކޮރަޕްޝަން އޮތް މިންވަރު ވަޒަންކޮށްދޭ ދިރާސާ ރިޕޯޓެއް ޓްރާންސްޕޭރެންސީ މޯލްޑިވްސް އިން މިއަދު ނެރެފި އެވެ.

މީރުމާގައި ބޭއްވި ރަސްމިއްޔާތުގައި އެ ދިރާސާ ރިޕޯޓު ނެރެދެއްވީ ރާއްޖޭގެ ސިއްހީ ދާއިރާގައި ގިނަ އަހަރުތަކެއް ވަންދެން މަސައްކަތްކުރެއްވި އަދި ޕަބްލިކް ހެލްތުގެ ތަޖުރިބާކާރު ޑރ. އަބްދުއްސައްތާރު ޔޫސުފެވެ.

އޭނާ ވިދާޅުވި ގޮތުގައި މީގެ 50 ވަރަކަށް އަހަރު ކުރިން މަސައްކަތްކުރައްވަން ފެއްޓެވިއިރު ފަސާދައަކީ އޭރު މާ ބޮޑަށް އޮންނަ އެއްޗެއް ނޫން ކަމަށެވެ. އޭރު ތަންތަން ބަލަން ދިއުމުން ހިލޭ ސައި ބޯން ލިބޭ ކަމަށާއި އެއީ އިންސްޕެކްޓަރަށް ލިބޭ އެއްޗެއް ކަމަށް އޭނާ ވިދާޅުވި އެވެ.

މެއްސެއް ނުވަތަ މީދަލެއް މަރާލިޔަސް އެއީ މައްސަލައެއް ނޫން ކަމަށް އެ މީހުން ބުނާ ކަމަށާއި އެކަމަކު މައްސަލަތައް އޭގެ ތެރޭގައި އޮންނާނެ ކަމަށް އޭނާ ވިދާޅުވި އެވެ.

ނަމަވެސް ބައި ގަރުނުގެ ތެރޭގައި އެތައް ކަމެއް ބަދަލުވެގެން ގޮސްފައިވާ ކަމަށް ވިދާޅުވެ، ސައްތާރު ވިދާޅުވީ މިހާރު ބަދަލުވަނީ ސައެއް ނުވަތަ ރުފިޔާއެއް ދެ ރުފިޔާއެއް ނޫން ކަމަށާއި މިހާރު ހުންނަނީ ހާހުން އަދި މިލިއަނުން ކަމަށެވެ.

"ކޮން ކަހަލަ ކަންތައްތަކެއްތޯ؟ ތި ވިދާޅުވާހެން ސިއްހީ ދާއިރާގެ ކަންތައްތައް ލަސްވެ، އޭގެ ޕާފޯމެންސް ދެރަވެ، އަގުބޮޑުވެ، މި ހުރިހާ ކަންތައްތައް ވެސް އެއީ ހިތަށް ނާރާ ފަދަ ނާޖައިޒު ގޮތުގައި ހިނގާ ކަންކަން،" ސައްތާރު ވިދާޅުވި އެވެ.

ރިޕޯޓުގައި ބުނީ ކޮރަޕްޝަންގެ ހިރާސްތައް ދެނެގަތުމަށް މައިގަނޑު ގޮތެއްގައި ބަލާފައިވަނީ ހަ ދާއިރާއަކުން ކަމަށެވެ. އެއީ؛

1- ސިއްހީ ދާއިރާ ހިންގުމާއި ރެގިއުލޭޓް ކުރުން

2- ހިދުމަތް ފޯރުކޮށްދިނުން

3- ހޮސްޕިޓަލުތަކުގެ ހިންގުން

4- ސިއްހީ ހިދުމަތްތެރިން

5- ސިއްހީ ދާއިރާއަށް ހޭދަކުރުން

6- ޕްރޮކިއުމަންޓާއި ސަޕްލައި ޗެއިން

އެގޮތުން، އެ ދިރާސާގައި ވަނީ ކޮރަޕްޝަނަށް މަގުފަހިވާ ގޮތަށް ހުރި 10 ހުރަހެއް ފާހަގަކޮށްފަ އެވެ؛ އެ ކަންތައްތަކަކީ؛

1- ސިއްހީ ދާއިރާގައި ހާމަކަން ކުޑަވުމުން ނިޒާމުތަކާއި އުސޫލުތައް ވަޒަންކުރަން އުނދަގޫވުން

2- ސިއްހީ ދާއިރާގެ އުސޫލުތަކާއި އިސް ސަފުގައި މަސައްކަތްކުރާ މީހުން އަވަސް އަވަހަށް ބަދަލުވުން

3- މަސްލަހަތު ފުށުއެރުން

4- ސިއްހީ ހިދުމަތުން ނާޖާއިޒު މަންފާ ނެގުން

5- ސިއްހީ ދާއިރާގެ ޕްރޮކިއުމަންޓުގެ މައްސަލަތައް ހުރުން

6- ބޭސް ފަރުވާއަށް ބޭރަށް ދަތުރުކުރުމުގައި މައްސަލަތައް ދިމާވުން

7- ލީޑަޝިޕް މަސްއޫލިއްޔަތު ސާފުނުވުމާއި ހިންގުމުގެ މުހިއްމު މަސައްކަތްތައް ކަނޑައެޅިފައި ނުހުރުން

8- ސިއްހީ ދާއިރާގެ ހިދުމަތްތެރިންނަށް އެކަށީގެންވާ އުޖޫރައާއި އިނާޔަތްތައް ނުލިބުން

9- އިންސާނީ ވަސީލަތުގެ ގޮންޖެހުންތައް ހުރުން

10- ސިއްހީ ދާއިރާ، ހާއްސަކޮށް އިސް މަގާމުތަކަށް މީހުން ރެކްރޫޓުކުރުމުގައި ގާބިލްކަމަށް އިސްކަން ނުދިނުން

ކޮރަޕްޝަންގެ ގިނަ ހިރާސްތަކަކީ މައިގަނޑު ތިން ކަމެއްގެ ނަތީޖާ

1- ދާއިރާއަށް އަވަސް އަވަހަށް ގެނެވޭ އިސްލާހީ ބަދަލުތައް

2- ސިއްހީ ދާއިރާގައި ހާމަކަން ކުޑަވުން

3- އެކަށީގެންވާ މިންވަރަށް މޮނިޓާކޮށް ފާރަވެރި ނުވެވުން

ދިރާސާގައި ބުނީ އެ ތިން ކަންތައް ރަނގަޅުކުރެވިގެންނަމަ ސިއްހީ ދާއިރާގައި ކޮރަޕްޝަނަށް މަގުފަހިވާ ގޮތަށް މިހާރު ހުރި ގިނަ ދޮރުތައް ބަންދުވާނެ ކަމަށެވެ.

އެ ރަސްމިއްޔާތުގައި ޓްރާންސްޕޭރެންސީ މޯލްޑިވްސްގެ އެގްޒެކެޓިވް ޑިރެކްޓަރު އާސިޔަތު ރިލްވީނާ ވިދާޅުވީ ދެކުނުގެ އޭޝިޔާގެ ގައުމުތަކާ އަޅާބަލާއިރު ސިއްހީ ދާއިރާގައި ޖީޑީޕީގެ ނިސްބަތުން އެންމެ ބޮޑު ހަރަދެއް ކުރަނީ ރާއްޖެއިން ކަމަށް ވިޔަސް ސިއްހީ ދާއިރާގައި ކޮރަޕްޝަން ގިނަ ކަމަށް ގިނަ ދިވެހިން ގަބޫލުކުރާ ކަމަށެވެ.

ކޮވިޑު-19 އަށްފަހު ސިއްހީ ދާއިރާގެ ކޮރަޕްޝަނާ ގުޅޭ ވާހަކަތައް ވެސް އެތައް ގުނައެއް އިތުރުވެގެން ގޮސްފައިވާ ކަމަށް އޭނާ ވިދާޅުވި އެވެ.

ސިއްހީ ދާއިރާގެ ކޮރަޕްޝަނާ ގުޅޭގޮތުން ހެދި ފުރަތަމަ ރިޕޯޓަށް މައުލޫމާތު ހޯދާފައިވަނީ އޮގަސްޓް، 2021 އިން އެ އަހަރުގެ ޑިސެމްބަރު މަހުގެ ނިޔަލަށެވެ. މިކަމުގައި ބައިވެރިވެފައިވަނީ އެންޓި ކޮރަޕްޝަން އަދި ސިއްހީ ދާއިރާގެ ބޭރުގެ މާހިރުންގެ ޓީމަކުންނެވެ.

ގާނޫނާއި ގަވައިދުތަކާއި ލިޔެކިޔުންތަކާއި ލިޓްރޭޗާ ރިވިއުގެ އިތުރުން 80 ފަރާތެއްގެ އިންޓަވިއު ނަގާފައިވެ އެވެ.