ކޯސްޓުގާޑުން ބޭރު ގައުމުތަކުގައި ވެސް ރާއްޖޭގެ ނަން ރީތިކޮށްދީފި: މިނިސްޓަރު

ރާއްޖޭގެ ކަނޑުގެ ސަރަހައްދަށް ގެއްލުނު ސްރީ ލަންކާގެ މަސްބޯޓު ހޯދުމުގައި ކޯސްޓްގާޑުން ކާމިޔާބު ހޯދާފައިވާތީ އެކަމަށް ސަރުކާރުން ތައުރީފުކޮށްފި އެވެ.

ހަތަރު މީހުންނާއެކު ގެއްލިގެން ހޯދަމުން ދަނިކޮށް މިދިޔަ ބުދަ ދުވަހުގެ ރޭ ހދ. މަކުނުދޫ ބޭރުން ފެނުނު މަސް ބޯޓު ހޯދައި މީހުން ސަލާމަތްކުރި ކޯސްޓްގާޑުގެ ހުރަވީ ލޯންޗަށް، ޑިފެންސް މިނިސްޓަރު އާދަމް ޝަރީފް އުމަރު މިއަދު ޒިޔާރަތް ކުރައްވައި ވިިދާޅުވީ ކޯސްޓްގާޑުން ދިވެހި އަސްކަރިއްޔާ އާއި މުޅި ގައުމު ފަހުރުވެރިކޮށްދީފި ކަމަށެވެ.

އަދި އޭގެ ސަބަބުން ބޭރު ގައުމުތަކުގައި ވެސް ދިވެހިންގެ ނަން ރީތިވެގެން ހިނގައްޖެ ކަމަށް ވިދާޅުވި އެވެ.

ލަންކާގެ މަސް ބޯޓު ކޯސްޓްގާޑުން ހޯދަން ފެށީ ލަންކާގެ ސަރުކާރުގެ އެދުމަކަށެވެ. އޭގެ ހަފުތާއެއްހާ ކުރިން، ރާއްޖޭގެ މަސް ދޯންޏަކަށް ހއ. ތުރާކުނު ބޭރުން އެހެން ބޯޓެއް ވެސް އޮޔާދަނިކޮށް ވަނީ ފެނިފަ އެވެ. ދެވަނަ ބޯޓު ފެނުނީ ބުދަ ދުވަހުގެ ރޭ ފަތިހު، މަކުނުދޫގެ ހުޅަނގުން 153 ނޯޓިކަލް މޭލު ބޭރުން ހުރަވީ ލޯންޗަށެވެ.

ލަންކާގެ މި ދެ ބޯޓު ހޯދައިދިނީތީ އެ ގައުމުގެ ސަފީރު ވެސް ވަނީ ރާއްޖެއަށް ޝުކުރު އަދާކުރައްވައިފަ އެވެ.

މިިނިސްޓަރު ވިދާޅުވީ ސިފައިން ހޯދި ކާމިޔާބީގެ ސަބަބުން ބޭރު ގައުމުތަކާއެކު ސިޔާސީ ގޮތުން އޮންނަ ގުޅުން ވެސް ބަދަހިވެގެންދާނެ ކަމަށެވެ.

"މިއީ މުޅި ގައުމަށް ވެސް ލިބުނު ވަރަށް ބޮޑު ކާމިޔާބީއެއް،" އާދަމް ޝަރީފް ވިދާޅުވި އެވެ.

ކޯސްޓްގާޑަށް އެ ބޯޓު ފެނުނު އިރު އޭގައި ތިބި މީހުންގެ ތެރެއިން އެކަކުގެ ހާލު ވަރަށް ދެރަ އެވެ. އެކަމަކު އޭނާގެ ހާލު މިހާރު ރަނގަޅު އިރު އިއްޔެ ރޭ އެ އެންމެން ވެސް ވަނީ މާލެ ގެނެސްފަ އެވެ.

ނޫސްވެރިންނާ ވާހަކަ ދައްކަމުން އެ މީހުން ބުނީ އެންމެ ބޮޑަށް ފާހަގަވީ ސިފައިން ބެހެއްޓި އޯގާތެރިކަން ކަމަށާއި އެ ހެޔޮކަމުގެ އަގު ވަޒަން ވެސް ނުކުރެވޭނެ ކަމަށެވެ.

ޗީފް އޮފް ޑިފެންސް ފޯސް މޭޖަ ޖެނެރަލް އަހްމަދު ޝިޔާމުގެ އިތުރުން ކޯސްޓްގާޑުގެ އިސްވެރިން ވެސް ބައިވެރިވެ ވަޑައިގެންނެވި އެ ރަސްމިއްޔާތުގައި ޑިފެންސް މިނިސްޓަރު ވިދާޅުވީ ސިފައިންގެ ކަނޑުގެ ފްލީޓަށް އެންމެ ފަހުން ހޯދި ދުވެލި ބާރު ފާސްޓް އިންޓަސެޕްޓާގެ ފަސް އުޅަނދުގެ މަގްސަދަކީ ވެސް މީހުންގެ ފުރާނަ އާއި މުދާ ރައްކާތެރިކުރުން ކަމަށެވެ.

މިނިސްޓަރު ވިދާޅުވީ އިންސާނެއްގެ ފުރާނަ މިލިޔަން ޑޮލަރުން ވެސް އަގު ނުކުރެވޭނެ ކަމަށާއި އެހެންވެ، މުޅި ގައުމުގެ މިނިވަންކަމާއި އިސްތިގްލާލު ދެމެހެއްޓުމަށް ހޭދަ ކުރާ ފައިސާ އަކީ އޭގައި ވަކި މިންގަނޑެއް ގެންގުޅެވޭނެ ކަމެއް ނޫން ކަމަށެވެ. އަދި ބަޔަކު ކަނޑުމަތީ ބެހިގެންދާ ހާލަތެއްގައި ވަސީލަތްތައް މަދުވުމުގެ ސަބަބުން އެހީތެރިކަން ފޯރުކޮށްނުދެވިއްޖެ ނަމަ ގައުމެއްގައި އޭގެ ޒާތުގައި މިނިވަންކަން ނެތް ކަމަށް ވެސް ވިދާޅުވި އެވެ.

"ގައުމަށް ނުރައްކަލެއް ކުރިމަތިވާއިރު، ސަލާމަތްވާނެ ވަސީލަތެއް ނެތް ނަމަ އެއީ ހިތާމަ ކުރަން ޖެހޭ ކަމެއް. އެހެންވެ އެ ތަރާދަކުން ކިރޭނެ އެއްޗެއް ނޫން،" އާދަމް ޝަރީފް ވިދާޅުވި އެވެ.

މިނިސްޓަރު ވަނީ މި އޮޕަރޭޝަނުގައި ބައިވެރިވި ހުރަވީ ލޯންޗުގެ ސިފައިންނާ ވަކިވަކިން މަރުހަބާ ވިދާޅުވެފަ އެވެ.