އޮސްޓްރޭލިޔާ ޑޮލަރުގައި ރަސްގެފާނު ޗާލްސްގެ ފޮޓޯ ނުޖަހާނެ

އޮސްޓްރޭލިޔާގައި ޗާޕުކުރާ ފަސް ޑޮލަރުގެ އާ ނޫޓުގައި، އިނގިރޭސި ރަސްގެފާނު ޗާލްސް ދޭއްގެ ފޮޓޯ ނުޖަހާނެ ކަމަށް އޮސްޓްރޭލިޔާ ސަރުކާރުން ބުނެފި އެވެ.

އޮސްޓްރޭލިޔާގެ މަރުކަޒީ ބޭންކުން ބުނި ގޮތުގައި އެ ގައުމުގެ ފަސް ޑޮލަރުގެ ނޫޓު އަލުން ޗާޕުކުރާ އިރު، މިހާރު އެ ނޫޓުގެ މޫނުމަތީ ފުށުގައި ޖަހާފައިވާ އިނގިރޭސި ވިލާތުގެ ކުރީގެ ރާނީ އެލިޒަބަތު ދޭއްގެ ފޮޓޯގެ ބަދަލުގައި، ދެން ޖަހާނީ، އޮސްޓްރޭލިޔާގެ އަސްލު ވަޒަންވެރިންގެ ފޮޓޯއެކެވެ. މަރުކަޒީ ބޭންކުން ބުނި ގޮތުގައި ފަސް ޑޮލަރުގެ ނޫޓުގައި އެ ގައުމުގެ އަސްލު ވަޒަންވެރިންގެ ފޮޓޯއެއް ޖަހަން ނިންމީ، އޮސްޓްރޭލިޔާގެ އެންމެ ފުރަތަމަ ވަޒަންވެރިންގެ ސަގާފަތާއި އެމީހުންގެ ތާރީޚަށް ޝަރަފުވެރިކަން ދިނުމުގެ ގޮތުންނެވެ.

ޑޮލަރުގެ ކުރެހުމަށް މި ބަދަލު ގެންނަ އިރު، އެކަން ކުރާނީ އޮސްޓްރޭލިޔާގެ އަސްލު ވަޒަންވެރިންގެ އާންމު ރައްޔިތުންނާ އެކުގައި މަޝްވަރާކުރުމަށް ފަހު، އެމީހުންގެ ޚިޔާލާ އެއްގޮތަށް ކަމަށް މަރުކަޒީ ބޭންކުން ބުންޏެވެ. އެހެންކަމުން، ފަސް ޑޮލަރުގެ އާ ނޫޓު ޗާޕުކޮށްގެން ނެރުމަށް އަދި ދެތިން އަހަރެއް ނަގާނެ އެވެ.

ފަސް ޑޮލަރުގެ އާ ނޫޓުގެ މޫނުމަތީ ފުށުގައި އަސްލު ވަޒަންވެރިންގެ ތާރީޚާއި ސަގާފަތް ދައްކައިދޭ ކުރެހުމެއް ޖަހާއިރު، އެ ނޫޓުގެ ނުފުށުގައި ދެން ވެސް ހުންނާނީ، އެ ގައުމުގެ ގާނޫނު ހަދާ މަޖިލީހުގެ އިމާރާތް ދައްކައިދޭ ކުރެހުމެކެވެ.

އޮސްޓްރޭލިޔާ ސަރުކާރުން ބުނި ގޮތުގައި ފަސް ޑޮލަރުގެ އާ ނޫޓުގައި އިނގިރޭސި ރަސްގެފާނު ޗާލްސް ދޭއްގެ ފޮޓޯ ނުޖަހަން ނިންމި ނިންމުމާ ގުޅިގެން، އެ ގައުމުގައި ދެން ޗާޕުކުރާ އެއްވެސް އަދަދެއްގެ ޑޮލަރު ނޫޓެއްގައި އިނގިރޭސި ތަޚުތާ ގުޅުން ހުރި ކުރެހުމެއް ނުހިމަނާނެ އެވެ. މަރުކަޒީ ބޭންކުން ބުނި ގޮތުގައި މިގޮތަށް ނިންމީ، ބޮޑުވަޒީރު އެންތަނީ އަލްބަނޭޒްއާ އެކުގައި މަޝްވަރާ ކުރެއްވުމަށް ފަހު އެވެ.

ކަރުދާހު ފައިސާ އިން އިނގިރޭސި ތަޚުތާ ގުޅުން ހުރި ކުރެހުންތައް ބޭރުކުރި ކަމަށް ވިޔަސް، އޮސްޓްރޭލިޔާގައި ބޭނުންކުރާ އެކި އަދަދުތަކުގެ ފައިސާފޮތިތަކުގައި އިނގިރޭސި ޝާހީ އާއިލާއާ ގުޅުން ހުރި ކުރެހުންތައް ހިމަނާނެ އެވެ.

އިނގިރޭސި ތަޚުތުގައި އެއިރަކު އިންނަވާ ބޭފުޅަކީ އޮސްޓްރޭލިޔާގެ ވެސް ދައުލަތުގެ އެންމެ މަތީ ވެރިޔާ އެވެ. އެއީ އާންމު ގޮތެއްގައި ރަމްޒީ މަގާމެއް ކަމަށް ވިޔަސް، މިދިޔަ އަހަރުގެ ސެޕްޓެމްބަރު މަހުގެ ތެރޭގައި އިނގިރޭސި ރާނީ އެލިޒަބަތު ދޭއް އަވަހާރަވުމާ އެކު، ރަސްކަމަކުން ޖުމްހޫރިއްޔަތަކަށް ބަދަލުވުމުގެ ބަހުސް، އޮސްޓްރޭލިޔާގެ އާންމު ރައްޔިތުންގެ މެދުގައި އަނެއްކާ ވެސް ވަނީ ފެށިފަ އެވެ.