ގަޑިއަކު 48 މޭލަށް ދުވާ، މިސައިލް ވެސް ހަރުކުރެވޭ ފަސް އުޅަނދެއް ސިފައިން ބޭނުންކުރަން ފަށައިފި

އެމްއެންޑީއެފްގެ ކަނޑުގެ ފްލީޓަށް ގެނައި، ދުވެލި ބާރު ފާސްޓް އިންޓަސެޕްޓާގެ ފަސް އުޅަނދެއް މިއަދު ބޭނުންކުރަން ފަށައިފި އެވެ.

އެ އުޅަނދުތައް ރަސްމީކޮށް ބޭނުންކުރަން ފައްޓަވައިދެއްވީ، އިއްޒުއްދީން ފާލަން ކައިރީގައި ބޭއްވި ރަސްމިއްޔާތެއްގައި، ސިފައިންގެ ވެރިޔާ ރައީސް އަބްދުﷲ ޔާމީނެވެ.

މި ރަސްމިއްޔާތުގައި ޗީފް އޮފް ޑިފެންސް ފޯސް މޭޖަ ޖެނެރަލް އަހުމަދު ޝިޔާމް ވިދާޅުވީ މި އުޅަނދުތައް ބޭނުންކުރަން ފެށުމުން، ސިފައިންގެ މަރުކަޒު ހުންނަ ހަތަރު ސަރަހައްދުން ވެސް، އެއް ފެންވަރަކަށް ކަނޑުމަގުން ހިދުމަތް ދެވިގެންދާނެ ކަމަށެވެ.

ސިފައިންގެ ހިދުމަތުގައި ބޭނުންކުރަން ފެށި އާ އުޅަނދުތަކުގެ ދުވެއްޔަކީ ގަޑިއަކު 48 މޭލެވެ. ބަންޑުން ޖަހައިފި ނަމަ އަމިއްލައަށް ތެދުކުރުމުގެ ގާބިލްކަން ވެސް ލިބިފައިވާ އުޅަނދުތަކަށް ވަޒަނެއް ވެސް ނާރާނެ އެވެ. މީގެ އިތުރުން މި އުޅަނދުތަކުގައި މިސައިލް ވެސް ހަރުކުރުވޭނެ ކަމަށް ޝިޔާމް ވިދާޅުވި އެވެ.

އަލަށް ގެނައި އުޅަނދުތައް ބޭނުން ކުރާނީ ސިފައިންގެ މަރުކަޒު ހުންނަ ކޮންމެ ސަރަހައްދެއްގެ ވެސް 12 މޭލު ރޭޑިއަސްގަ އެވެ.

މި އުޅަނދުތަކުގެ ތެރެއިން އެ އެއް އުޅަނދަކީ ކޮރެއާ ސަރުކާރުން ރާއްޖެއަށް ހަދިޔާ ކުރި އުޅަނދެކެވެ. އަދި ބާކީ ފަސް އުޅަނދު ބަނދެފައިވަނީ ލަންކާގެ ސޯލާސް ނަމަކަށް ކިޔާ ކުންފުންޏަކުން 129 މިލިއަން ރުފިޔާ ހަރަދުކޮށްގެންނެވެ.

ރަސްމިއްޔާތުގައި ޑިފެންސް މިނިސްޓަރު އާދަމް ޝަރީފް ވިދާޅުވީ ސިފައިންގެ 125 އަހަރުގެ ތާރީހުގައި އެންމެ ބޮޑު ކާމިޔާބީއެއް ހޯދާފައި ވަނީ ރައީސް އަބްދުﷲ ޔާމީން ކަމަށެވެ. މިނިސްޓަރު ވިދާޅުވީ ސިފައިންގެ މަސައްކަތްތައް ހަރުދަނާކުރަން ވެސް ގިނަ މަސައްކަތްތަކެއް ކުރަމުން އަންނަ ކަމަށެވެ. ބަންޑާރަ ކޮށީގައި އިމާރާތްކުރަމުން އަންނަ ނުވަ ބުރީގެ އިމާރާތުގެ މަސައްކަތާއި ރާއްޖޭގެ އެކި ހިސާބުތަކުގައި ސިފައިންގެ މަރުކަޒުތައް އެޅުން ހިމެނޭ ކަމަށް މިނިސްޓަރު ވިދާޅުވި އެވެ. އަދި އިންޑިއާ ސަރުކާރުގެ އެހީގައި މާފިލާފުށީގައި ގާއިމުކޮށްފައިވާ ޓްރެއިނިން އިންސްޓިޓިއުޓް ހިމެނޭކަން ފާހަގަކުރެއްވި އެވެ.