އާޖެންޓީނާ މޮޅުވުމަކީ ބައްޕަ އަށް ވެސް ލިބޭނެ ޝަރަފެއް: މަރަޑޯނާގެ ދަރިފުޅު

ވޯލްޑް ކަޕް ފައިނަލްގައި ފްރާންސާ ދެކޮޅަށް އާޖެންޓީނާ އަށް ކާމިޔާބު ހޯދިއްޖެ ނަމަ އެއީ އެ ގައުމުގެ ލެޖެންޑް ޑިއޭގޯ މަރަޑޯނާ އަށް ވެސް ލިބޭ ޝަރަފެއް ކަމުގައި، އޭނާގެ ދަރިފުޅު ޑިއޭގޯ އާމަންޑޯ މަރަޑޯނާ ސިނަގްރާ ބުނެފި އެވެ.

މަރަޑޯނާގެ އެންމެ ދޮށީ ދަރިފުޅު ސިނަގްރާ އުފަންވީ 1986 ވަނަ އަހަރު އާޖެންޓީނާ އިން ވޯލްޑް ކަޕް ކާމިޔާބު ކުރިތާ ދުވަސްކޮށެއް ފަހުން، އެ އަހަރުގެ ސެޕްޓެމްބަރު މަހު އެވެ. އަހަރުތަކެއް ވަންދެން އޭނާ އާއި ބައްޕަ މަރަޑޯނާއާ މާ ބޮޑު ގުޅުމެއް ނެތް ނަމަވެސް، މަރަޑޯނާގެ ހަޔާތުގެ ފަހު ދުވަސްކޮޅު ދެ ބަފައިންގެ ވަރަށް ގާތް ގުޅުމެއް އުފެދުނެވެ.

ސިއްހީ ގޮތުން އެތައް މައްސަލަތަކަކާ ކުރިމަތިވެ، ބަލި ހާލުގައި އުޅުމަށް ފަހު އުމުރުން 60 އަހަރުގައި މަރަޑޯނާ މަރުވީ 2020 ވަނަ އަހަރުގެ ނޮވެމްބަރު މަހު ހާޓް އެޓޭކެއްގަ އެވެ.

އިޓަލީ އަށް އުފަން އުމުރުން 36 އަހަރުގެ ސިނަގްރާ ވަނީ އިޓަލީގެ 17 އަހަރުން ދަށުގެ ގައުމީ ޓީމަށް ކުޅެފަ އެވެ. އިޓަލީގެ ދަށް ޑިވިޝަންތަކުގެ ގިނަ ޓީމުތަކަކަށް ކުޅުމަށް ފަހު އޭނާ ކުޅުން ހުއްޓާލީ 2020 ވަނަ އަހަރު އެވެ. މީގެ އިތުރުން އޭނާ ވަނީ އިޓަލީގެ ބީޗް ސޮކާ ގައުމީ ޓީމާ އެކު ވޯލްޑް ކަޕް ވެސް ކުޅެފަ އެވެ. ކުޅުން ހުއްޓާލުމަށް ފަހު އޭނާ މިހާރު އަންނަނީ އިޓަލީގެ ކުލަބެއް ކަމަށްވާ ނަޕޯލީ ޔުނައިޓެޑަށް ކޯޗު ކޮށްދެމުންނެވެ.

"އަހަރެން މި އުޅެނީ ހަމަ [އާޖެންޓީނާ އަށް] މަރުދޭ މީހެއް އުޅޭހެން. ހުރިހާ މެޗެއް ވެސް ބަލަން، ހުރިހާ ހަބަރުތަކެއް ވެސް ބަލަން. އަހަރެން ބޭނުން ތިންވަނަ ތަރިއެއް ބެޖުގައި ޖަހަން، އެއީ މި ކުޅުންތެރިންނަށް ހައްގުވާ އެއްޗެއް. އެ ކުޅުންތެރިން [އާޖެންޓީނާގެ] ޖޯޒީއަށްޓަކައި ހުރިހާ ކަމެއް އެބަ ކުރޭ، އުންމީދު ކުރަނީ އެހެން ވާނެ ކަމަށް،" މަރަޑޯނާގެ ދަރިފުޅު ސިނަގްރާ ބުންޏެވެ.

"އަހަރެންނަށް ޔަގީން ކުޅުންތެރިން ޓީމުގެ ދިފާއުގައި ކުރަމުންދާ މަސައްކަތްތަކާ މެދު، ބައްޕަ ވަރަށް ފަހުރުވެރި ވާނެ. ކުޅެން ޖެހުނީމަ ކުޅެނީ ވަރަށް މޮޅަށް، އަދި ރަނގަޅަށް ނުކުޅެވޭ މެޗުތަކުގައި ވެސް ކުޅުންތެރިންގެ ހިތްވަރާ މެދު އަހަރެންގެ ބައްޕަ ވަރަށް ބޮޑަށް ފަހުރުވެރި ވާނެ ކަމާ މެދު ޝައްކެއް ނުކުރަން."

މަރަޑޯނާގެ ކެޕްޓަން ކަމުގައި 1986 ވަނަ އަހަރު އާޖެންޓީނާ އަށް ވޯލްޑް ކަޕް ހޯދައިދިން ޓީމާއި، ލިއޮނެލް މެސީގެ ކެޕްޓަން ކަމުގައި މިހާރު ގަތަރުގައި ކުޅޭ އާޖެންޓީނާގެ ޓީމާ ދެމެދު ގިނަ ބަޔަކު އަޅާ ކިޔަމުން ގެންދާއިރު، ސިނަގްރާ ބުނީ އެ ޓީމު އަޅާކިޔުމުގެ މާ ބޮޑު ބޭނުމެއް އޮތް ކަމަށް ނުދެކޭ ކަމަށާއި، މިއީ މެސީގެ ކުޅުން ތަޖުރިބާކޮށް އުފާކުރަން ވީ ވަގުތު ކަމަށެވެ.

"މެސީގެ ކުޅުމާ މެދު އުފާކުރަން ވީ ވަގުތު މިއީ، އަހަރެމެން އޭރު [މަރަޑޯނާގެ ކުޅުމާ މެދު] އުފާކުރި ފަދައިން. އަހަރެންނަކަށް ނުފެނޭ ދެމީހުން އަޅާކިޔަން ވީ ސަބަބެއް،" ސިނަގްރާ ބުނެފައި ވެއެވެ.

"އަޅާކިޔައިގެން ލިބޭނެ ފައިދާއެއް ނެތް. އަހަރެމެން އާދިއްތަ ދުވަހު މޮޅު ވެއްޖެ ނަމަ ދެ ކުޅުންތެރިންގެ ވާހަކަ ވެސް ވަރަށް އެއްގޮތް ވާނެ، އެކަމަކު އަހަރެން ބޭނުމީ ލިއޮނެލް [މެސީ] ގެ ކުޅުން ބަލައިލާ އުފާކުރަން. އަހަރެން ވަރަށް ގަޔާވާ ފޮޓޯއެއް އެބައުޅޭ އިންޓަނެޓުގައި ދައުރުވާ، އޭނަ އާއި ބައްޕަ ބައްދާލައިގެން ހުރި ފޮޓޯއެއް، އަހަރެން ވަރަށް އުންމީދުކުރަން އެކަން ހަގީގަތަކަށް ވާނެ ކަމަށް، އެއީ އަހަރެންނަކީ ލިއޯ [މެސީ] ގެ އެއް ނަމްބަރު ސަޕޯޓަރު، އަހަރެން އޭނާ ދެކެ ވަރަށް ލޯބިވޭ."

މަރަޑޯނާ ވަނީ ދެ ފަހަރު ވޯލްޑް ކަޕް ފައިނަލް ގައި ކުޅެ، އެއް ފަހަރު ތަށި ހޯދައިފަ އެވެ. މެސީ ވަނީ މީގެ ކުރިން 2014 ވަނަ އަހަރުގެ ފައިނަލް ގައި ކުޅެފަ އެވެ. މި އަހަރުގެ މުބާރާތުގައި މެސީ ވަނީ ވޯލްޑް ކަޕް ގައި މަރަޑޯނާގެ ގޯލް ޖެހުމުގެ ރެކޯޑް މުގުރާލައިފަ އެވެ. މަރަޑޯނާ ވޯލްޑް ކަޕް ގައި އަށް ގޯލު ޖަހައިފައި ވާއިރު، މެސީ ވަނީ މިހާތަނަށް 11 ގޯލު ހަމަކޮށްފަ އެވެ. އަދި މަރަޑޯނާއާ އެއްވަރަށް ވޯލްޑް ކަޕް ގައި މެސީ ވަނީ އަށް ގޯލު އެސިސްޓް ކޮށްފަ އެވެ.