ސްކޫލު ބަންދާ ދިމާކޮށް ކަނޑު އުޅަނދުފަހަރު ޗެކްކުރުމުގެ އޮޕަރޭޝަނެއް ފަށައިފި

މި ފަހަރުގެ ސްކޫލް ބަންދާ ދިމާކޮށް، ކަނޑު ދަތުރުކުރާ އުޅަނދުފަހަރު ޗެކްކުރުމުގެ އޮޕަރޭޝަނެއް ސިފައިން ފަށައިފި އެވެ.

އެމްއެންޑީއެފުން އިއްޔެ ބުނީ، އެއީ ފުރަތަމަ ޓާމްގެ ބަންދާ ދިމާކޮށް ގިނަ ބަޔަކު ކަނޑުމަގުން ރަށްރަށް ދަތުރުކުރާތީ އާންމުންގެ ރައްކާތެރިކަން ކަށަވަރުކުރުމުގެ ގޮތުން އެމްއެންޑީއެފްގެ މާލެ އޭރިއާ ކޯސްޓްގާޑު ސެކަންޑް ސްކޮޑްރަންއިން ކުރިއަށް ގެންދާ ހާއްސަ އޮޕަރޭޝަނެއް ކަމަށެވެ.

"އޮޕްސް ހަޅަ" ގެ ނަމުގައި ކުރިއަށް ގެންދާ އެ އޮޕަރޭޝަންގައި ދަތުރުކުރާ އުޅަނދާއި ދަތުރުކުރާ މީހުންގެ ސަލާމަތާއި ރައްކާތެރިކަމަށް އަޅަން ޖެހޭ ފިޔަވަޅުތައް އަޅާފައިވޭތޯ ބަލާނެ ކަމަށް ސިފައިން ބުންޏެވެ.

އެ އޮޕަރޭޝަންގައި އުޅަނދުފަހަރުގެ ސަލާމަތީ ސެޓްފިކެޓްގައި ބަޔާންކޮށްފައި ހުންނަ ކަންކަން ފުރިހަމަކޮށްފައިވޭތޯ ބަލާނެ ކަމަށް ވެސް ސިފައިން ބުންޏެވެ.

"އޭގެ ތެރޭގައި މެރިން ވީއެޗްއެފް ޗެކް ކުރުމާއި އުޅަނދުފަހަރުގެ ކެޕްޓަން އަތުގައި ކަނޑުގެ އުޅަނދުފަހަރު ދުއްވުމުގެ ލައިސަންސް އޮތްތޯ ބެލުމުގެ އިތުރުން ދަތުރުވެރިންގެ ސަލާމަތާއި ރައްކާތެރިކަމާ ގުޅޭ ގިނަ ކަންތައްތައް ބެލުމަށް ވެސް ވަނީ ހަމަޖެހިފަ އެވެ،" ސިފައިން ބުންޏެވެ.

މިދިޔަ ހުކުރު ދުވަހު ފެށި މި އޮޕަރޭޝަން އަންނަ މަހު އަށަކާ ހަމައަށް ކުރިއަށް ގެންދާނެ އެވެ.

ސްކޫލް ބަންދާ ދިމާކޮށް އާންމުކޮށް ކޮންމެ އަހަރަކު ވެސް ކަނޑުއުޅަނދުފަހަރު ޗެކްކުރުމުގެ އޮޕަރޭޝަންތައް ސިފައިން އަންނަނީ ހިންގަމުންނެވެ.