ކައިލީ ވައްޓާލައި އިންސްޓަގްރާމްގެ ރާނީކަން އަލުން ސެލީނާއަށް

ޒުވާން އިންފްލުއެންސާ، އަދި ވިޔަފާރިވެރިޔާ ކައިލީ ޖެނާ ވައްޓާލުމަށް ފަހު، އިންސްޓަގްރާމުގައި އެންމެ ގިނަ ފޮލޮވާސް ތިބި އަންހެނަކަށް ލަވަކިޔުންތެރިޔާ ސެލީނާ ގޮމޭޒް ވެއްޖެ އެވެ.

ދެހާސްނަވާރަަ ވަނަ އަހަރު އެރިއާނާ ގްރާންޑޭ އެ މަގާމަށް ދިއުމުގެ ކުރިން އެންމެ ގިނަ ފޮލޯވާސް ތިބީ ވެސް ސެލީނާގެ އެވެ. އޭގެ ފަހުން، ކައިލީ ޖެނާ ވަނީ އެ ދެމީހުން ފަހާލައިފަ އެވެ.

އިއްޔެގެ ވަގުތެއްގައި، ކައިލީގެ 380 މިލިއަން ފޮލޯވާސް ފަހާލައި، ސެލީނާގެ ފޮލޮވާސްގެ އަދަދު ވަނީ 381 މިލިއަނަށް އަރައިފަ އެވެ.

އެކަމުގެ އުފަލުގައި، ސެލީނާގެ ފޭނުން އަންނަނީ އެކަމާ އުފާ ފާޅުކުރަމުންނެވެ.

ފޮލޮވާސް ކިތަންމެ ގިނަޔަސް، ދާދިފަހުން "ވެނިޓީ ފެއާ" އަށް ދިން އިންޓަވިއުއެއްގައި ސެލީނާ ބުނީ އޭނާ އިންސްޓަގްރާމު ބޭނުންނުކުރާ ކަމަށާއި، އޭނާގެ ފޯނުގައި އިންނާނީ ހަމައެކަނި ޓިކްޓޮކް ކަމަށެވެ.

ސެލީނާ ބުނި ގޮތުގައި، އިންސްޓަގްރާމުގައި މީހުންގެ ގޯސް ކޮމެންޓުތަކުގެ ސަބަބުން ދެރަވެ އެވެ. އަދި އޭނާ ގަބޫލުކުރާ ގޮތުގައި އިންސްޓަގްރާމު ބޭނުންކުރުމަކީ ވަރަށް ވަގުތު ބޭކާރުވާ ކަމެކެވެ.

"މީހަކު އަހަރެން ހަޑިއޭ، ގަމާރޭ ބުންޏަސް އަޅައެއް ނުލަން. އެކަމަކު، މި މީހުން ވަރަށް ތަފްސީލުކޮށް ލިޔަނީ. ވަރަށް ހިތަށް އަސަރުކުރާ ފަދަ ނުބައި ގޮތަށް، ބޮޑެތި ޕެރެގްރާފުތައް ލިޔެފައި ހުންނަނީ. އަހަރެން އެކަމާ އަބަދު ރޮވޭ. އަބަދު އެންޒައިޓީގައި ހުންނަނީ. އެހެންވެ ދެން އެކަމެއް ނުވި އިތުރަކަށް. އެއީ ބޭކާރު ވަގުތު،" ސެލީނާ ބުންޏެވެ.

އޭނާ ބުނާ ގޮތުން، މިހާރު އޭނާގެ އިންސްޓަގްރާމް ގެންގުޅެނީ އޭނާގެ އެސިސްޓެންޓެކެވެ. އަދި އޭނާ ވަނީ އެސިސްޓެންޓު ލައްވައި، ގޯސް ކޮމެންޓުތައް ފިލްޓަކޮށް، ފޭނުންނާ ގުޅޭނެ ފަދަ ސިސްޓަމެއް ގާއިމުކޮށްފައި ކަމަށް ބުންޏެވެ.

އެންމެ ގިނަ ފޮލޮވާސް ތިބި އަންހެން މީހާގެ ލަގަބް ސެލީނާ ހޯދާފައި ވާއިރު، އޭނާ އަކީ މިހާރު އިންސްޓަގްރާމުގައި ތިން ވަނަ އަށް އެންމެ ގިނަ މީހުން ފޮލޯކުރާ މީހާ އެވެ. އެއްވަނައިގާ، 550 މިލިއަން ފޮލޮވަރުންނާ އެކު ފުޓްބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯ އޮތް އިރު، 432 މިލިއަން ފޮލޮވަރުންނާ އެކު ދެވަނައިގާ އުޅެނީ ލިއޮނަލް މެސީ އެވެ.