ޑިސްޕިއުޓް މަރުހަލާ އުވާލުމުން ސިވިލް ކޯޓުން ނިންމި މައްސަލަތަކުގެ އަދަދު ދަށްވެއްޖެ

ސިވިލް ކޯޓުގެ ޑިސްޕިއުޓް ރިޒޮލިއުޝަން ޑިވިޝަން މިދިޔަ އަހަރު އުވާލުމުން އެ ކޯޓުން އެ އަހަރު ނިންމި މައްސަލަތަކުގެ އަދަދު ދަށްވެއްޖެ އެވެ.

ސިވިލް ކޯޓަށް ހުށަހަޅާ މައްސަލަތަކުގެ ޝަރީއަތް ފެށުމުގެ ކުރިން ސުލްހަވެރި ހައްލެއް ލިބޭތޯ ބެލުމަށް ޑިސްޕިއުޓް ރިޒޮލިއުޝަން ޑިވިޝަނެއް 2015 ވަނަ އަހަރު އުފެއްދީ ސުޕްރީމް ކޯޓުގެ ސާކިއުލާއަކުންނެވެ. އެގޮތަށް ހަމަޖެއްސުމުން ދެ ބައިކުޅަ އެއް ބައި މައްސަލަތައް ޝަރީއަތަކާ ނުލައި ކޯޓުން ނިންމި އެވެ.

އެކަމަކު މިދިޔަ އަހަރުގެ ފެބްރުއަރީ މަހުން ފެށިގެން ޑިސްޕިއުޓް ރިޒޮލިއުޝަން މަރުހަލާ އުވާލަން ސުޕްރީމް ކޯޓުގެ ޕްރެކްޓިސް ޑައިރެކްޝަނަކުން ނިންމި އެވެ. އެކަމާ ގުޅިގެން ސިވިލް ކޯޓުން ނިންމި މައްސަލަތަކުގެ އަދަދު މިހާރު ވަނީ ދަށްވެފަ އެވެ.

ސިވިލް ކޯޓުން މިއަދު އާންމުކުރި ތަފާސްހިސާބުތައް ދައްކާ ގޮތުން 2021 ވަނަ އަހަރު އެ ކޯޓުން 4،600 އަށް ވުރެ ގިނަ މައްސަލަ ނިންމިޔަސް، މިދިޔަ އަހަރު ނިންމީ 2،917 މައްސަލަ އެވެ. އަހަރު ނިމުނުއިރު 4،800 އަށް ވުރެ ގިނަ މައްސަލަ ނުނިމެ އެވެ.

އެ ހިސާބުތައް ދައްކާ ގޮތުން މިދިޔަ އަހަރު ސިވިލް ކޯޓަށް 5،000 އަށް ވުރެ ގިނަ މައްސަލަ ހުށަހެޅި އެވެ. އަދި މިދިޔަ އަހަރު ނިމުނުއިރު އެއް އަހަރަށް ވުރެ ގިނަ ދުވަސްވެފައިވާ 900 އަށް ވުރެ ގިނަ މައްސަލަ އެ ކޯޓުގައި އޮތެވެ.

ޑިސްޕިއުޓް ރިޒޮލިއުޝަން ޑިވިޝަންގެ އިތުރުން މައްސަލަތަކުގެ ކުޑަބޮޑުމިނާއި ބާވަތަށް ބަލައިގެން އުފައްދާފައި އޮތް ޑިވިޝަންތައް ވެސް ސުޕްރީމް ކޯޓުން މިދިޔަ އަހަރު އުވާލި އެވެ. އަދި ހިބަ އާއި ތަރިކަ އާއި ވަސިއްޔަތުގެ މައްސަލަތައް ފެމިލީ ކޯޓުގެ ބަދަލުގައި ސިވިލް ކޯޓުން ވެސް ބަލާގޮތަށް ހަމަޖެއްސި އެވެ.